[1] وَ عِيسَى أَنْدَسَّ بَتَّانْ فِي بَيْت الصَّلَاةْ. وَ نَادُمْ وَاحِدْ إِيدَهْ مَيْتَةْ قَاعِدْ دَاخَلْ.
[2] وَ نَاسْ وَاحِدِينْ خَطَّوْا بَالْهُمْ فِي عِيسَى أَشَانْ يِدَوْرُوا يِشِيفُوا كَانْ هُو يِدَاوِيهْ وَلَّا. وَ فِي فِكِرْهُمْ كَانْ هُو يِدَاوِي نَادُمْ فِي يَوْم السَّبِتْ دَا، يَبْقَى لَيْهُمْ فُرْصَةْ أَشَانْ يُخُطُّوا فَوْقَهْ تُهْمَةْ.
[3] وَ عِيسَى حَجَّى لِلرَّاجِلْ الْإِيدَهْ مَيْتَةْ وَ قَالْ: قُمّ فَوْق قِدَّامْ النَّاسْ.
[4] وَ عِيسَى سَأَلَاهُمْ وَ قَالْ: شُنُو الْحَلَالْ فِي يَوْم السَّبِتْ؟ الْخَيْر وَلَّا الشَّرّ؟ حَلَالْ لَيْنَا نِنَجُّوا النَّاسْ وَلَّا نَكْتُلُوهُمْ؟ وَ هُمَّنْ مَا رَدَّوْا لَيَّهْ شَيْء.
[5] وَ هُو أَلَّفَّتْ وَ شَافْ قُوَّةْ رُوسَيْنهُمْ وَ دَا بِقِي لَيَّهْ قَاسِي بِلْحَيْن وَ هُو زِعِلْ مِنْهُمْ. وَ حَجَّى لِلرَّاجِلْ وَ قَالْ: مِدّ إِيدَكْ. وَ الرَّاجِلْ مَدَّاهَا وَ خَلَاصْ إِيدَهْ حِيَتْ.
[6] وَ عَجَلَةْ كَيْ الْفَرِيسِيِّينْ مَرَقَوْا وَ أَشَّاوَرَوْا مَعَ نَاسْ هَنَا حِزِبْ هِرُودُسْ فِي شَانْ كِكَّيْف يَكْتُلُوا عِيسَى.
[7] وَ عِيسَى قَمَّ مَعَ تَلَامِيذَهْ وَ مَشَى في خشم الْبَحَرْ. وَ نَاسْ كَتِيرِينْ بِلْحَيْن مِنْ دَارْ الْجَلِيلْ تَابَعَوْه. وَ فِي نَاسْ مِنْ دَارْ الْيَهُودِيَّةْ كُلَ
[8] وَ مِنْ مَدِينَةْ الْقُدُسْ وَ بَلَدْ أَدُومِيَةْ وَ الْبُلْدَانْ الْغَادِي لِبَحَرْ الْأُرْدُنْ وَ مِنْ تُرَابْ هَنَا صُورْ وَ صَيْدَا. وَ النَّاسْ دَوْل جَوْا لَيَّهْ أَشَانْ سِمْعَوْا خَبَرْ هَنَا الشَّيْء الْعِيسَى قَاعِدْ يِسَوِّيهْ. وَ عَدَدْ النَّاسْ بِقِي كَتِيرْ بِلْحَيْن.
[9] وَ عِيسَى أَمَرَاهُمْ لِتَلَامِيذَهْ لِيِجَهُّزُوا لَيَّهْ مَرْكَبَةْ أَشَانْ النَّاسْ يَمْرُقْ مِنْ الْمُعَاصَرَةْ.
[10] وَ عِيسَى دَاوَى نَاسْ مَرْضَانِينْ كَتِيرِينْ وَ أَشَانْ دَا، كُلَّ النَّاسْ الْمَرْضَانِينْ يِلْعَاصَرَوْا وَ يِدَوْرُوا يَلْحَقَوْه وَ يَلْمَسَوْه.
[11] وَ أَيِّ نَادُمْ الْعِنْدَهْ شَيْطَانْ سَجَدْ قِدَّامَهْ وَكِتْ شَافْ عِيسَى. وَ كُلَّ الشَّوَاطِينْ عَاطَوْا وَ قَالَوْا «إِنْتَ بَسْ إِبْن اللّٰهْ».
[12] وَ عِيسَى أَمَرَاهُمْ أَشَانْ مَا يِأَوْرُوا النَّاسْ هُو يَاتُو.
[13] وَ عِيسَى رِكِبْ فِي الْحَجَرْ وَ نَادَى النَّاسْ الْهُو يِدَوْرهُمْ وَ هُمَّنْ مَشَوْا لَيَّهْ.
[14] وَ إِخْتَارْ مِنْهُمْ أَتْنَا عَشَرْ رُجَالْ أَشَانْ يِرَافُقُوهْ. وَ هُو جَعَلَاهُمْ رُسُلْ. دَوْل النَّاسْ الْهُو رَسَّلَاهُمْ لِيِبَلُّغُوا الْبِشَارَةْ.
[15] وَ أَنْطَاهُمْ قُدْرَةْ أَشَانْ يَطُرْدُوا الشَّوَاطِينْ.
[16] وَ الْأَتْنَا عَشَرْ دَوْل هُمَّنْ سِمْعَانْ الْعِيسَى سَمَّاهْ بُطْرُسْ
[17] وَ يَعْقُوبْ وِلَيْد زَبَدِي وَ يُوحَنَّا أَخُوهْ لِيَعْقُوبْ الْعِيسَى سَمَّى أَوْلَادْ زَبَدِي دَوْل «بُوَانْ أَرْجِسْ» مَعَنَاتَهْ أَوْلَادْ الدَّقْدَاقْ.
[18] وَ إِخْتَارْ أَنْدَرَيَّسْ وَ فِلِبُّسْ وَ بَرْتُلْمَا وَ مَتَّى وَ تُومَا وَ يَعْقُوبْ وِلَيْد حَلْفَا وَ تَدَّايَا وَ سِمْعَانْ الثَّاوْرِي
[19] وَ يَهُوذَا الْإِسْخَرِيَوْطِي النَّادُمْ الْخَانْ عِيسَى.
[20] وَ عِيسَى مَشَى الْبَيْت. وَ بَتَّانْ نَاسْ كَتِيرِينْ بِلْحَيْن مَشَوْا لَيَّهْ لَحَدِّي عِيسَى وَ جَمَاعْتَهْ مَا لِقَوْا فَرَقَةْ يَاكُلُوا كُلَ.
[21] وَ أَخْوَانْ عِيسَى سِمْعَوْا الْخَبَرْ دَا وَ قَمَّوْا لِيَكُرْبُوهْ. وَ قَاعِدِينْ بُقُولُوا «هُو رَاسَهْ لَفَّ خَلَاصْ».
[22] وَ الْعُلَمَاءْ الْجَوْا مِنْ الْقُدُسْ قَالَوْا: أَكِيدْ هُو مُشَوْطِنْ. إِبْلِيسْ كَرَبَهْ. هُو قَاعِدْ يَطْرُدْ الشَّوَاطِينْ بِقُدْرَةْ هَنَا كَبِيرْ الشَّوَاطِينْ.
[23] وَ عِيسَى نَادَاهُمْ وَ حَجَّى لَيْهُمْ بِأَمْثَالْ وَ قَالْ: كِكَّيْف الشَّيْطَانْ يَطْرُدْ الشَّيْطَانْ؟
[24] وَ كَانْ نَاسْ هَنَا مَمْلَكَةْ بِدَّاوَسَوْا أَمْبَيْنَاتْهُمْ، الْمَمْلَكَةْ دِي مَا تَقْدَرْ تَقْعُدْ ثَابْتَةْ.
[25] وَ كَانْ نَاسْ هَنَا بَيْت وَاحِدْ بِنْفَرْقُوا وَ بِدَّاوَسَوْا أَمْبَيْنَاتْهُمْ، الْبَيْت مَا يَقْعُدْ ثَابِتْ.
[26] وَ كَانْ الشَّيْطَانْ قَمَّ يِدَاوِسْ نَفْسَهْ، مَمْلَكَتَهْ تِنْفَرِقْ وَ هُو مَا يَقْدَرْ يَقْعُدْ ثَابِتْ وَ خَلَاصْ مَمْلَكَتَهْ تِكَمِّلْ عَجَلَةْ.
[27] وَ بِمَثَلْ آخَرْ نِفَسِّرْ لَيْكُو كِكَّيْف نَطْرُدْ الشَّوَاطِينْ. مَا فِي نَادُمْ الْيَدْخُلْ فِي بَيْت النَّادُمْ القَّوِي وَ يَسْرِقْ خُمَامَهْ إِلَّا كَانْ أَوَّلْ رَبَطْ الرَّاجِلْ الْقَوِي. وَ كَانْ رَبَطَهْ خَلَاصْ، أَكِيدْ يَقْدَرْ يِشِيلْ كُلَّ خُمَامَهْ.
[28] و نُقُولْ لَيْكُو الْحَقّ: اللّٰهْ يَسَامِحْ لِلنَّاسْ كُلَّ ذُنُوبْهُمْ وَ كُلَّ كَلَامْ الْكُفُرْ الْبُقُولُوهْ
[29] لَاكِنْ كَانْ أَيِّ نَادُمْ يِحَجِّي كَلَامْ كُفُرْ فِي الرُّوحْ الْقُدُّوسْ، الذَّنِبْ دَا أَبَداً مَا يِنْغَفِرْ. هُو بِقِي خَاطِي بِذَنِبْ الْيَقْعُدْ فِي رَاسَهْ إِلَى الْأَبَدْ.
[30] وَ عِيسَى قَالْ الْكَلَامْ دَا أَشَانْ قَالَوْا هُو عِنْدَهْ شَيْطَانْ.
[31] وَ أَمَّهْ لِعِيسَى وَ أَخْوَانَهْ مَشَوْا لَيَّهْ. وَ وِقْفَوْا بَرَّا مِنْ الْبَيْت. وَ رَسَّلَوْا نَادُمْ أَشَانْ يِنَادِيهْ.
[32] وَ نَاسْ كَتِيرِينْ قَاعِدِينْ مَعَ عِيسَى وَ هُو قَاعِدْ فِي أُسُطْهُمْ. وَ قَالَوْا لَيَّهْ: أَمَّكْ وَ أَخْوَانَكْ قَاعِدِينْ بَرَّا بِنَادُوكْ.
[33] وَ رَدَّ لَيْهُمْ وَ قَالْ: أَمِّي وَيْن؟ وَ أَخْوَانِي وَيْن؟
[34] وَ أَلَّفَّتْ لِلنَّاسْ الْقَاعِدِينْ مَعَايَهْ وَ قَالْ: شِيفُوا دَوْل هُمَّنْ أَمِّي وَ أَخْوَانِي.
[35] وَ أَيِّ نَادُمْ الْبِسَوِّي مُرَادَاتْ اللّٰهْ، هُو بَسْ الْيَبْقَى أَخُوِي وَلَّا أَخْتِي وَلَّا أَمِّي.