[1] أَقْعُدُوا ثَابْتِينْ فِي الْمَحَبَّةْ الْأَخَوِيَّةْ.
[2] مَا تِخَلُّوا مِنْكُو فَضِّلِينْ الضِّيْفَانْ الْيَجُوكُو. تَعَرْفُوا كَدَرْ نَاسْ وَاحِدِينْ ضَيَّفَوْا مَلَائِكَةْ وَ مَا عِرِفَوْهُمْ.
[3] فَكُّرُوا فِي أَخْوَانْكُو الْقَاعِدِينْ فِي السِّجِنْ وَ أَجْعَلَوْا نَفِسْكُو مِثِلْ قَاعِدِينْ مَعَاهُمْ. وَ أَخْوَانْكُو الْقَاعِدِينْ يَحْمَلَوْا التَّعَبْ، فَكُّرُوا فَوْقهُمْ أَشَانْ جِسِمْهُمْ مِثِلْ جِسِمْكُو.
[4] كُلُّكُو إِحْتَرُمُوا الْأَخِيدَةْ. مَا تِخَلُّوا الزِّنَى يِنَجِّسْ سَرَايِرْكُو الزَوْجِيَةْ أَشَانْ تَعَرْفُوا كَدَرْ اللّٰهْ يِحَاسِبْ كُلَّ الزَّنَّايِينْ، كَانْ مَاخْدِينْ وَلَّا مَا مَاخْدِينْ.
[5] أَنْقَرْعُوا مِنْ حُبّ الْمَالْ وَ أَبْقَوْا رَضْيَانِينْ بِالْعِنْدُكُو أَشَانْ اللّٰهْ قَالْ <أَبَداً مَا نِخَلِّيكْ وَ مَا نَنْسَاكْ>.
[6] أَشَانْ دَا، كُلِّنَا نَقْدَرَوْا نُقُولُوا بَلَا شَكَكْ <الْيِسَاعِدْنِي هُو اللّٰهْ. أَشَانْ دَا، مَا نَخَافْ. الْإِنْسَانْ يَقْدَرْ يِسَوِّي لَيِّ شُنُو؟>.
[7] فَكُّرُوا عَدِيلْ فِي كُبَارَاتْكُو الْأَوَّلْ بَلَّغَوْا لَيْكُو كَلَامْ اللّٰهْ. فَكُّرُوا فِي حَالْهُمْ، فِي الْحَيَاةْ وَ فِي الْمَوْت. خَلِّي إِيمَانْكُو يَبْقَى مِثِلْ إِيمَانْهُمْ.
[8] عِيسَى الْمَسِيحْ أَبَداً مَا يِلْغَيِّرْ. هُو قَاعِدْ مِنْ أَوَّلْ وَ الْيَوْم وَ إِلَى الْأَبَدْ.
[9] مَا تِخَلُّوا النَّاسْ الْجَايِينْ بِتَعَالِيمْ عَجِيبِينْ أَوْ شِقْ شِقْ يِوَدُّوكُو فِي دَرِبْ آخَرْ. أَخَيْر قَلِبْ الْإِنْسَانْ يَلْقَى قُدْرَةْ مِنْ نِعْمَةْ اللّٰهْ بَسْ وَ مَا مِنْ الْأَكِلْ الْخَاصّ. وَ النَّاسْ التَّابَعَوْا التَّعْلِيمْ دَا، مَا لِقَوْا مِنَّهْ فَايْدَةْ.
[10] الضَّحِيَّةْ الْأَنِحْنَ نِشَارُكُوا فَوْقهَا دِي، رُجَالْ الدِّينْ الْيَخْدُمُوا فِي خَيْمَةْ الْعِبَادَةْ مَا عِنْدُهُمْ حَقّ يَاكُلُوا مِنْهَا.
[11] أَشَانْ رَاجِلْ الدِّينْ الْكَبِيرْ يَدْبَحْ بَهَايِمْ ضَحِيَّةْ لِلذُّنُوبْ وَ يِجِيبْ الدَّمّ فِي الْبَكَانْ الْمُقَدَّسْ. لَاكِنْ لَحَمْ الْبَهَايِمْ دَوْل، يِمَرُّقُوْه بَرَّا مِنْ الْمُخَيَّمْ وَ يِحَرُّقُوهْ.
[12] وَ أَشَانْ دَا، عِيسَى كُلَ مَرَقْ وَ تِعِبْ بَرَّا مِنْ الْمَدِينَةْ أَشَانْ يِسَوِّي الشَّعَبْ خَاصّ لِلّٰهْ بِدَفِّقِينْ دَمَّهْ هُو.
[13] أَشَانْ دَا، خَلِّي نَمُرْقُوا وَ نَمْشُوا لَيَّهْ بَرَّا مِنْ الْمُخَيَّمْ وَ نَحْمَلَوْا نَفْس الْمُعْيَارْ الْهُو حِمْلَهْ.
[14] أَشَانْ هِنِي فِي الْأَرْض مَا عِنْدِنَا مَدِينَةْ التِّطَوِّلْ لَاكِنْ أَنِحْنَ قَاعِدِينْ نُخُطُّوا بَالْنَا فِي الْمَدِينَةْ التَّجِي بَعَدَيْن.
[15] فِي بَدَلْ الضَّحِيَّةْ هَنَا الْبَهَايِمْ، خَلِّي نَعَبُدُوا اللّٰهْ بِدَرِبْ عِيسَى وَ نِقَدُّمُوا لِلّٰهْ دَايْماً ضَحِيَّةْ الشُّكُرْ مَعَنَاتْهَا الشُّكُرْ الْجَايِ مِنْ النَّاسْ الْيَشْهَدَوْا اللّٰهْ.
[16] سَوُّوا دَايْماً الْخَيْر وَ أَسَّاعَدَوْا أَمْبَيْنَاتْكُو أَشَانْ دِي بَسْ الْعِبَادَةْ الْاللّٰهْ يَرْضَى بَيْهَا.
[17] أَسْمَعَوْا كُبَارَاتْكُو وَ تَابُعُوا كَلَامْهُمْ عَدِيلْ. أَشَانْ هُمَّنْ قَاعِدِينْ يِفَكُّرُوا فَوْقكُو وَ يَعَرْفُوا كَدَرْ هُمَّنْ مَسْؤُولِينْ مِنْكُو قِدَّامْ اللّٰهْ الْيِحَاسِبْهُمْ. خَلِّي خِدْمِتْهُمْ دِي تَبْقَى لَيْهُمْ فَرْحَةْ. كَانْ تَبْقَى لَيْهُمْ قَاسِيَةْ، إِنْتُو كُلَ مَا تَلْقَوْا مِنْهَا فَايْدَةْ.
[18] أَسْأَلَوْا اللّٰهْ لَيْنَا. أَنِحْنَ مُأَكِّدِينْ كَدَرْ نِيِّتْنَا مُخْلِصَةْ وَ نِدَوْرُوا نِتَابُعُوا حَالْ عَدِيلَةْ فِي كُلَّ شَيْء.
[19] وَ بَتَّانْ نَطْلْبُوا مِنْكُو بِزِيَادَةْ، أَسْأَلَوْا لَيِّ أَنَا أَشَانْ اللّٰهْ يِرَسِّلْنِي لَيْكُو فِي وَكِتْ قَرِيبْ.
[20] وَ خَلَاصْ، اللّٰهْ رَبّ السَّلَامْ بَعَثْ مِنْ أُسْط الْمَيْتِينْ رَبِّنَا عِيسَى الْبِقِي رَاعِي كَبِيرْ هَنَا غَنَمْ اللّٰهْ بِسَبَبْ دَمّ الْمُعَاهَدَةْ الْأَبَدِيَّةْ.
[21] وَ خَلِّي اللّٰهْ يِجَهِّزْكُو بِكُلَّ شَيْء الْعَدِيلْ أَشَانْ تِسَوُّوا مُرَادَاتَهْ وَكِتْ هُو قَاعِدْ يِسَوِّي فَوْقكُو كُلَّ شَيْء الْهُو يَرْضَى بَيَّهْ بِوَاسِطَةْ عِيسَى الْمَسِيحْ. وَ الْحَمْدُ لِلّٰهْ دَايْماً وَ إِلَى الْأَبَدْ. آمِينْ.
[22] يَا أَخْوَانِي، نَشْحَدْكُو أَشَانْ تَسْمَعَوْا بِصَبُرْ الْكَلَامْ النِّرَسِّلَهْ لَيْكُو لِنِشَجِّعْكُو. كَتَبْت لَيْكُو كَلَامْ شِيَّةْ بَسْ.
[23] نِدَوْر إِنْتُو تَعَرْفُوا كَدَرْ أَخُونَا تِمُوتَاوُسْ طَلَقَوْه مِنْ السِّجِنْ وَ كَانْ هُو يَجِي لَيِّ عَجَلَةْ، نَمْشُوا لَيْكُو مَعَايَهْ وَ نِشِيفُوكُو.
[24] سَلُّمُوا كُلَّ كُبَارَاتْكُو وَ كُلَّ الصَّالِحِينْ. الْأَخْوَانْ الْمِنْ إِيطَالِيَةْ يِسَلُّمُوكُو.
[25] عَلَيْكُو كُلُّكُو رَحْمَةْ اللّٰهْ. آمِينْ.