[1] Mandaq cürataqa Tayta Diosmi akran saki mikuy ofrendakunata y sacrificiukunata altarcho rupasiptin jusankunapita runakuna perdonash kayänanpaq.
[2] Cüraqa runala kar imachöpis jusalikurmi runa mayinkuna mana tantiyakuypa jusalikuyaptin kuyapan.
[3] Saymi kikinpa jusankunapita y runa mayinkunapa jusankunapitapis sacrificiuta rupasin.
[4] Kikinpa munaylanpitaqa manami pipis mandaq cüra kayman yaykunsu. Saypa trukanqa Tayta Dios churaptinraqmi mandaq cüra kayman pipis yaykun. Aarónpis mandaq cüra karqan Tayta Dios churaptinraqmi.
[5] Manami Jesucristupis kikinpa munaylanpitasu mandaq cüra karqan, saypa trukanqa Tayta Dios churaptinraqmi. Paytami Tayta Dios nirqan: “Qamqa surïmi kanki. Kanan junaqpitaqa taytaykinami kaykä”.
[6] Tayta Dios palabrancho mastapis kaynömi nirqan: “Qammi imayyaqpis Melquisedecno cüra kanki”.
[7] Jesucristo kay pasacho kawanan wisan waqapayparaq y qayakuyparaqmi Tayta Diosta manakurqan. Sayno manakurqan wanuypita salvananpaq Tayta Dios munayyuq kashqanta musyarmi. Tayta Dios nishqanta Jesucristo cumpliq kaptinmi ruwakushqanta wiyarqan.
[8] Tayta Diospa Surin karpis nakarraqmi cäsukuyta yachakurqan.
[9] Sayno yachakurmi munayyuq kaykan payta cäsukuqkunata salvananpaq.
[10] Saymi Tayta Dios payta churarqan Melquisedecno mandaq cüra kananpaq.
[11] Saypita tantiyasinäpaqqa askaraqmi kaykan. Sayno kaptinpis ajataraq tantiyayaptikimi mastaqa yachasishaykiraqsu.
[12] Kananyaqqa maynami yachasikuqna kaykäyankiman. Sayno kaptinpis yapay qalaykunanpitaraqmi yachakuyta munaykäyanki. Pishi wamra mikuyta manaraq yachakur lichilataraq upuqnömi kaykäyanki.
[13] Chuchuykaq wamrakuna japuymi tantiyakuyankiraqsu Tayta Dios munashqanno kawayänaykipaq kashqanta.
[14] Qamkunaqa mikuyta mikuqnöna kayankiman. Sayno karqa ali kaqta y mana ali kaqta tantiyarmi Tayta Dios munashqanno kawayankiman.