[1] وَ دِيهِي زِبْدَةْ الْكَلَامْ. أَنِحْنَ عِنْدِنَا رَاجِلْ دِينْ كَبِيرْ مِثِلْ الْفَسَّرْنَا بَيَّهْ لَيْكُو. هُو قَعَدْ جَنْب عَرْش اللّٰهْ الْعَظِيمْ فِي نُصَّهْ الزَّيْنَايْ فَوْق فِي السَّمَاوَاتْ.
[2] وَ هِنَاكْ هُو خَدَّامْ فِي الْبَكَانْ الْمُقَدَّسْ الصَّحِيحْ وَ دِي بَسْ الْخَيْمَةْ الْمَا بَنَاهَا إِنْسَانْ. رَبِّنَا بَسْ بَنَاهَا.
[3] وَ كُلِّ نَادُمْ الْيِدَرُّجُوهْ رَاجِلْ دِينْ كَبِيرْ وَاجِبْ يِقَدِّمْ لِلّٰهْ ضَحَايَا شِقْ شِقْ وَ أَشَانْ دَا، وَاجِبْ لِرَاجِلْ دِينْ هَنَانَا كُلَ يِقَدِّمْ ضَحِيَّةْ.
[4] وَ كَانْ عِيسَى قَاعِدْ فِي الْأَرْض، هُو أَبَداً مَا يَبْقَى رَاجِلْ دِينْ أَشَانْ فِي الْأَرْض رُجَالْ دِينْ آخَرِينْ قَاعِدِينْ الْيِقَدُّمُوا الضَّحَايَا حَسَبْ شُرُوطْ التَّوْرَاةْ.
[5] وَ الْبَكَانْ الْهُمَّنْ يَخْدُمُوا فَوْقَهْ دَا، عَلَامَةْ بَسْ وَ هِي تِمَثِّلْ الْبَكَانْ الْمُقَدَّسْ السَّمَاوِي. وَ دَا مَعْرُوفْ أَشَانْ وَكِتْ مُوسَى يِدَوْر يَبْنِي خَيْمَةْ الْعِبَادَةْ، اللّٰهْ كَلَّمْ لَيَّهْ وَ قَالْ <خُطّ بَالَكْ أَشَانْ تِسَوِّي كُلَّ شَيْء مِثِلْ فِي النِّظَامْ الْأَنَا وَصَّفْتَهْ لَيْك فِي الْحَجَرْ>.
[6] لَاكِنْ هَسَّعْ عِيسَى عِنْدَهْ خِدْمَةْ أَخَيْر زِيَادَةْ مِنْ خِدْمَةْ رُجَالْ الدِّينْ الْأَوَّلَانِيِّينْ أَشَانْ هُو بِقِي وَسِيطْ هَنَا مُعَاهَدَةْ الْأَخَيْر زِيَادَةْ. وَ الْمُعَاهَدَةْ دِي عِنْدَهَا بَرَكَةْ زِيَادَةْ من الْبَرَكَةْ الْاللّٰهْ وَاعَدْ بَيْهَا أَوَّلْ.
[7] وَ كَانْ الْمُعَاهَدَةْ الْأَوَّلْ مَا عِنْدَهَا عَيْب، مَا وَاجِبْ يِبَدُّلُوهَا بِمُعَاهَدَةْ آخَرَةْ.
[8] وَ لَاكِنْ اللّٰهْ حَجَّى بِعَيْب النَّاسْ وَكِتْ هُو هَرَجْ لِلشَّعَبْ وَ قَالْ <يَجِي وَكِتْ وَاحِدْ نِسَوِّي مَعَ بَنِي إِسْرَائِيلْ وَ مَعَ بَنِي يَهُوذَا مُعَاهَدَةْ جَدِيدَةْ. دَا بَسْ كَلَامْ اللّٰهْ.
[9] وَ هِي مَا تَبْقَى مِثِلْ الْمُعَاهَدَةْ الْأَنَا سَوَّيْتهَا مَعَ جُدُودْهُمْ وَكِتْ قُدْتُهُمْ فِي الدَّرِبْ بِسَلَامَةْ وَ مَرَقْتُهُمْ مِنْ بَلَدْ مَصِرْ. الْمُعَاهَدَةْ الْجَدِيدَةْ دِي مَا تَبْقَى مِثِلْ الْأَوَّلْ أَشَانْ هُمَّنْ مَا قَعَدَوْا ثَابْتِينْ فَوْقهَا. وَ أَشَانْ دَا، أَنَا خَلَّيْتهُمْ. دَا بَسْ كَلَامْ اللّٰهْ.
[10] وَ هَسَّعْ دِيهِي الْمُعَاهَدَةْ النِّسَوِّيهَا مَعَ بَنِي إِسْرَائِيلْ بَعَدَيْن. نُخُطّ شُرُوطِي فِي فِكِرْهُمْ وَ نَكْتِبْ كَلَامِي فِي قُلُوبْهُمْ وَ نَبْقَى لَيْهُمْ رَبُّهُمْ وَ هُمَّنْ يَبْقَى شَعَبِي. دَا بَسْ كَلَامْ اللّٰهْ.
[11] وَ نَادُمْ مَا يِعَلِّمْ رَفِيقَهْ وَ لَا يُقُولْ لِأَخُوهْ «أَعَرِفْ اللّٰهْ» أَشَانْ كُلُّهُمْ يَعَرْفُونِي، الصَّغَيَّرْ وَ الْكَبِيرْ.
[12] أَشَانْ نَغْفِرْ لَيْهُمْ خَطَايَاهُمْ وَ مَا نِفَكِّرْ بَتَّانْ فِي ذُنُوبْهُمْ دَوْل>.
[13] وَ فِي الْكَلَامْ دَا، هُو حَجَّى بِمُعَاهَدَةْ جَدِيدَةْ. وَ بَيْدَا، هُو جَعَلْ الْمُعَاهَدَةْ الْأَوَّلْ قَدِيمَةْ. وَ أَيِّ شَيْء الْيَبْقَى قَدِيمْ وَكْتَهْ كَمَّلْ وَ قَرِيبْ يَبْقَى مَا فِيهْ.