<1 Corintios - Corinto markacho taq yärakuq mayinkunaman apóstol Pablo punta kaq cartata cartakushqan 9

[1] ¿Manaku libri kaykä? ¿Manaku apostolpis kaykä? ¿Manaku Señor Jesucristutapis rikashkä? ¿Manaku qamkunapis wilapaptïraq Jesucristuta chaskikuyashkanki?

[2] Wakinkuna apóstol kashqäta mana tantiyayaptinpis qamkunami isanqa tantiyayanki. Saymi wilapashqäta criyir Jesucristuman yärakuykäyanki.

[3] Apóstol kashqäta manakaqman churamaqkuna tantiyakuyänanpaqmi sayno nï.

[4] Apóstol kayaptïmi wilakuyashqäpita mikuyänäpaq y upuyänäpaq noqakunapapis derëchükuna kan.

[5] Wakin apostolkuna, Señor Jesucristupa wawqinkuna y Cefaspis warminkunawan puriyashqannömi noqakunapapis warmïkunawan puriyänäpaq derëchükuna kaykan.

[6] ¿Imanirtaq yarpäyanki Bernabétawan noqalata mana yanapäyämänaykipaq kashqanta?

[7] ¿Mayqan soldädutaq kikinpa gastunwan soldädu kayman yaykun? ¿Pï runataq plantashqan üvapa wayuyninta mana uchunsu? Saynöpis ¿pï runataq misishqan cabranpa o wäkanpa lëchinta mana upunsu?

[8] Saytaqa manami kikïpa yarpayläpitasu nikä. Moisés qelqashqan leykunachöpis saypitaqa qelqaraykanmi.

[9] Saychömi kayno qelqaraykan: “Ëracho trillaptin töruta ama shinqalwayankisu”. Tayta Dios sayno nirqan ¿törukunapaqku

[10] o noqansipaqku? Sayno qelqaraykan noqansipaqmi. Yapyapakuqpis trïgu wirupakuqpis paylayta chaskiyänan raykumi arupakuyan.

[11] Noqakunapis Jesucristupa wilakuyninta qamkunata wilapar muruta muruq japuymi kayashkä. Saymi cosëchacho paylayta chaskiqno qamkunapita imalatapis chaskiyäman.

[12] Wakintapis yanapaykarqa noqakunata masraqmi yanapäyämankiman. Yanapäyämänayki kaykaptinpis manami qamkunata manakuyashkäsu. Saypa trukanqa Jesucristupa wilakuyninta chaskikuyänaykipaq ima sapapis kananta mana munarmi nakarpis upälakuyashkä.

[13] ¿Manaku musyayanki templucho y altarcho aruqkunaqa templuman apayashqan mikuypita mikuyashqanta?

[14] Saynölami Jesucristupa wilakuyninta wilakuqkunapis wilakuyashqanpita chaskiyanman. Sayno kananpaqmi Señor Jesucristupis nirqan.

[15] Sayno chaskinäpaq derëchü kaptinpis manami imaypis manakushkäsu ni kananpis manami manakuykäsu. Noqapa tantiyaynïpitaqa manakunäpa trukan mejor wanukümanpis. Mana manakushqäpita manami lakiküsu, sinöqa kushikümi.

[16] Jesucristupa ali wilakuyninta imaykanöpapis wilakunä kaptin wilakushqäpita manami alabaküsu. Mana wilakuptï imaptïqa ¡Tayta Dios castigamäsun!

[17] Kikïpa yarpayläpita wilakurqa yanapämänaykipaq manakümanmi. Tayta Dios wilakunäpaq churamash kaptinmi mana manakuylapa wilakuykä.

[18] [Jesucristupa] ali wilakuyninta wilakushqäpita qellayta mana chaskiptïpis jukmi pägü kaykan. Say pägüqa kaykan wilakushqäpita manakunäpaq derëchü kaykaptinpis mana manakuylapa wilakushqämi.

[19] Libri karpis runakuna tantiyakur salvakuyänanpaqmi lapan runakunapa ashmaynin japuy kaykä.

[20] Saymi Israel runakunawan shuntakarqa paykuna kawayashqanno noqapis kawaykä. Moisés qelqashqan leykunata paykuna cumpliyashqannömi noqapis cumpliykä. Say leykunapa munaynincho mana karpis sayno kawä Israel runakuna tantiyakur Jesucristuta chaskikuyänan raykumi.

[21] Saynölami Moisés qelqashqan leykunata mana cäsukuq runakunawan shuntakarpis paykuna kawayashqanno kawaykä. Sayno kawaykä paykunapis Jesucristuta chaskikuyänan raykumi. Paykunawan shuntakar Moisés qelqashqan leykunata mana cumplirpis mana jusalikuypami Jesucristo munashqannöla kawaykä.

[22] Saynölami mana tantiyaqkunawan shuntakarpis paykuna kawayashqanno noqapis kawä. Sayno kawä Jesucristuman yärakuyänan raykumi. Saynöpami runa imano kaptinpis say runano kawä. Sayno kawä wakilanpis salvakuyänanpaqmi.

[23] Lapantapis rurä Jesucristupa ali wilakuyninta runakuna chaskikuyänan raykumi. Saynöpami Jesucristuta chaskikuqkuna kushikuyashqanno noqapis kushikushaq.

[24] Qamkuna musyayankimi askaq cörrirpis ali cörriq kaqla premiuta chaskishqanta. Qamkunapis Tayta Diospita premiuta chaskiyänaykipaq shumaq kawayay.

[25] Cörriqkuna shumaq kamarikuyashqanta tantiyakuyay. Paykuna sayno kamarikuyan gänar ushakaq corönata chaskiyänalanpaqmi. Noqansimi isanqa kamarikuykansi mana ushakaq corönata chaskinansipaq.

[26] Saymi yalinakuycho pantar jukläpa cörriq runanösu ni pelyacho wayralata kutaq runanösu kawä.

[27] Saypa trukanqa cörrinanpaq kamarikuq runa imano nakarpis kamarikushqannömi noqapis Tayta Dios munashqanno kawaykä. Manasayqa wakinta shumaq yacharkasirpis Diospa nawpanman manataq kikï chaykümansu.