<Hebreos 11

[1] Tayta Diosman yärakurmi musyansi pay promitimashqansikunata cumplinanpaq kashqanta. Saymi promitimashqansikunata manaraq rikarpis chaskikunansipaq shuyaraykansi.

[2] Tayta Diosman yärakuq unay runakunapis Diospa shonqunpaqnömi kawayarqan.

[3] Tayta Diosman yärakurqa tantiyansi pay niptilan kay pasapis jana pasapis yuriskishqanta. Lapan rikaykashqansitapis imapis mana kashqanpitami kamarqan.

[4] Abelpis Tayta Diosman yärakurmi wawqin Caínpita mas alinnin kaq sacrificiuta Tayta Diospaq rupasirqan. Abel rupasishqanta chaskirmi Tayta Dios musyasirqan ali runa kashqanta. Abel unayna ushakäkush kaykaptinpis rurashqanta kananyaqmi yarpansi.

[5] Enoctapis Tayta Diosman yärakuptinmi kawaykaqta Tayta Dios pushakurqan. Tayta Diospa palabranchöpis nikan Tayta Dios munashqanno Enoc kawashqantami.

[6] Yärakuyninsi mana kaptinqa manami imanöpapis Tayta Dios munashqanno kawashunsu. Tayta Diosman yärakurqa pay kashqanta criyishunmi. Saynöpis criyishun payta ashiqkunata yanapashqantami.

[7] Noépis Tayta Diosman yärakurmi arcata rurarqan diluviupita surinkunawan y lumsuyninkunawan salvakuyänanpaq. Diluviu kananpaq kashqanta Tayta Dios wilaptinmi diluviuta manaraq rikarpis arcata rurarqan. Saymi mana yärakuq runakunata Tayta Dios ushakäsirpis Noéta salvar jusaynaqta chaskirqan.

[8] Abrahampis Tayta Diosman yärakurmi markanta kachariykur Tayta Dios qoykunanpaq kaq nacionman aywakurqan. May nacionman chänanpaq kashqantapis mana musyaykarmi aywakurqan.

[9] Tayta Dios promitishqan nacionman charpis payman yärakurmi toldukunalacho jäpa runanöla tarqan. Abrahamtano Tayta Dios promitiptinmi Isaacpis y Jacobpis saynöla täyarqan.

[10] Abraham sayno tarqan Tayta Dios sharkasishqan mana ushakaq markaman chänanpaq kashqanta musyarmi.

[11] Sarapis Tayta Diosman yärakurmi chakwanyashqanyaq qoluq kaykarpis qeshyaq rikakurqan. Pay criyirqan Tayta Dios promitishqanta cumplinanpaq kashqantami.

[12] Saynöpami Abraham pasaypa awkinna kaykaptinpis surin yurirqan. Nirkurnami paypa surin y surinpita miraqkunapis jatun nación kashqanyaq mirayarqan. Paykunami yupaytapis mana atipaypaq qoyllarnöraq y lamar kuchuncho aqushanöraq saysika kaykäyan.

[13] Tayta Dios promitishqanta manaraq chaskirpis Abraham, Sara, Isaac y Jacob payman yärakuykälarmi wanuyarqan. Manaraq chaskirpis Tayta Dios cumpliykashqanta rikarmi kushikuyarqan. Paykunaqa kay pasacho qorpanöla kayashqantami tantiyakuyarqan.

[14] Sayno tantiyarmi jana pasacho kaykaq markaman aywakuyänanpaq shuyakuykäyarqan.

[15] Paykuna manami yarpäyarqansu unay täyashqan markanman kutiyta. Markanpaq lakikurqa imaykanöpapis kutikuyanmanmi karqan.

[16] Markanpaq lakikuyänanpa trukanqa jana pasacho kaykaq mas ali kaq markapaqmi yarparäyarqan. Saymi paykunapa Diosnin kayta Tayta Dios penqakunsu. Say markataqa kamarishlatanami paykunata shuyaraykäsin.

[17] Abrahampis Tayta Diosman yärakurmi juklayla surin Isaacta altarcho rupasinanpaq Tayta Dios niptin rupasinanpaq pusharqan.

[18] Sayno pusharqan Isaacpita askaman mirananpaq Tayta Dios promitish kaykaptinpis.

[19] Saymi yarparqan wanusiptinpis Isaacta kawarisimunanpaq kashqanta. Rasunpaypami kawarimushtano Abraham payta chaskirqan.

[20] Isaacpis Tayta Diosman yärakurmi Jacobta y Esaúta bendicionninta qorqan.

[21] Jacobpis Tayta Diosman yärakurmi Josépa surinkunata bendicionninta qorqan. Wanunanpaqna kaykar bendicionninta qoshpanmi tukrunman tuknakuykur Tayta Diosta adorarqan.

[22] Josépis Tayta Diosman yärakurmi Israel mayinkunata wilarqan Egiptupita yarquyänanpaq kayashqanta. Wanunanpaqna kashqanta musyarmi paykunata nirqan: “Kaypita aywakuyashpayki tulükunatapis apakurkuyanki”.

[23] Moiséspa maman taytanpis Tayta Diosman yärakurmi Faraón mandashqanta wiyakuyarqansu. Saymi Moisés yuriptin kuyaylapaq kashqanta rikaykur kimsa killantin pakaräsikuyarqan.

[24] Moiséspis Tayta Diosman yärakurmi poqukarkurnaqa Faraónpa warmi surinpa wawan kayta munarqansu.

[25] Saymi Faraónpa wayincho jusalikular kawananpa trukanqa Israel mayinkunawan nakar kawarqan.

[26] Tayta Diospita premiuta chaskinanpaq kashqanta musyarmi Egiptucho rïcu kayta munarqansu, sinöqa Cristo nakananpaq kashqanno nakashqan mas ali kashqantami tantiyarqan.

[27] Tayta Diosman Moisés yärakurmi Faraónta mana mansaypa Tayta Diosta rikaykaqno Egiptupita aywakurqan.

[28] Tayta Diosman yärakurmi Israel runakunata nirqan Pascua fiestata rurar punkupa quiciunninkunata yawarwan lushiyänanpaq. Sayno lushisirqan wanusikuq ángel yawarta rikar Israel runakunapa wayinkunacho qechpa surinkunata mana wanusinanpaqmi.

[29] Israel runakunapis Tayta Diosman yärakurmi Puka Lamarta sakilapa päsayarqan. Egipto runakunami isanqa qepanta yaykuyashqancho shenqaypa wanuyarqan.

[30] Tayta Diosman yärakur Israel runakuna Jericó markata qanchis junaq tumapaykäyaptinmi murällanpis juchurqan.

[31] Prostitüta warmi Rahabpis Tayta Diosman yärakurmi rikapakuq Israel runakunata kushish chaskikurqan. Saynöpami mana cäsukuq runakuna ushakäyaptinpis payqa ushakarqansu.

[32] Tayta Diosman yärakuqkunaqa maspis kaykäyanraqmi. Isanqa tiempumi kansu Gedeónpita, Baracpita, Sansónpita, Jeftépita, Davidpita, Samuelpita y profëtakunapita wilapänäpaq.

[33] Tayta Diosman yärakurmi wakinqa nacionkunata sarikurkuyarqan, wakinqa runakunata ali juzgayarqan y wakinnami Tayta Dios promitishqanta chaskiyarqan. Wakintaqa leonkunapis manami mikuyarqansu.

[34] Wakintaqa ninapis manami ruparqansu. Wakinnami espädawan wanusiyänanpaq kaykaptinpis qeshpiyarqan. Valorniynaqkunatapis valurayänanpaqmi Tayta Dios yanaparqan. Saymi juk nacionpita shamuq soldädukunatapis Tayta Diosman yärakur vinciyarqan.

[35] Saynölami Tayta Diosman yärakuq warmikunapis rikayarqan wanush sutaraykaq wawankuna kawariyämushqanta. Wakintanami nakasiypa wanusiyarqan. Tayta Diosta ñëgasiyänan kash nakasiyaptinpis Tayta Dios kawarisimunanpaq kashqanta musyar manami ñëgayarqansu.

[36] Saynölami wakin nakayarqan runakuna ashliyaptin, astayaptin y carcilman wichqayaptin.

[37] Wakintami samqaypa wanusiyarqan. Wakintami serruchuwan kusuypa wanusiyarqan. Wakintanami espädawan wanusiyarqan. Wakinnami pasaypa pobri kar uysha qarasalapita y cabra pirqashlapita mödanankuna jatish markan markan chikiytukush puriyarqan.

[38] Runakuna chikiyaptinmi saki jirkakunapa y sunyaq raqrakunapa purir machaykunaman pakakuyaq. Tayta Diosman mana yärakuqkunaqa manami mayqanpis paykunano ali kayarqansu.

[39] Yärakuyashqanpita Tayta Dios paykunata ali rikaptinpis kay pasacho manami mayqanpis Tayta Dios promitishqanta chaskiyarqansu.

[40] Saypa trukanqa mas ali kaqta chaskikuyänantami Tayta Dios munarqan. Saynöpami paykunapis y noqansipis promitishqan salvacionta iwal chaskishun.