[1] Nawpataqa profëtankunawanmi Tayta Dios yaparir yaparir unay ayllunsikunata tukuynöpa wilaparqan.
[2] Kay ultimu tiempuchönami isanqa Surin Jesucristuwanna wilakuyninta wilapämansi. Paywanmi kay pasatapis jana pasatapis kamarqan. Paytami churarqan lapantapis munaynincho sararänanpaq.
[3] Jesucristumi musyasimansi Tayta Dios imano kashqantapis. Payta reqirqa kikin Tayta Diostapis reqinsimi. Munayyuq palabranwanmi lapan kamashqankunatapis mandan munashqanno kayänanpaq. Jusansipita purificash kanansipaq wanurkurmi gloriaman kutirqan. Kananqa Tayta Diospa trönun aluq kaq nawpanchömi jamaraykan.
[4] Sayno karmi Tayta Diospa Surin Jesucristo lapan angilkunapitapis mas munayyuq kaykan. Saynölami jutinpis angilkunapa jutinpita mas respitash kaykan.
[5] Tayta Dios manami imaypis angilkunata kayno nirqansu: “Qamqa surïmi kanki. Kanan junaqpitaqa taytaykinami kaykä”. Saynölami mastapis Tayta Dios nirqan: “Noqami paypa taytan kashaq. Paynami noqapa surï kanqa”.
[6] Saynölami japalan Surinta kay pasaman kachamushpan Tayta Dios nirqan: “Lapan angilkunapis payta adorayäsun”.
[7] Angilkunapaqmi Tayta Dios nirqan: “Angilnïkunata wayratanömi kachä. Sirvimaqnï kayashpanmi bunyaypa bunyar rupaykaq ninano kaykäyan”.
[8] Surinpaqnami isanqa nirqan: “Tayta Dios, trönuykichömi imayyaqpis mandaq kaykanki. Qamqa lapantapis alimi mandanki.
[9] Pipis alita ruraptinqa kushikunkimi. Mana alita ruraptinqa ajanankimi. Saymi Tayta Dios qamta churashushkanki pïmaypitapis mas kushish kanaykipaq”.
[10] Saynöpis Surinpaq kaynömi nirqan: “Tayta Dios, qammi kamashqayki höra kay pasatapis shumaq takyasishkanki. Jana pasatapis makikiwanmi kamashkanki.
[11] Lapan kamashqayki ushakaptinpis qamqa imaypis kaykankimi. Mödana makwayar ushakashqannömi lapanpis ushakanqa.
[12] Punchuta luyluqnömi kamashqaykikunatapis luylurinkipaq. Mödanata trukasiqnölami trukarasinkipaq. Lapan ushakaptinpis qamqa imaypis kashlanmi kaykanki. Qamqa manami imaypis awkinyankisu”.
[13] Manami mayqan angilkunatapis Tayta Dios nirqansu: “Aluq kaq nawpäman jamakamuy lapan chikishuqnikikunata munaynikiman churashqäyaq”.
[14] Saymi angilkunaqa Tayta Diospa mandun ruraqla kaykäyan. Paykunatami Tayta Dios kachamun salvash kaqkunata yanapänanpaq.