[1] جَوَابْ مِنِّي أَنَا يَعْقُوبْ عَبِدْ اللّٰهْ وَ عَبِدْ رَبِّنَا عِيسَى الْمَسِيحْ. وَ نِرَسِّلَهْ لَيْكُو إِنْتُو أُمَّةْ اللّٰهْ الْمُشَتَّتِينْ فِي كُلَّ بَكَانْ. السَّلَامْ عَلَيْكُمْ.
[2] يَا أَخْوَانِي، أَفْرَحَوْا فِي أَيِّ تَعَبْ الْيَجِيكُو
[3] أَشَانْ تَعَرْفُوا كَدَرْ التَّعَبْ يِجَرِّبْ إِيمَانْكُو وَ كَانْ قَعَدْتُوا ثَابْتِينْ فِي أُسْط التَّعَبْ، تَبْقَوْا نَاسْ صَبُورِينْ.
[4] وَ خَلِّي صَبُرْكُو يَبْقَى تَمَامْ أَشَانْ بَيَّهْ تَبْقَوْا كَامِلِينْ وَ قَادْرِينْ فِي أَيِّ حَالْ وَ مَا فِي شَيْء يِقَصِّرْ لَيْكُو.
[5] كَانْ نَادُمْ مِنْكُو فِكِرْ قَصَّرْ لَيَّهْ، خَلِّي يَطْلُبَهْ مِنْ اللّٰهْ وَ اللّٰهْ يَنْطِيهْ أَشَانْ اللّٰهْ يَنْطِي لِكُلَّ النَّاسْ بِزِيَادَةْ بِجُودْ وَ بَلَا كَلَامْ.
[6] وَ خَلِّي يَطْلُبَهْ بِإِيمَانْ ثَابِتْ وَ بَلَا شَكَكْ. نَادُمْ كَانْ يِشَكِّكْ، هُو مِثِلْ الشَّلَالْ الْفِي الْبَحَرْ الرِّيحْ تِشِيلَهْ و تِهِزَّهْ.
[7] نَادُمْ مِثِلْ دَا، خَلِّي مَا يُخُطّ فِي عَقْلَهْ كَدَرْ يَلقَى شَيْء رَبِّنَا
[8] أَشَانْ النَّادُمْ دَا قَلْبَهْ إِتْنَيْن وَ هُو مَا ثَابِتْ فِي أَيِّ شَيْء الْبِسَوِّيهْ.
[9] الْمُؤْمِنْ الْمِسْكِينْ، خَلِّي يَفْرَحْ أَشَانْ اللّٰهْ دَرَّجَهْ.
[10] وَ الْمُؤْمِنْ السِّيدْ الْمَالْ كُلَ، خَلِّي يَفْرَحْ أَشَانْ هُو مَسْكَنْ نَفْسَهْ قِدَّامْ اللّٰهْ. وَ سِيَادْ الْمَالْ مَا يِطَوُّلُوا مِثِلْ الْقَشّ.
[11] كَانْ الْحَرَّايْ طَلَعَتْ وَ بِقَتْ حَامِيَةْ بِلْحَيْن، هِي تُطُقّ الْقَشّ وَ الْقَشّ دَا يَبْقَى أَصْفَرْ وَ يَيْبَسْ وَ يُمُوتْ. بِمِثِلْ دَا بَسْ، سِيَادْ الْمَالْ كُلَ يُمُوتُوا فِي أُسُطْ خِدْمِتْهُمْ وَ يَبْقَوْا مَا فِيهُمْ.
[12] مَبْرُوكْ لِلنَّادُمْ الْيَصْبُرْ فِي التَّعَبْ الْيِجَرِّبْ إِيمَانَهْ. أَشَانْ وَكِتْ التَّجْرِبَةْ دِي كَمَّلَتْ خَلَاصْ، هُو يَلْقَى بَرَكَةْ كَبِيرَةْ. وَ الْبَرَكَةْ دِي، هِي الْحَيَاةْ الْاللّٰهْ وَاعَدْ بَيْهَا النَّاسْ الْيِحِبُّوهْ.
[13] كَانْ نَادُمْ يِدَوْر يَذْنِبْ، خَلِّي مَا يُقُولْ «اللّٰهْ قَاعِدْ يِلِزِّنِي فِي الذُّنُوبْ». أَشَانْ أَبَداً مَا فِي شَيْء يِلِزّ اللّٰهْ فِي الذَّنِبْ وَ اللّٰهْ هُو أَبَداً مَا يِلِزّ نَادُمْ فِي الذَّنِبْ.
[14] لَاكِنْ كَانْ نَادُمْ يِدَوْر يَذْنِبْ، شَهْوَتَهْ بَسْ قَاعِدَةْ تِلِزَّهْ أَشَانْ الذَّنِبْ بِقِي لَيَّهْ حَلُو.
[15] وَ الشَّهْوَةْ هِي مِثِلْ مَرَةْ التَّغَلَبْ وَ تَلْدَ صَغِيرْ. الشَّهْوَةْ كُلَ تَغَلَبْ وَ صَغِيرْهَا هُو الذَّنِبْ. وَ الذَّنِبْ كَانْ خَلَاصْ كِبِرْ يِسَبِّبْ الْمَوْت.
[16] يَا أَخْوَانِي النِّحِبُّوكُو، مَا تُغُشُّوا نُفُوسْكُو.
[17] كُلَّ شَيْء الْعَدِيلْ وَ كُلَّ شَيْء التَّمَامْ جَايِ مِنْ اللّٰهْ بَسْ وَ يَنْزِلْ مِنْ اللّٰهْ خَالِقْ النُّورْ. الْوَطَى تِغَيِّرْ، تَبْقَى لَيْل وَ نَهَارْ، لَاكِنْ اللّٰهْ أَبَداً مَا يِغَيِّرْ وَ مَا عِنْدَهْ ضَلَامْ.
[18] بِوَاسِطَةْ كَلَامْ الْحَقّ، اللّٰهْ أَنْطَانَا الْحَيَاةْ الْجَدِيدَةْ بِنِيِّتَهْ هُو أَشَانْ أَنِحْنَ نَبْقَوْا قِدَّامْ كُلَّ شَيْء الْهُو خَلَقَهْ.
[19] يَا أَخْوَانِي النِّحِبُّوكُو، فَكُّرُوا سَمَحْ. خَلِّي أَيِّ نَادُمْ يَبْقَى دَايْماً جَاهِزْ أَشَانْ يَسْمَعْ. خَلِّي مَا يُقُمّ عَجَلَةْ يِحَجِّي وَ مَا يَزْعَلْ عَجَلَةْ
[20] أَشَانْ نَادُمْ كَانْ زَعَلَانْ مَا يِسَوِّي الْعَمَلْ الصَّالِحْ الْاللّٰهْ بِدَوْرَهْ.
[21] أَشَانْ دَا، خَلُّوا مِنْكُو كُلَّ شَيْء الْيِنَجِّسْكُو وَ كُلَّ شَيْء الْفَسِلْ وَ أَقْبَلَوْا بِمَسْكَنَةْ الْكَلَامْ الْاللّٰهْ الْخَطَّهْ فِي قُلُوبْكُو. الْكَلَامْ دَا عِنْدَهْ قُدْرَةْ أَشَانْ يِنَجِّيكُو.
[22] طَبُّقُوا كَلَامْ اللّٰهْ وَ مَا تَسْمَعَوْه سَاكِتْ. كَانْ تَسْمَعَوْه بَسْ وَ مَا تِطَبُّقُوهْ، إِنْتُو تُغُشُّوا نُفُوسْكُو.
[23] كَانْ نَادُمْ سِمِعْ كَلَامْ اللّٰهْ وَ مَا طَبَّقَهْ، هُو يَبْقَى مِثِلْ نَادُمْ الْيِشِيفْ وِجْهَهْ فِي أَمْ شَوَافَةْ
[24] وَ هُو يِشِيفْ كِكَّيْف وِجْهَهْ وَ خَلَاصْ يَمْشِي وَ طَوَّالِي كَيْ يَنْسَاهْ.
[25] وَ لَاكِنْ كَانْ نَادُمْ يُخُطّ بَالَهْ عَدِيلْ فِي الْوَصَايَا الْيَنْطُونَا الْحُرِّيَّةْ وَ يِنْكَرِبْ فَوْقهُمْ وَ مَا يَسْمَعْهُمْ لِيَنْسَاهَمْ و يِطَبِّقْهُمْ، النَّادُمْ دَا اللّٰهْ يِبَارِكَهْ فِي كُلَّ شَيْء الْبِسَوِّيهْ.
[26] النَّادُمْ الْبُقُولْ هُو يِتَابِعْ عَدِيلْ الدِّينْ وَ لَاكِنْ مَا يَلْزَمْ لِسَانَهْ، هُو دَا قَاعِدْ يُغُشّ نَفْسَهْ وَ دِينَهْ مَا يَنْفَعْ.
[27] دَاهُو الدِّينْ الْمُخْلِصْ الْمَا عِنْدَهْ عَيْب قِدَّامْ أَبُونَا اللّٰهْ، عَاوُنُوا الْأَتَامَاءْ وَ الْعَوِينْ الرُّجَالْهِنْ مَيْتِينْ الْقَاعِدَاتْ فِي التَّعَبْ وَ أَقِيفُوا بَعِيدْ مِنْ الْأَشْيَاءْ الْيِنَجُّسُوا نَاسْ فِي الدُّنْيَا.