[1] وَ يَوْم السَّبِتْ كَمَّلْ فِي الْمَغَرِبْ و مَرِيَمْ الْمَجْدَلِيَّةْ وَ سَلُومَةْ وَ مَرِيَمْ أَمّ يَعْقُوبْ مَرَقَنْ وَ شَرَنْ رِيحَةْ أَشَانْ يُصُبَّنْهَا فِي جَنَازَةْ عِيسَى.
[2] وَ أَوَّلْ يَوْم الْأُسْبُوعْ، بَكَّرَنْ فَجُرْ بَدْرِي وَ وَصَلَنْ فِي بَكَانْ الْقَبُرْ وَكِتْ الْحَرَّايْ دَهَابْهَا مَرَقَتْ.
[3] وَ قَاعِدِينْ يِحَجُّوا أَمْبَيْنَاتْهُمْ وَ يُقُولُوا: يَاتُو الْيِدَرْدِقْ لَيْنَا الْحَجَرْ مِنْ خَشُمْ الْقَبُرْ؟
[4] وَ رَفَعَنْ رُوسَيْنهِنْ وَ شَافَنْ الْحَجَرْ مُدَرْدَقْ مِنْ خَشُمْ الْقَبُرْ خَلَاصْ. وَ الْحَجَرْ دَا كَبِيرْ بِلْحَيْن.
[5] وَ دَخَلَنْ فِي الْقَبُرْ وَ شَافَنْ مَلَكْ صُورْتَهْ مِثِلْ صَبِي لَابِسْ خَلَقْ أَبْيَضْ قَاعِدْ تِحِتْ فِي نُصِّهِنْ الزَّيْنَايْ. وَ بَرْجَلَنْ مَرَّةْ وَاحِدْ.
[6] وَ قَالْ لَيْهِنْ: مَا تِبَرْجُلَنْ. إِنْتَنْ قَاعِدَاتْ تِفَتُّشُوا عِيسَى الْمِنْ النَّاصِرَةْ الْكَتَلَوْه فِي الصَّلِيبْ. هُو بَعَثْ خَلَاصْ. هُو هِنِي مَا فِيهْ. شِيفَنْ الْبَكَانْ الْأَوَّلْ رَقَّدَوْه فَوْقَهْ.
[7] وَ هَسَّعْ أَمْشَنْ لِتَلَامِيذَهْ وَ خَاصَّةً لِبُطْرُسْ وَ قُولَنْ لَيْهُمْ «عِيسَى مَاشِي قِدَّامْكُو فِي دَارْ الْجَلِيلْ وَ هِنَاكْ تِشِيفُوهْ مِثِلْ هُو أَوَّلْ قَالَهْ لَيْكُو».
[8] وَ الْعَوِينْ مَرَقَنْ مِنْ الْقَبُرْ وَ جَرَنْ. وَ هِنَّ قَاعِدَاتْ يَرْجِفَنْ مِنْ الْعَجَبْ وَ الْخَوْف. وَ مَا حَجَّنْ بَيَّهْ لِأَيِّ نَادُمْ أَشَانْ هِنَّ خَايْفَاتْ.
[9] وَ عِيسَى بَعَثْ فَحُرْ بَدْرِي فِي يَوْم الْأَحَدْ. وَ هُو بَانْ أَوَّلْ لِمَرِيَمْ الْمَجْدَلِيَّةْ وَ دِي الْمَرَةْ الْأَوَّلْ عِيسَى طَرَدْ مِنْهَا سَبْعَةْ شَوَاطِينْ.
[10] وَ هِي قَمَّتْ وَ حَجَّتْ بَيَّهْ لِرُفْقَانَهْ. وَ هُمَّنْ حَزْنَانِينْ وَ قَاعِدِينْ يَبْكُوا لَيَّهْ.
[11] وَ هِي أَوْرَتْهُمْ كَدَرْ عِيسَى حَيّ وَ هِي شَافَتَهْ وَ لَاكِنْ هُمَّنْ أَبَوْا مَا صَدَّقَوْا كَلَامْهَا.
[12] وَ بَعَدْ دَا، نَاسَيْن مِنْ التَّلَامِيذْ مَاشِينْ فِي الْكَدَادَةْ وَ عِيسَى بَانْ لَيْهُمْ صُورْتَهْ شِقْ.
[13] وَ هُمَّنْ قَبَّلَوْا فِي الْمَدِينَةْ وَ أَوْرَوْا بَيَّهْ التَّلَامِيذْ الْآخَرِينْ لَاكِنْ الْآخَرِينْ دَوْل مَا صَدَّقَوْا بِكَلَامْهُمْ.
[14] وَ بَعَدَيْن عِيسَى بَانْ لِلتَّلَامِيذْ الْإِحْدَا عَشَرْ وَكِتْ هُمَّنْ قَاعِدِينْ يَاكُلُوا. وَ هُو هَرَجَاهُمْ أَشَانْ مَا آمَنَوْا وَ قَوَّوْا رُوسَيْنهُمْ قَوِي وَ أَبَوْا مَا صَدَّقَوْا كَلَامْ النَّاسْ الشَّافَوْه بَعَدْ هُو بَعَثْ.
[15] وَ قَالْ لَيْهُمْ: أَمْشُوا فِي كُلَّ الْأَرْض وَ بَلُّغُوا الْبِشَارَةْ لِكُلَّ النَّاسْ فِي كُلَّ بَكَانْ.
[16] وَ أَيِّ نَادُمْ الْيِآمِنْ بَيِّ وَ يِغَطُّسُوهْ، يَنْجَى. وَ أَيِّ نَادُمْ الْمَا يِآمِنْ بَيِّ، اللّٰهْ يِعَاقِبَهْ.
[17] وَ الْمُؤْمِنِينْ يَلْقَوْا قُدْرَةْ أَشَانْ يِسَوُّوا عَجَايِبْ. يَطُرْدُوا بِأُسْمِي الشَّوَاطِينْ وَ يِحَجُّوا بِلُغَّاتْ جُدَادْ.
[18] وَ يَكُرْبُوا دَبَايِبْ وَ كَانْ يَشَرْبَوْا شُرَابْ الْعِنْدَهْ سَمّ، مَا يِسَوِّي لَيْهُمْ شَيْء فَسِلْ. وَ يُخُطُّوا إِيدَيْنهُمْ فَوْق الْمَرْضَانِينْ وَ الْمَرْضَانِينْ يَلْقَوْا الْعَافَيْ.
[19] وَ بَعَدْ الرَّبّ عِيسَى كَلَّمْ لَيْهُمْ، هُو أَنْرَفَعْ فِي السَّمَاوَاتْ وَ قَعَدْ فِي كُرْسِي جَنْب اللّٰهْ فِي نُصَّهْ الزَّيْنَايْ.
[20] وَ تَلَامِيذَهْ مَشَوْا وَ بَلَّغَوْا الْبِشَارَةْ لِلنَّاسْ فِي أَيِّ بَكَانْ. وَ الرَّبّ عَاوَنَاهُمْ وَ أَنْطَاهُمْ عَجَايِبْ أَشَانْ يِثَبِّتْ الْبِشَارَةْ الْهُمَّنْ قَاعِدِينْ يِبَلُّغُوهَا. آمِينْ.