[1] أَشَانْ دَا، وَاجِبْ نُخُطُّوا بَالْنَا وَ نِتَابُعُوا عَدِيلْ الْكَلَامْ السِّمِعْنَاهْ أَشَانْ مَا نَنْسَوْه وَ نَمُرْقُوا مِنْ الدَّرِبْ الْعَدِيلْ.
[2] نَعَرْفُوا كَدَرْ الْكَلَامْ الْمَلَائِكَةْ اللّٰهْ بَلَّغَوْه حَقّ وَ أَيِّ نَادُمْ الْخَالَفَهْ أَوْ أَبَاهْ يِجِيبْ فِي نَفْسَهْ الْعِقَابْ الْوَاجِبْ لَيَّهْ.
[3] وَ كِكَّيْف أَنِحْنَ نَنْجَوْا كَانْ مَا نِتَابُعُوا عَدِيلْ كَلَامْ هَنَا النَّجَاةْ الْمُهِمَّةْ دِي؟ الْأَوَّلْ بَلَّغَاهَا، هُو رَبِّنَا. وَ الشُّهُودْ السِّمْعَوْا كَلَامَهْ أَكَّدَوْه لَيْنَا.
[4] وَ اللّٰهْ كُلَ شِهِدْ لَيَّهْ بِعَلَامَاتْ وَ عَجَايِبْ وَ مُعْجِزَاتْ شِقْ شِقْ وَ بِالْقُدْرَةْ الْهُو أَنْطَاهَا لِلنَّاسْ بِالرُّوحْ الْقُدُّوسْ حَسَبْ مُرَادَاتَهْ.
[5] الْآخِرَةْ، اللّٰهْ مَا خَطَّاهَا تِحِتْ سُلْطَةْ الْمَلَائِكَةْ.
[6] لَاكِنْ فِي بَكَانْ وَاحِدْ الْكِتَابْ بُقُولْ <شُنُو الْإِنْسَانْ وَ مَالَا تِفَكِّرْ فَوْقَهْ؟ وَ بَنِي آدَمْ هُو شُنُو وَ مَالَا تِهِمّ بَيَّهْ؟
[7] إِنْتَ نَزَّلْتَهْ وَ خَطَّيْتَهْ تِحِتْ مِنْ الْمَلَائِكَةْ لِمُدَّةْ قِصَيْرَةْ. وَ بَعَدْ دَا، أَنْطَيْتَهْ عَظَمَةْ وَ شَرَفْ.
[8] وَ خَطَّيْت كُلَّ شَيْء تِحِتْ سُلْطِتَهْ>. وَ كَانْ هُو خَطَّ كُلَّ شَيْء تِحِتْ سُلْطِتَهْ، بَتَّانْ مَا فَضَّلْ شَيْء الْمَا تِحِتْ سُلْطِتَهْ. وَ حَالِياً مَا نِشِيفُوا كُلَّ شَيْء تِحِتْ سُلْطِتَهْ.
[9] لَاكِنْ النِّشِيفُوهْ، هُو عِيسَى. وَ عِيسَى دَا، اللّٰهْ نَزَّلَهْ تِحِتْ مِنْ الْمَلَائِكَةْ لِمُدَّةْ قِصَيْرَةْ وَ بَعَدْ دَا، اللّٰهْ أَنْطَاهْ عَظَمَةْ وَ شَرَفْ بِسَبَبْ تَعَبَهْ وَ مَوْتَهْ. أَشَانْ بِرَحْمَةْ اللّٰهْ، عِيسَى دَاقْ الْمَوْت فِي شَانْ كُلَّ النَّاسْ.
[10] اللّٰهْ الْخَلَقْ كُلَّ شَيْء وَ فِي شَانَهْ هُو، كُلَّ شَيْء مَوْجُودْ، دَوَّرْ نَاسْ كَتِيرِينْ يَبْقَوْا عِيَالَهْ وَ يَدْخُلُوا فِي مَجْدَهْ. وَ أَشَانْ دَا، اللّٰهْ سَوَّى شَيْء مُوَافِقْ لَيْهُمْ. هُو رَسَّلْ النَّادُمْ الْيَفْتَحْ لَيْهُمْ دَرِبْ النَّجَاةْ. وَ جَعَلْ لَيَّهْ التَّعَبْ وَ بِتَعَبَهْ دَا، هُو بِقِي الْمُنَجِّي الْكَامِلْ.
[11] أَشَانْ الْيِخَصِّصْ النَّاسْ لِلّٰهْ وَ النَّاسْ وَ الْبِقَوْا مُخَصَّصِينْ لِلّٰهْ، كُلُّهُمْ عِنْدُهُمْ أَبُو وَاحِدْ. أَشَانْ دَا، عِيسَى أَكَّدْ كَدَرْ هُمَّنْ أَخْوَانَهْ.
[12] هُو بُقُولْ <أَنَا نِبَلِّغْ لِأَخْوَانِي كَدَرْ إِنْتَ اللّٰهْ وَ نَحْمُدَكْ فِي أُسْط الْجَمَاعَةْ>.
[13] وَ هُو بُقُولْ لِلّٰهْ <أَنَا نَتْوَكَّلْ عَلَيْك>. وَ بُقُولْ <دَاهُونِي أَنَا مَعَ النَّاسْ الْاللّٰهْ جَعَلَاهُمْ عِيَالِي>.
[14] الْعِيَالْ دَوْل كُلُّهُمْ بَشَرْ وَ أَشَانْ دَا، عِيسَى كُلَ بِقِي بَشَرْ مِثِلْهُمْ. وَ بِقِي مِثِلْهُمْ أَشَانْ بِمَوْتَهْ هُو يِبَطِّلْ قُدْرَةْ إِبْلِيسْ الْعِنْدَهْ قُدْرَةْ فَوْق الْمَوْت.
[15] وَ بَيْدَا، عِيسَى حَرَّرَاهُمْ لِكُلَّ النَّاسْ الْخَايْفِينْ مِنْ الْمَوْت وَ عَايْشِينْ طُولْ حَيَاتْهُمْ مِثِلْ عَبِيدْ بِسَبَبْ خَوْفهُمْ.
[16] أَكِيدْ، هُو مَا جَاءْ أَشَانْ يِسَاعِدْ الْمَلَائِكَةْ لَاكِنْ أَشَانْ يِسَاعِدْ عِيَالْ إِبْرَاهِيمْ.
[17] وَ بِسَبَبْ دَا، لَابُدَّا يَبْقَى مِثِلْ أَخْوَانَهْ فِي كُلَّ شَيْء وَ يَبْقَى لَيْهُمْ رَاجِلْ الدِّينْ الْكَبِيرْ، الرَّحِيمْ وَ الْأَمِينْ، وَ يَخْدِمْ لِلّٰهْ وَ يِكَفِّرْ ذُنُوبْ الشَّعَبْ.
[18] هُو ذَاتَهْ تِعِبْ وَ قَعَدْ تِحِتْ التَّجْرِبَةْ. وَ أَشَانْ دَا، هُو كُلَ يَقْدَرْ يِسَاعِدْ النَّاسْ الْقَاعِدِينْ تِحِتْ التَّجْرِبَةْ.