[1] وَ عِيسَى قَمَّ مِنْ هِنَاكْ وَ مَشَى فِي حِلِّتَهْ. وَ تَلَامِيذَهْ مَشَوْا مَعَايَهْ.
[2] وَ يَوْم السَّبِتْ هُو بَدَأْ يِعَلِّمْ النَّاسْ فِي بَيْت الصَّلَاةْ. وَ نَاسْ كَتِيرِينْ سِمْعَوْا كَلَامَهْ وَ كُلُّهُمْ عَجَّبَوْا مِنَّهْ بِلْحَيْن. وَ قَالَوْا: هَايْ! النَّادُمْ دَا لِقِي كَلَامَهْ دَا مِنْ وَيْن؟ وَ الْعِلِمْ الْعِنْدَهْ دَا مِنْ وَيْن؟ وَ كِكَّيْف الْعَجَايِبْ جَايِّينْ بِإِيدَيْنَهْ؟
[3] دَا مَا الْأُسْطَا وَلَّا؟ هُو وِلَيْد مَرِيَمْ بَسْ وَ أَخُوهُمْ لِيَعْقُوبْ وَ يُوسِي و يَهُوذَا و سِمْعَانْ. وَ أَخْوَاتَهْ كُلَ قَاعِدَاتْ هِنِي مَعَانَا. وَ خَلَاصْ زِعِلَوْا وَ مَا آمَنَوْا بَيَّهْ.
[4] وَ عِيسَى حَجَّى لَيْهُمْ وَ قَالْ: كُلَّ النَّاسْ يِكَرُّمُوا النَّبِي إِلَّا نَاسْ حِلِّتَهْ وَ أَخْوَانَهْ وَ نَاسْ بَيْتَهْ.
[5] وَ مَا قِدِرْ يِسَوِّي خِدْمَةْ عَجِيبَةْ فِي الْبَكَانْ دَا، إِلَّا خَطَّ إِيدَيْنَهْ فِي مَرْضَانِينْ وَاحِدِينْ وَ دَاوَاهُمْ.
[6] وَ هُو عَجَّبْ مِنْهُمْ أَشَانْ مَا عِنْدُهُمْ إِيمَانْ. وَ قَمَّ يُرُوغْ فِي الْحِلَّالْ وَ يِعَلِّمْ النَّاسْ.
[7] وَ عِيسَى نَادَى تَلَامِيذَهْ الْأَتْنَا عَشَرْ و رَسَّلَاهُمْ إِتْنَيْن إِتْنَيْن. وَ أَنْطَاهُمْ قُدْرَةْ أَشَانْ يَطُرْدُوا الشَّوَاطِينْ.
[8] وَ أَمَرَاهُمْ وَ قَالْ: مَا تِشِيلُوا مَعَاكُو شَيْء لِلسَّفَرْ إِلَّا عَصَاةْ. مَا تِشِيلُوا أَكِلْ وَ لَا مُخْلَايْ وَ لَا جُزْلَانْ.
[9] أَلْبَسَوْا نَعَالْ وَ مَا تِشِيلُوا مَعَاكُو غِيَارْ هَنَا خُلْقَانْ.
[10] وَ قَالْ لَيْهُمْ: وَكِتْ تِدَلُّوا فِي بَيْت هَنَا نَادُمْ، أَقْعُدُوا فَوْقَهْ لَحَدِّي تَمُرْقُوا مِنْ الْحِلَّةْ.
[11] وَ أَيِّ بَكَانْ الْمَا يَقْبَلَوْكُو فَوْقَهْ وَ يَابَوْا كَلَامْكُو، أَمُرْقُوا مِنَّهْ وَ حِتُّوا الْعَجَاجْ مِنْ رِجِلَيْنكُو. وَ دَا يَبْقَى فَوْقهُمْ شَهَادَةْ.
[12] وَ خَلَاصْ قَمَّوْا بِبَلُّغُوا كَدَرْ النَّاسْ وَاجِبْ يُتُوبُوا مِنْ ذُنُوبْهُمْ.
[13] وَ طَرَدَوْا شَوَاطِينْ كَتِيرِينْ. وَ صَبَّوْا دِهِنْ فِي نَاسْ مَرْضَانِينْ كَتِيرِينْ وَ دَاوَوْهُمْ.
[14] وَ الْمَلِكْ هِرُودُسْ سِمِعْ خَبَرْ عِيسَى أَشَانْ فِي كُلَّ بَكَانْ النَّاسْ قَاعِدِينْ بِحَجُّوا بَيَّهْ. وَ وَاحِدِينْ بُقُولُوا «يَحْيَى الْمُغَطِّسْ بَعَثْ مِنْ أُسْط الْمَيْتِينْ. أَشَانْ دَا بَسْ، الْقُدْرَةْ الْعَجِيبَةْ دِي قَاعِدَةْ فَوْقَهْ».
[15] وَ نَاسْ آخَرِينْ بُقُولُوا «هُو النَّبِي إِلِيَاسْ قَبَّلْ». وَ بَتَّانْ آخَرِينْ بُقُولُوا «هُو نَبِي مِثِلْ أَنْبِيَاءْ هَنَا الزَّمَنْ الْفَاتْ».
[16] وَ وَكِتْ هِرُودُسْ سِمِعْ خَبَرَهْ، هُو قَالْ: دَا يَحْيَى الْمُغَطِّسْ. أَنَا قَطَعْت رَاسَهْ لَاكِنْ هُو بَعَثْ مِنْ أُسْط الْمَيْتِينْ.
[17] أَوَّلْ هِرُودُسْ رَسَّلْ عَسْكَرَهْ وَ كَرَبَوْا يَحْيَى وَ رَبَطَوْه وَ دَسَّوْه فِي السِّجِنْ. هِرُودُسْ كَرَبَهْ فِي شَانْ زَوْجِتَهْ هِرُودِيَّةْ. أَوَّلْ هِي مَرَةْ فِيلِبُّسْ أَخُوهْ لِهِرُودُسْ وَ بَعَدْ دَا، هِرُودُسْ ذَاتَهْ أَخَدَاهَا.
[18] وَ يَحْيَى قَالْ لِهِرُودُسْ «مَرَةْ أَخُوكْ مَا حَلَالْ لَيْك».
[19] وَ أَشَانْ دَا، هِرُودِيَّةْ مَا تِرِيدْ يَحْيَى وَ تِدَوْر تَكْتُلَهْ. لَاكِنْ مَا قِدْرَتْ تِسَوِّي فَوْقَهْ شَيْء فَسِلْ
[20] أَشَانْ هِرُودُسْ خَايِفْ مِنْ يَحْيَى. هُو عِرِفْ يَحْيَى نَادُمْ صَالِحْ وَ نَادُمْ هَنَا اللّٰهْ. وَ هُو قَاعِدْ يَحْفَضَهْ مِنْ كُلَّ شَيْء فَسِلْ. بِالصَّحِيحْ، كَلَامْ يَحْيَى بَرْجَلَهْ بِلْحَيْن لَاكِنْ هِرُودُسْ يِرِيدْ يَسْمَعَهْ كُلَ.
[21] وَ لَاكِنْ فِي الْأَخِيرْ، هِرُودِيَّةْ لِقَتْ فُرْصَةْ. فِي يَوْم حَوْل مَوْلِدْ هِرُودُسْ، هُو سَوَّى عَازُومَةْ وَ عَزَمْ جَمَاعْتَهْ وَ كُبَارَاتْ الْعَسْكَرْ و كُبَارَاتْ هَنَا دَارْ الْجَلِيلْ.
[22] وَ بِنَيَّةْ هِرُودِيَّةْ جَاتْ وَ لِعِبَتْ قِدَّامْهُمْ وَ هِرُودُسْ وَ ضِيفَانَهْ فَرْحَانِينْ بِلْحَيْن مِنْهَا. وَ الْمَلِكْ حَجَّى لِلْبِنَيَّةْ وَ قَالْ: أَطْلُبِي مِنِّي. نَنْطِيكِ أَيِّ شَيْء التِّدَوْرِيهْ.
[23] وَ حَلَفْ وَ قَالْ: أَيِّ شَيْء التِّدَوْرِيهْ مِنِّي نَنْطِيكِ لَحَدِّي نُصّ هَنَا مَمْلَكَتِي كُلَ.
[24] وَ الْبِنَيَّةْ مَرَقَتْ وَ سَأَلَتْ أَمَّهَا. وَ قَالَتْ: نَطْلُبْ مِنَّهْ شُنُو؟ وَ أَمَّهَا قَالَتْ: أَطْلُبِي رَاسْ هَنَا يَحْيَى الْمُغَطِّسْ.
[25] وَ عَجَلَةْ كَيْ هِي قَبَّلَتْ لِلْمَلِكْ وَ طَلَبَتْ وَ قَالَتْ: أَنْطِينِي رَاسْ هَنَا يَحْيَى الْمُغَطِّسْ وَ جِيبَهْ هِنِي عَجَلَةْ كَيْ فِي سُفْرَةْ.
[26] وَ الْمَلِكْ نِدِمْ نَدَامَةْ شَدِيدَةْ لِلْكَلَامْ الْقَالَهْ. لَاكِنْ بِسَبَبْ الْحَلِيفَةْ الْحَلَفْ بَيْهَا قِدَّامْ ضِيفَانَهْ، هُو مَا دَوَّرْ يَفْشُلْ فِي الْكَلَامْ الْقَالْ لَيْهَا.
[27] وَ عَجَلَةْ كَيْ الْمَلِكْ رَسَّلْ عَسْكَرِي وَ أَمَرَهْ أَشَانْ يِجِيبْ لَيَّهْ رَاسْ يَحْيَى. وَ الْعَسْكَرِي مَشَى وَ قَطَعْ رَاسْ يَحْيَى فِي لُبّ السِّجِنْ.
[28] وَ جَابْ رَاسَهْ فِي سُفْرَةْ وَ أَنْطَاهْ لِلْبِنَيَّةْ. وَ خَلَاصْ الْبِنَيَّةْ أَنْطَتَهْ لِأَمَّهَا.
[29] وَ وَكِتْ تَلَامِيذْ يَحْيَى سِمْعَوْا الْخَبَرْ دَا، هُمَّنْ جَوْا وَ شَالَوْا جَنَازْتَهْ و دَفَنَوْهَا.
[30] وَ الرُّسُلْ الْعِيسَى رَسَّلَاهُمْ قَبَّلَوْا وَ أَوْرَوْه بِكُلَّ شَيْء السَّوَّوْه وَ عَلَّمَوْه لِلنَّاسْ.
[31] وَ النَّاسْ الْجَايِّينْ لِعِيسَى بِقَوْا كَتِيرِينْ بِلْحَيْن لَحَدِّي عِيسَى وَ جَمَاعْتَهْ مَا قِدْرَوْا يَاكُلُوا كُلَ. وَ عِيسَى قَالْ لَيْهُمْ: تَعَالُوا مَعَايِ وِحَيْدكُو وَ نَمْشُوا فِي بَكَانْ مَا عِنْدَهْ نَاسْ وَ أَنْجَمُّوا شِيَّةْ.
[32] وَ قَمَّوْا مِنْ هِنَاكْ بِمَرْكَبَةْ وَ مَشَوْا وِحَيْدهُمْ فِي الْخَلَاءْ.
[33] وَ وَكِتْ مَاشِينْ، نَاسْ كَتِيرِينْ شَافَوْهُمْ وَ عِرِفَوْهُمْ. وَ نَاسْ مِنْ كُلَّ الْحِلَّالْ قَمَّوْا جَرَوْا لِلْبَكَانْ الْهُو يِدَوْر يَمْشِي فَوْقَهْ. وَ وِصْلَوْا قِدَّامَهْ.
[34] وَ وَكِتْ عِيسَى دَلَّى مِنْ الْمَرْكَبَةْ، هُو شَافْ نَاسْ كَتِيرِينْ بِلْحَيْن قَاعِدِينْ يَرْجَوْه. وَ هُو حَنَّ لَيْهُمْ أَشَانْ هُمَّنْ مِثِلْ غَنَمْ مَا عِنْدُهُمْ رَاعِي. وَ هُو بَدَأْ يِعَلِّمْهُمْ كَلَامْ كَتِيرْ.
[35] وَ فِي الْعَشِيَّةْ تَلَامِيذَهْ جَوْا لَيَّهْ وَ قَالَوْا: الْبَكَانْ دَا خَلَاءْ وَ الْمَغَرِبْ قَرِيبْ.
[36] خَلَاصْ خَلِّي النَّاسْ يَمْشُوا وَ يِشِتُّوا فِي الْحِلَّالْ وَ يِبِيعُوا لِنُفُوسْهُمْ أَكِلْ.
[37] وَ لَاكِنْ عِيسَى رَدَّ لَيْهُمْ وَ قَالْ: لَا. إِنْتُو بَسْ أَنْطُوهُمْ أَكِلْ. وَ قَالَوْا لَيَّهْ: هَايْ! تِدَوْر أَنِحْنَ نِأَكُّلُوا كُلَّ النَّاسْ دَوْل وَلَّا؟ تِدَوْر أَنِحْنَ نَمْشُوا نِبِيعُوا أَكِلْ هَنَا مِيتَيْن دِينَارْ وَلَّا؟
[38] وَ عِيسَى سَأَلَاهُمْ وَ قَالْ: عِنْدُكُو مَعَاكُو شُنُو هَنَا أَكِلْ؟ أَمْشُوا شِيفُوا. وَ شَافَوْا وَ قَالَوْا: عِنْدِنَا خَمْسَةْ خُبْزَةْ وَ حُوتْ إِتْنَيْن بَسْ.
[39] وَ عِيسَى أَمَرَاهُمْ كُلُّهُمْ أَشَانْ يِلِمُّوا فِي مَجْمُوعَاتْ وَ يَقْعُدُوا تِحِتْ فِي الْقَشّ الْأَخَضَرْ.
[40] وَ النَّاسْ قَعَدَوْا فِي مَجْمُوعَاتْ مِيَةْ مِيَةْ وَ خَمْسِينْ خَمْسِينْ.
[41] وَ عِيسَى شَالْ الْخُبْزَاتْ الْخَمْسَةْ وَ الْحُوتْ الْإِتْنَيْن. وَ رَفَعْ رَاسَهْ وَ شَافْ فَوْق فِي السَّمَاءْ. وَ شَكَرْ اللّٰهْ وَ كَسَّرْ الْخُبْزَاتْ وَ أَنْطَاهُمْ لِتَلَامِيذَهْ أَشَانْ يَنْطُوهُمْ لِلنَّاسْ وَ قَسَّمْ الْحَوْت كُلَ أَمْبَيْنَاتْهُمْ.
[42] وَ كُلَّ النَّاسْ أَكَلَوْا. وَ شِبْعَوْا لَحَدِّي فَضَّلَوْا.
[43] وَ التَّلَامِيذْ لَمَّوْا الْأَكِلْ الْفَضَّلْ مِنْ الْخُبْزَةْ وَ الْحُوتْ وَ مَلَوْا بَيَّهْ أَتْنَا عَشَرْ قُفَّةْ.
[44] وَ عَدَّدْ النَّاسْ الْأَكَلَوْا مِنْ الْخُبْزَةْ تَمَّ خَمْسَةْ أَلِفْ رَاجِلْ.
[45] وَ عَجَلَةْ كَيْ عِيسَى أَمَرَاهُمْ لِتَلَامِيذَهْ يَرْكَبَوْا فِي الْمَرْكَبَةْ أَشَانْ يَقْطَعَوْا الْبَحَرْ وَ يَمْشُوا قِدَّامَهْ فِي حِلَّةْ بَيْت صَيْدَا. وَ هُو ذَاتَهْ قَعَدْ فِي خَشُمْ الْبَحَرْ أَشَانْ يُقُولْ لِلنَّاسْ خَلِّي يَمْشُوا.
[46] وَ وَكِتْ هُو سَلَّمْ النَّاسْ خَلَاصْ، هُو طَلَعْ فِي رَاسْ الْحَجَرْ أَشَانْ يِصَلِّي.
[47] وَ بَعَدْ الْمَغَرِبْ الْمَرْكَبَةْ قَاعِدَةْ فِي أُسْط الْبَحَرْ وَ عِيسَى قَاعِدْ وِحَيْدَهْ فِي الْحَجَرْ.
[48] وَ هُو شَافْ كَدَرْ هُمَّنْ مَاشِينْ قِدَّامْ بِتَعَبْ أَشَانْ الرِّيحْ قَاعِدَةْ تُسُوقْ مِنْ قِدَّامْهُمْ. وَ بِوَرَدَّيْ عِيسَى جَاءْ لَيْهُمْ رَايِغْ فِي رَاسْ الْأَلْمِي. وَ هُو دَوَّرْ يِبَارِيهُمْ وَ يُفُوتْ.
[49] لَاكِنْ هُمَّنْ شَافَوْه رَايِغْ فِي رَاسْ الْأَلْمِي وَ فِي فِكِرْهُمْ شَافَوْا دُلّ هَنَا نَادُمْ وَ صَرَخَوْا.
[50] كُلُّهُمْ شَافَوْه وَ خَافَوْا خَوْف شَدِيدْ. وَ عَجَلَةْ كَيْ هُو حَجَّى لَيْهُمْ وَ قَالْ: شِدُّوا حَيْلكُو. دَا أَنَا. مَا تَخَافَوْا.
[51] وَ عِيسَى رِكِبْ فِي الْمَرْكَبَةْ وَ خَلَاصْ الرِّيحْ وِقْفَتْ. وَ هُمَّنْ أَسْتَغْرَبَوْا مَرَّةْ وَاحِدْ.
[52] أَوَّلْ هُمَّنْ شَافَوْا عِيسَى يِزِيدْ الْخُبْزَةْ لَاكِنْ مَا فِهْمَوْا مَعَنَاتَهْ. أَشَانْ قُلُوبْهُمْ مُقَفَّلِينْ.
[53] وَ وَكِتْ قَطَعَوْا الْبَحَرْ خَلَاصْ، نَزَلَوْا فِي دَارْ جِنِّسَارَتْ وَ رَبَطَوْا الْمَرْكَبَةْ فِي خَشُمْ الْبَحَرْ.
[54] وَ وَكِتْ دَلَّوْا مِنْ الْمَرْكَبَةْ، النَّاسْ عَجَلَةْ كَيْ عِرِفَوْا عِيسَى.
[55] وَ عَجَلَةْ كَيْ قَمَّوْا يِنَادُوا أَخْوَانْهُمْ مِنْ أَيِّ بَكَانْ فِي دَارْهُمْ. وَ بَدَوْا يِجِيبُوا لَيَّهْ الْمَرْضَانِينْ شَايِلِنْهُمْ فِي فُرَاشْهُمْ فِي أَيِّ بَكَانْ السِّمْعَوْا كَدَرْ هُو قَاعِدْ فَوْقَهْ.
[56] وَ أَيِّ بَكَانْ الْمَشَى فَوْقَهْ، كَانْ حِلَّةْ وَلَّا مَدِينَةْ وَلَّا فِي الْكَدَادَةْ، كُلَّ النَّاسْ يِجِيبُوا لَيَّهْ الْمَرْضَانِينْ وَ يُخُطُّوهُمْ فِي الْأَسْوَاقْ وَ يَشْحَدَوْه لِعِيسَى أَشَانْ الْمَرْضَانِينْ يِقَرُّبُوا لَيَّهْ أَكُونْ يَلْمَسَوْا طَرَفْ خَلَقَهْ. وَ كُلَّ نَادُمْ اللِّمِسَهْ لِقِي الْعَافَيْ.