[1] وَ عِيسَى وَ تَلَامِيذَهْ قَرَّبَوْا لِمَدِينَةْ الْقُدُسْ وَ لِحْقَوْا الْحِلَّالْ بَيْت فَاجِي وَ بَيْت عَنْيَا الْفِي جَبَلْ الزَّيْتُونْ. وَ عِيسَى رَسَّلْ قِدَّامَهْ تَلَامِيذْ إِتْنَيْن
[2] وَ قَالْ لَيْهُمْ: أَمْشُوا فِي الْحِلَّةْ الْقِدَّامْنَا دِي. وَ فِي خَشُمْ الْحِلَّةْ تَلْقَوْا دَحَشْ وَاحِدْ مَرْبُوطْ. وَ الدَّحَشْ دَا نَادُمْ لِسَّاعْ مَا رِكِبْ فَوْقَهْ. وَ حِلُّوهْ وَ جِيبُوهْ لَيِّ هِنِي.
[3] وَ كَانْ نَادُمْ يَسْأَلْكُو وَ يُقُولْ «مَالَا إِنْتُو قَاعِدِينْ تِحِلُّوا الدَّحَشْ؟» قُولُوا لَيَّهْ «الرَّبّ يِدَوْرَهْ وَ يِقَبِّلَهْ طَوَّالِي».
[4] وَ مَشَوْا وَ لِقَوْا دَحَشْ فِي الشَّارِعْ مَرْبُوطْ قِدَّامْ بَيْت وَاحِدْ. وَ حَلَّوْه.
[5] وَ النَّاسْ الْقَاعِدِينْ هِنَاكْ سَأَلَوْهُمْ وَ قَالَوْا: قَاعِدِينْ تِسَوُّوا شُنُو؟ مَالَا حَلَّيْتُوا الدَّحَشْ؟
[6] وَ رَدَّوْا لَيْهُمْ بِالْكَلَامْ الْعِيسَى قَالَهْ لَيْهُمْ وَ خَلَاصْ خَلَّوْهُمْ مَشَوْا بِالدَّحَشْ.
[7] وَ جَابَوْه لِعِيسَى. وَ فَرَّشَوْا خُلْقَانْهُمْ فَوْق الدَّحَشْ وَ عِيسَى رِكِبْ فَوْقَهْ.
[8] وَ نَاسْ كَتِيرِينْ قَمَّوْا سَوَّوْا زِينَةْ لِلشَّارِعْ الْعِيسَى جَايِ فَوْقَهْ. وَاحِدِينْ فَرَّشَوْا فَوْقَهْ خُلْقَانْهُمْ وَ نَاسْ آخَرِينْ قَطَعَوْا وَرْشَالْ مِنْ الشَّدَرْ وَ فَرَّشَوْه في التُّرَابْ.
[9] وَ النَّاسْ الْجَايِينْ مَعَ عِيسَى قِدَّامَهْ وَ وَرَايَهْ كُلُّهُمْ شَكَرَوْا اللّٰهْ بِحِسّ عَالِي وَ قَالَوْا: اللّٰهْ يَنْصُرَهْ. مَبْرُوكْ لِلْجَايِ بِأُسُمْ اللّٰهْ.
[10] مَمْلَكَةْ جِدِّنَا دَاوُدْ جَايَةْ وَ الْحَمْدُ لِلّٰهْ. سُبْحَانْ اللّٰهْ وَ تَعَالَى.
[11] وَ عِيسَى دَخَلْ فِي مَدِينَةْ الْقُدُسْ وَ دَخَلْ فِي بَيْت اللّٰهْ وَ شَافْ كُلَّ شَيْء الْقَاعِدْ فَوْقَهْ. وَ الْوَطَى أَخَّرَتْ وَ أَشَانْ دَا، هُو مَرَقْ مِنْ الْمَدِينَةْ وَ مَشَى فِي حِلَّةْ بَيْت عَنْيَا مَعَ تَلَامِيذَهْ الْأَتْنَا عَشَرْ.
[12] وَ أَمْبَاكِرْ عِيسَى وَ تَلَامِيذَهْ جَايِينْ مِنْ حِلَّةْ بَيْت عَنْيَا وَ عِيسَى جِيعَانْ.
[13] وَ شَافْ قِدَّامَهْ شِيَّةْ بَعِيدْ شَدَرَةْ هنا التِّينْ مَلَانَةْ وَرْشَالْ. وَ مَشَى لَيْهَا أَشَانْ يَقْطَعْ مِنْهَا عِيَالْ. لَاكِنْ وَكِتْ لِحِقْهَا مَا لِقِي فَوْقهَا تِينْ، إِلَّا الْوَرْشَالْ بَسْ أَشَانْ وَكْتَهْ لِسَّاعْ مَا تَمَّ.
[14] وَ عِيسَى حَجَّى لِلشَّدَرَةْ وَ قَالْ: أَبَداً مَا يَاكُلُوا مِنْكِ بَتَّانْ. وَ تَلَامِيذَهْ سِمْعَوْا كَلَامَهْ.
[15] وَ وَصَلَوْا فِي مَدِينَةْ الْقُدُسْ وَ عِيسَى دَخَلْ فِي بَيْت اللّٰهْ وَ قَمَّ يَطْرُدْ كُلَّ النَّاسْ الْقَاعِدِينْ بِسَاوُقُوا فِي الْحَوْش. وَ شَقْلَبْ طَرَابِيزْ النَّاسْ الْبِبَدُّلُوا قُرُسْ وَ بَنْبَرْ النَّاسْ الْبِسَاوُقُوا حَمَامْ.
[16] وَ فِي نَاسْ شَايْلِينْ خُمَامْهُمْ الْيِدَوْرُوا يُشُقُّوا حَوْش بَيْت اللّٰهْ وَ عِيسَى دَحَرَاهُمْ.
[17] وَ عِيسَى عَلَّمْ النَّاسْ وَ قَالْ: فِي الْكِتَابْ اللّٰهْ قَالْ <بَيْتِي بِنَادُوهْ بَيْت هَنَا الصَّلَاةْ لِكُلَّ الْأُمَمْ>. وَ لَاكِنْ إِنْتُو <سَوَّيْتُوهْ بَيْت هَنَا سَرَارِيقْ>.
[18] وَ كُبَارَاتْ رُجَالْ الدِّينْ وَ الْعُلَمَاءْ سِمْعَوْا كَلَامَهْ وَ بَدَوْا يِشَاوُرُوا كِكَّيْف يَكْتُلُوهْ. وَ هُمَّنْ خَايْفِينْ مِنَّهْ أَشَانْ كُلَّ النَّاسْ قَاعِدِينْ يَسْمَعَوْا كَلَامَهْ وَ تَعْلِيمَهْ عَجَبَاهُمْ مَرَّةْ وَاحِدْ.
[19] وَ فِي الْمَغَرِبْ عِيسَى وَ تَلَامِيذَهْ مَرَقَوْا مِنْ الْمَدِينَةْ.
[20] وَ أَمْبَاكِرْ فَجُرْ هُمَّنْ مَاشِينْ فِي الدَّرِبْ وَ شَافَوْا بَتَّانْ شَدَرَةْ التِّينْ. وَ هِي مَيْتَةْ وَ يِبْسَتْ مَرَّةْ وَاحِدْ لَحَدِّي عِرِقْهَا.
[21] وَ بُطْرُسْ فَكَّرْ فِي الْكَلَامْ الْعِيسَى قَالَهْ. وَ حَجَّى لَيَّهْ وَ قَالْ: سَيِّدْنَا، شِيفْ. الشَّدَرَةْ الْإِنْتَ نَعَلْتَهَا يِبْسَتْ.
[22] وَ عِيسَى رَدَّ لَيْهُمْ وَ قَالْ: آمُنُوا بِاللّٰهْ بِإِيمَانْ قَوِي.
[23] نُقُولْ لَيْكُو الْحَقّ، أَيِّ نَادُمْ الْيَامُرَهْ لِلْجَبَلْ دَا وَ يُقُولْ «أَمْرُقْ مِنْ هِنِي وَ أَقَعْ فِي الْبَحَرْ» دَا بَسْ يَبْقَى، كَانْ هُو مَا شَكَّكْ فِي قَلْبَهْ وَ صَدَّقْ بِنِيَّةْ وَاحِدَةْ كَدَرْ الشَّيْء الْهُو قَالَهْ دَا يُكُونْ.
[24] أَشَانْ دَا، نُقُولْ لَيْكُو أَيِّ شَيْء التَّسْأَلَوْه مِنْ اللّٰهْ صَدُّقُوا كَدَرْ لِقِيتُوهْ خَلَاصْ وَ تَلْقَوْه.
[25] وَ أَيِّ وَكِتْ تِدَوْرُوا تِصَلُّوا، سَامُحُوا أَيِّ نَادُمْ الْخِطِئْ فَوْقكُو أَشَانْ أَبُوكُو اللّٰهْ كَمَانْ يِسَامِحْ لَيْكُو خَطَايَاكُو.
[26] وَ كَانْ إِنْتُو مَا سَامَحْتُوا النَّاسْ الْخِطَوْا فَوْقكُو، أَبُوكُو اللّٰهْ مَا يِسَامِحْ لَيْكُو خَطَايَاكُو.
[27] وَ عِيسَى وَ تَلَامِيذَهْ وَصَلَوْا بَتَّانْ فِي مَدِينَةْ الْقُدُسْ. وَ وَكِتْ عِيسَى رَايِغْ فِي حَوْش بَيْت اللّٰهْ، كُبَارَاتْ رُجَالْ الدِّينْ وَ الْعُلَمَاءْ وَ الشُّيُوخْ جَوْا لَيَّهْ.
[28] وَ سَأَلَوْه وَ قَالَوْا: طَرَدْت التُّجَّارْ بِإِذِنْ يَاتُو؟ وَ يَاتُو الْأَنْطَاكْ الْإِذِنْ؟
[29] وَ عِيسَى رَدَّ لَيْهُمْ وَ قَالْ: وَ أَنَا عِنْدِي سُؤَالْ نَسْأَلْكُو. رُدُّوا لَيِّ وَ أَنَا نُقُولْ لَيْكُو يَاتُو الْأَنْطَانِي إِذِنْ أَشَانْ نِسَوِّي الْخِدْمَةْ دِي.
[30] يَحْيَى غَطَّسْ النَّاسْ بِإِذِنْ اللّٰهْ وَلَّا بِإِذِنْ النَّاسْ؟ رُدُّوا لَيِّ.
[31] وَ أَشَّاوَرَوْا أَمْبَيْنَاتْهُمْ وَ قَالَوْا: كَانْ قُلْنَا يَحْيَى عِنْدَهْ إِذِنْ مِنْ اللّٰهْ، عِيسَى يُقُولْ لَيْنَا «وَ مَالَا مَا آمَنْتُوا بَيَّهْ؟».
[32] لَاكِنْ مَا نَقْدَرَوْا نُقُولُوا عِنْدَهْ إِذِنْ مِنْ النَّاسْ. وَ حَجَّوْا مِثِلْ دَا أَشَانْ هُمَّنْ خَايْفِينْ مِنْ الشَّعَبْ وَ مَا دَوَّرَوْا يِزَعُّلُوهُمْ. أَشَانْ فِي فِكِرْ كُلَّ الشَّعَبْ، أَكِيدْ يَحْيَى نَبِي.
[33] وَ أَشَانْ دَا، رَدَّوْا لِعِيسَى وَ قَالَوْا: دَا مَا نَعَرْفُوهْ. وَ عِيسَى رَدَّ لَيْهُمْ وَ قَالْ: خَلَاصْ، أَنَا كُلَ مَا نِأَوْرِيكُو يَاتُو الْأَنْطَانِي إِذِنْ أَشَانْ نِسَوِّي الْخِدْمَةْ دِي.