[1] Angilkunapitapis Jesucristo mas munayyuq kaykaptinqa wilakuyninta wiyashqansikunata shumaq cäsukushun. Mana cäsukurqa mana alimanpis chashwanmi.
[2] Angilkuna apayämushqan leykunata mana wiyakuq runakunatapis Tayta Dios castigaykaptinqa
[3] ¡imajinanparaq castigamäshun salvamänansipaq kaq wilakuyta mana cäsukushqaqa! Say wilakuytami Señor Jesucristo puntata wilakurqan. Saypitanami wilakushqanta wiyaqkuna noqansita wilamashkansi.
[4] Wilakuynin rasunpaypa kashqanta Tayta Dios musyasimashkansi señalkunata y admiraypaq milagrukunata rurashpanmi. Saynöpis musyasimashkansi Espíritu Santuwan habilidäkunata kikin munashqanno qomashpansimi.
[5] Mushuq pasata manami angilkunapa makinmansu Tayta Dios churash, sinöqa Jesucristupa makinmanmi.
[6] Saymi palabrancho nikan: ¿Imanataq runa kaykan sayjinanpa paypaq yarpachakunaykipaq? ¿Imanataq runa kaykan aläpa kuyaykunaykipaq?
[7] Runata kamashkanki cäsi angilno munayyuq kananpaqmi. Reytanöpis churashkanki munayyuq y respitash kananpaqmi. [Lapan kamashqaykitapis munayninmanmi churashkanki.]
[8] Kay pasacho kaqkunataqa lapantami makinman churashkanki. Makinman lapanta churashqanta niptinpis manaraqmi rikansiraqsu runapa munaynincho lapan kashqanta.
[9] Sayta manaraq rikarpis y Jesucristo kay pasacho kashqanyaq angilkunapita mënus munayyuq kaykaptinpis musyansimi munayyuq y respitashna kananpaq Tayta Dios payta churashqanta. Lapan runakunata salvananpaq wanuptinmi Tayta Dios kuyapäkuq kashpan payta sayno churarqan.
[10] Jesucristo salvamaqninsi kananta munarmi lapantapis kamaq y lapanpaq munayyuq Tayta Dios payta kachamurqan noqansi rayku nakar wanunanpaq. Saynöpami wamrankunata salvar gloriaman pushanqa.
[11] Saymi runakunata salvaq Jesúspis y salvashqan kaqkunapis say Taytalana kaykansi. Say Taytala karmi salvashqan kaqkunata Jesucristo mana penqakuypa nimansi wawqinkuna y paninkuna kashqansita.
[12] Tayta Diospa palabranchöpis Jesucristo kaynömi nikan: “Salvakuq kashqaykipitami wawqïkunata wilapäshaq. Paykunawan shuntakaykurmi alabashayki”.
[13] Mastapis nikan: “Noqaqa paylamanmi yärakushaq”. Saynöpis nin: “Tayta Dios qomashqan wamräkunawanmi kaycho kaykä”.
[14] Diospa wamrankuna ushakaqla kayaptinmi Jesucristupis noqansino yurirqan y noqansino wanurqan. Sayno wanurmi wanuypaq munayyuq diabluta vincirqan.
[15] Saynöpami wanuyta mansariykar kawashqansipita jorqamashkansi. Kananqa wanuytapis mananami mansarinsinasu.
[16] Jesucristuqa manami angilkunata yanapänanpaqsu shamurqan, saypa trukanqa Abraham ayllu kaqkunata yanapänanpaqmi.
[17] Yanapämänansipaqmi noqansinöla kay pasacho runa karqan. Saynöpami Tayta Diospa nawpancho kuyapäkuq y lapantapis cumpliq mandaq cüra rikakurqan. Paymi sacrificiu kash jusansikunapita Tayta Dios perdonamänansipaq.
[18] Jesucristutapis Satanás tentar nakasish kaptinmi noqansitapis tentamaptinsi Jesucristo yanapämäshun.