[1] فِي الزَّمَنْ الْفَاتْ، اللّٰهْ كَلَّمْ لِجُدُودْنَا بِوَاسِطَةْ الْأَنْبِيَاءْ عِدَّةْ مَرَّاتْ وَ بِطُرُقْ شِقْ شِقْ.
[2] وَ هَسَّعْ فِي الزَّمَنْ الْأَخِيرْ، اللّٰهْ كَلَّمْ لَيْنَا بِوَاسِطَةْ إِبْنَهْ الْهُو جَعَلَهْ وَرِيثْ هَنَا كُلَّ شَيْء. وَ بَيَّهْ هُو بَسْ، اللّٰهْ خَلَقْ الدُّنْيَا.
[3] وَ إِبْن اللّٰهْ هُو نُورْ اللّٰهْ الْمَجِيدْ وَ صُورَةْ طَبِيعْتَهْ وَ هُو يَحْفَضْ كُلَّ شَيْء بِقُدْرَةْ كَلَامَهْ. وَ وَكِتْ هُو طَهَّرْ النَّاسْ مِنْ ذُنُوبْهُمْ خَلَاصْ، هُو طَلَعْ فِي الْبَكَانْ الْعَالِي وَ قَعَدْ جَنْب اللّٰهْ الْعَظِيمْ فِي نُصَّهْ الزَّيْنَايْ.
[4] وَ اللّٰهْ أَنْطَاهْ دَرَجَةْ كَبِيرَةْ بِلْحَيْن مِنْ الْمَلَائِكَةْ مِثِلْ الْأُسُمْ الْاللّٰهْ أَنْطَاهْ لَيَّهْ أَفْضَلْ زِيَادَةْ مِنْ أَسَامَيْهُمْ.
[5] أَبَداً مَا فِي مَلَكْ الْاللّٰهْ قَالْ لَيَّهْ <إِنْتَ إِبْنِي وَ الْيَوْم أَنَا بِقِيتْ أَبُوكْ> وَلَّا بَتَّانْ قَالْ <أَنَا نَبْقَى أَبُوهْ وَ هُو يَبْقَى إِبْنِي>.
[6] وَ لَاكِنْ وَكِتْ اللّٰهْ جَابْ إِبْنَهْ الْبِكِرْ فِي الدُّنْيَا، هُو قَالْ <خَلِّي كُلَّ مَلَائِكَةْ اللّٰهْ يَسْجُدُوا لَيَّهْ>.
[7] وَ الْكَلَامْ الْمَكْتُوبْ الْبُخُصّ الْمَلَائِكَةْ بُقُولْ <هُو جَعَلْ مَلَائِكَتَهْ مِثِلْ الرِّيحْ وَ خَدَّامِينَهْ دَوْل مِثِلْ لِسَانْ النَّارْ>.
[8] وَ لَاكِنْ فِي إِبْنَهْ بُقُولْ <يَا اللّٰهْ عَرْشَكْ يَقْعُدْ إِلَى الْأَبَدْ وَ تَمْلُكْ فِي مَمْلَكَتَكْ بِعَدَالَةْ كَامِلَةْ.
[9] إِنْتَ تِحِبّ الْعَدِلْ وَ تَكْرَهْ الظُّلُمْ. أَشَانْ دَا، اللّٰهْ رَبَّكْ أَنْطَاكْ دَرَجَةْ وَ مَلَأْ قَلْبَكْ بِالْفَرَحْ وَ خَطَّاكْ فِي بَكَانْ عَالِي فَوْق مِنْ رُفْقَانَكْ>.
[10] وَ بَتَّانْ بُقُولْ <يَا رَبّ، فِي الْبِدَايَةْ إِنْتَ فَرَشْت الْأَرْض وَ إِنْتَ بَسْ خَلَقْت السَّمَاوَاتْ.
[11] هُمَّنْ يَبْقَوْا مَا فِيهُمْ لَاكِنْ إِنْتَ تَقْعُدْ دَايْماً. مِثِلْ الْكِسْوَةْ تَقْدَمْ، هُمَّنْ كُلَ يَقْدَمَوْا.
[12] وَ مِثِلْ نَادُمْ يَطْوَي فُرَاشَهْ، إِنْتَ كُلَ تَطْوِيهُمْ وَ تِبَدِّلْهُمْ مِثِلْ لُبَاسْ. لَاكِنْ إِنْتَ أَبَداً مَا تِغَيِّرْ وَ وَكْتَكْ أَبَداً مَا يِكَمِّلْ>.
[13] وَ أَبَداً مَا فِي مَلَكْ الْاللّٰهْ قَالْ لَيَّهْ <أَقْعُدْ بِإِيدِي الزَّيْنَةْ لَحَدِّي نُخُطّ عُدْوَانَكْ تِحِتْ رِجِلَيْنَكْ>.
[14] وَ الْمَلَائِكَةْ هُمَّنْ كُلُّهُمْ أَرْوَاحْ خَدَّامِينْ بَسْ وَ اللّٰهْ يِرَسِّلْهُمْ أَشَانْ يَخْدُمُوا فِي شَانْ النَّاسْ الْيَلْقَوْا النَّجَاةْ.