[1] Wawqi panikuna, gloriaman chäyänaykipaq Tayta Dios qayaykäyäshuptikiqa chaskikushqansi Jesucristo pï kashqantapis shumaq tantiyakuyay. Paymi apostolninsi y mandaq cüransi kaykan.
[2] Wayinta ali rikananpaq Tayta Dios nishqanta Moisés cumplishqannömi Jesucristupis lapanta cumplirqan.
[3] Musyashqansinöpis wayi kuyaylapaq kaptin manami wayitasu alabansi, sinöqa wayi ruraqtami. Saynöpis manami Moisésta alabanansipaqsu kaykansi, sinöqa Jesucristuta alabanansipaqmi.
[4] Wayipis runa sharkasiptinraqmi kan. Saynölami Tayta Dios kamaptinraq lapanpis kaykan.
[5] Tayta Diospa wayinta Moisés ali rikarpis ashmaynölami karqan. Sayno karmi shamuq watakunacho Tayta Dios tantiyasimänansipaq kaqkunata qelqarqan.
[6] Jesucristumi isanqa Tayta Diospa Surin kar wayipa duëñun kaykan. Payman yärakur nishqankunata imaypis cumplirqa noqansimi paypa wayin kaykansi.
[7] Saymi Espíritu Santu kayno nishqanta shumaq tantiyakunansi: “Tayta Dios nishqanta kanan junaq wiyaykarqa
[8] sunyaq jirkacho pruëba kaptin unay aylluykikuna chukru shonqu kayashqanno ama kayaysu.
[9] Saychömi chusku chunka (40) watantin yanapashqäta rikaykarpis paykunaqa munayashqanta rurasimayta munayarqan.
[10] Saymi pasaypa rabyanar nirqä: ‘Kay runakunaqa oqrakashnömi kaykäyan. Yäsishqätapis manami cäsukuyansu’.
[11] Sayno rabyarmi kayno nir jurarqä: ‘Paykunaqa promitishqä jamayman manami yaykuyanqasu’ ”.
[12] Wawqi panikuna, cuidädu qamkunapis chukru shonqu y mana yärakuq kar imayyaqpis kawaq Tayta Diospita witikuyankiman.
[13] Saypa trukanqa waran waran jukniki juknikipis shakyäsinakuyay Tayta Dios munashqanno kawayänaykipaq. Saynöpami jusalikuy mana engañayäshuptiki shonquykikuna chukruyanqasu.
[14] Wanushqansiyaq Tayta Diosman yärakur pay munashqanno kawashpansimi Jesucristo herenciata chaskishqanno noqansipis herenciata chaskishun.
[15] Tayta Diospa palabranchömi nin: “Tayta Dios nishqanta kanan junaq wiyaykarqa unay aylluykikuna chukru shonqu kayashqanno ama kayaysu”.
[16] Tantiyakuyay. ¿Pïkunataq Tayta Dios nishqanta wiyaykarpis contran sharkuyarqan? ¿Manaku paykuna Egiptupita Moisés jorqamushqan Israel runakuna kayarqan?
[17] ¿Pïkunataq chusku chunka (40) watantin Tayta Diosta rabyanäsiyarqan? ¿Manaku paykuna sunyaq jirkacho Tayta Dios ushakäsishqan jusalikuq runakuna kayarqan?
[18] ¿Pïkunatataq Tayta Dios juraparqan promitishqan jamayman mana yaykuyänanpaq? ¿Manaku payta mana cäsukuq runakuna kayarqan?
[19] Paykunaqa mana criyiyashqanpitami yaykuyarqansu.