[1] Unay Israel runakunata jamayman yaykasinanpaq promitishqannölami noqansitapis Tayta Dios nikämansi jamayman yaykasimänansipaq kashqanta. Sayno promitiykämashqaqa cuidä payta mana cäsukur say jamayman yaykushwansu.
[2] Unay Israel runakuna Tayta Diospa wilakuyninta musyayashqannömi noqansipis musyansi. Say runakunaqa musyaykarpis mana criyiyashqanpitami Tayta Dios promitishqan jamayman yaykuyarqansu.
[3] Noqansimi isanqa payman criyir promitimashqansi jamayman yaykushun. Mana criyiqkunapaqmi Tayta Dios nirqan: “Rabyarmi kayno nir jurarqä: ‘Paykunaqa promitishqä jamayman manami yaykuyanqasu’ ”. Mana criyiqkuna Tayta Dios promitishqan jamayman mana yaykuyaptinpis kay pasata kamashqanpita pasami say jamayman yaykunansipaq kamarish kaykan.
[4] Kamarish kaykashqanta musyansi qanchis kaq junaqpita palabrancho kayno niptinmi: “Lapanta kamarkurmi qanchis kaq junaqcho Tayta Dios jamarqan”.
[5] Mastapis kaynömi nikan: “Paykunaqa promitishqä jamayman manami yaykuyanqasu”.
[6] Say nishqannölami unay Israel runakuna Tayta Diospa wilakuyninta chaskikush kaykarpis mana cäsukuyashpan say jamayman yaykuyarqansu. Sayno kaptinpis say jamay kaykanraqmi yaykunansipaq.
[7] Say jamayman yaykunansipaqmi Tayta Dios tantiyasiptin David kayno nir qelqarqan: “Tayta Dios nishqanta kanan junaq wiyaykarqa chukru shonqu ama kayaysu”.
[8] Israel runakunata Canaánman pusharpis Josuéqa manami paykunata jamayman yaykasirqansu. Yaykasish kaptinqa Tayta Dios manami yapayqa rimakunmansu karqan.
[9] Saymi Tayta Diosman yärakuq runakunapaqqa kaykanraq jamayman yaykuyänanpaq.
[10] Kay pasata kamar ushaskir Tayta Dios jamashqannömi noqansipis say jamayman yaykur lapan nakashqansikunapita jamashun.
[11] Sayno kaykaptinqa shumaq yarpachakushun Tayta Dios kamarishqan jamayman yaykunansipaq. Israel runakunano mana wiyakuq karqa noqansipis manami yaykushunsu.
[12] Tayta Diospa palabran kawaq karmi munayyuq kaykan. Ishkan waqtanpa ali afilash espädapitapis mas fïlu karmi shonqunsimanpis, yarpayninsimanpis y toqshunsimanpis chaykun imano kashqansitapis tantiyasimänansipaq.
[13] Lapan kamashqankuna nawilancho kaptinmi Tayta Diospita pakakuyta kamäpakunsisu. Imata rurashqapis payqa rikaykämansimi. Imanöpis kawashqansiman tupumi payta cuentata qoshun.
[14] Tayta Diospa Surin Jesucristo gloriacho mandaq cüra kaykaptinqa qepaman mana kutikuypa imaypis payman yärakushun.
[15] Kay pasacho kaptinmi mandaq cüransi Jesucristuta noqansitano Satanás tukuynöpa tentarqan. Sayno tentaptinpis manami jusalikurqansu. Saymi noqansitapis Satanás tentamash kuyapämashpansi Jesucristo yanapämansi.
[16] Imaypis yanapämänansipaq kaykaptinqa kuyapäkuq Tayta Diosta mana mansapaypa manakushun. Payta manakurqa trönuncho paywan parlaykaqnömi kaykansi. Tayta Diosta manakushqaqa ima nakaycho kashqapis paymi kuyapämashpansi yanapämäshun.