<Hebreos 13

[1] Say ayllunöla imaypis kuyanakur kawayay.

[2] Saynöla wayikiman posädakuq pï chämuptinpis kushishla posädasiyanki. Sayno posädasiyashqanchömi wakin runakuna mana musyayashpan angilkunata posädasiyarqan.

[3] Carcilcho wichqaraykäyashqaykiman cuentaskir carcilcho kaykaqkunata yarpäyanki. Saynöla nakaykäyashqaykiman cuentaskir nakasish kaqkunatapis yanapäyanki.

[4] Majayuqkuna majaykiwan kuyanakur ali kawayay. Majaykikunata ama jarukuyaysu. Fornicación jusata jusalikuqkunata y majanta jarukuqkunataqa Tayta Dios juzganqami.

[5] Saynöpis qellaylapaqqa ama wachakash kayaysu. Saypa trukanqa sararäyashlaykiwan contentakuyay. Tayta Dios kaynömi nin: “Imaypis manami kachaykuyäshaykisu ni qonqaykuyäshaykisu”.

[6] Sayno nikämashqaqa payman yärakushpansi kushish nishun: “Tayta Dios yanapämaptinmi imatapis mansaküsu. Runakuna conträ sharkuyaptinpis manami lakiküsu”.

[7] Tayta Diospa palabranta yachasishuqnikikunata yarpäyay. Tayta Diosta sirvir alikunata rurayashqanta tantiyakur paykuna yärakuyashqanno qamkunapis Tayta Diosman yärakuyay.

[8] Jesucristuqa unaypis, kananpis y imayyaqpis kashqannölami kaykan.

[9] Lutan yachasikuqkuna yachasiyashqanta ama chaskipäyaysu. Manami paykuna niyashqannösu reqish mikuykunalata mikur Tayta Dios munashqanno kawansi, saypa trukanqa Tayta Dios yanapämashqami.

[10] Noqansipa altarninsiqa manami Sagrädu Tolducho kaykaq altarnösu kaykan. Altarninsipita mikushqapis Sagrädu Tolducho Tayta Diosta sirviq cürakunaqa manami saypita mikuyänanpaq derëchun kansu.

[11] Nawpa kaq pactuchöqa runakuna jusalikuyashqanpita mandaq cürakunami uywakunapa yawarninta Lugar Santïsimuman apayaq. Say uywakunapa aysantanami campamentupita jorqurir rupasiyaq.

[12] Saynölami Jesucristutapis markapita jorquskir wanusiyarqan. Yawarninta jichar wanushqanpitami jusansikunata Tayta Dios perdonamansi.

[13] Jesucristo sayno nakaykaptinqa noqansipis campamentupita yarqushun. Payta nakasiyashqanno nakasimashqapis o payta jamuräyashqanno jamurämashqapis payman imaypis yärakur kawashun.

[14] Noqansipa markansiqa manami kay pasachösu kaykan. Saypa trukanqa kay pasacho qorpanöla karmi mana ushakaq markataraq shuyakuykansi.

[15] Sayno kaykaptinqa Jesucristuman yärakur sacrificiuta altarman churaqno Tayta Diosta imay hörapis alabashun. Paypa jutinta joqarir alabashqansimi ali kaykan.

[16] Saynöpis mana qonqaypa alikunata rurayay. Jukniki jukniki imalawanpis yanapänakuyay. Sayno kawarmi Tayta Dios munashqan sacrificiukunata payman apaqno kaykansi.

[17] Mayor wawqikunata cäsukuyay. Paykunaqa shumaq rikayäshunaykipaqmi waran waran yarpachakuykäyan. Saynöpis ali o mana ali rikayäshushqaykipitami Tayta Diosta cuentata qoyanqa. Sayno kaykaptinqa ama lakikasiyaysu, saypa trukanqa shakya shakyala rikayäshunaykipaq yäsiyäshushqaykita chaskikuyay. Lakikasiyaptikiqa manami qamkunapaqpis alisu kanqa.

[18] Noqakunapaqpis Tayta Diosta manakuyay. Musyayämi lutanta mana rurayashqäta. Tayta Dios munashlantami imaypis rurayta munayä.

[19] Saynöpis payta manakuyay qamkunaman yapay kutiyämunäpaq.

[20] Tayta Diostami qamkunapaq manakü. Paymi ali kawayta qomansi. Señor Jesucristutapis kawarisimushqami. Uyshankunatapis shumaqmi misin. Yawarninta jicharmi imaypis mana ushakaq pactuta noqansiwan rurash.

[21] Jesucristupa jutinchömi payta manakuyä imaypis yanapaykuyäshunaykipaq. Munashqanta rurayänaykipaq imayka ali kaqkunata kamaripaykuyäläshunki. Payqa imayyaqpis alabash kaykuläsun. [Amén.]

[22] Wawqi panikuna, walkalatapis kay cartacho yäsimushqäta chaskikuykuyälay.

[23] Wawqinsi Timoteupis carcilpita yarqamushnami. Qamkunaman manaraq shamuptï noqa kaqman chämuptinqa ishkäkunami shayämushaq.

[24] Salüdüta qoykuyälanki mayor wawqikunata y wakin wawqi panikunatapis. Italia nacionpita kaq wawqi panikunapis saynölami salüdunta apasikayämun.

[25] Tayta Dios kuyapar yanapaykuyäläshunki. [Amén.]