<1 Corintios - Corinto markacho taq yärakuq mayinkunaman apóstol Pablo punta kaq cartata cartakushqan 15

[1] Wawqi panikuna, Jesucristupa wilakuyninta wilapashqäta yarpäyay. Wilapashqäta chaskikurmi Tayta Diosman yärakuykäyanki.

[2] Say wilapashqäno kawarqa salvakuyankimi. Sayno mana kawarqa walälapaqmi chaskikuyashkanki.

[3] Yachakushlätami mas puntatapis qamkunata yachasirqä. Say yachasishqä kaynömi nikan: Tayta Diospa palabran nishqannölami jusansipita perdonamänansipaq Jesucristo wanurqan.

[4] Saynöpis nishqannölami Jesucristo wanur pamparashqanpita kimsa junaqta kawarimurqan.

[5] Kawarirkamurnami Cefasta yuriparqan. Saypitanami chunka ishkay apostolninkunata yuriparqan.

[6] Saypitanami pisqa pachak (500) wawqi panikuna shuntakash kaykäyaqtapis yuriparqan. Sayno yuripashqanta rikaq wawqi panikuna juk ishkay wanukuyashna kayaptinpis wakinqa kawaykäyanraqmi.

[7] Santiaguta yuriparkurnami wakin apostolninkunatapis yuriparqan.

[8] Saypitaraqmi imayka shulu japuy mana väliq kaykaptïpis noqata yuripämarqan.

[9] Manaraq yuripämaptinqa Tayta Diosman yärakuqkunata qatikacharmi ushaq kä. Sayno rurash karmi wakin apostolkunamanqa imalanmanpis tinküsu. Apóstol kanäpaqpis manami välïsu.

[10] Sayno kaykarpis Tayta Dios kuyapämaptinmi apóstol kaykä. Wakin apostolkunapitapis masraq Jesucristupa wilakuyninta wilakurmi tantiyakü Tayta Dios alipaq kuyapämashqanta. Imano kaptinpis Tayta Dios yanapämaptinmi wilakuykä.

[11] Mayqäkuna wilakurpis Jesucristupa wilakuynintami wilakuykäyä. Wilakuyashqäta wiyarmi qamkunapis Jesucristuta chaskikuyashkanki.

[12] Jesucristo kawarimushqanta wilakuykäyaptïqa ¿imanirtaq wakinniki nikäyanki wanushkuna mana kawariyämunanpaq kashqanta?

[13] Wanushkuna mana kawariyämunanpaq kaptinqa Jesucristupis manami kawarimunmansu karqan.

[14] Mana kawarimush kaptinqa walälami wilakuynintapis wilaküman. Sayno kaptinqa Jesucristuman walälami yärakuyankiman karqan.

[15] Wanushkuna mana kawariyämunanpaq kaptinqa Jesucristuta Tayta Dios kawarisimushqanta wilakurpis lulakurmi puriyäman.

[16] Wanushkuna mana kawariyämunanpaq kaptinqa Jesucristupis manami kawarimunmansu karqan.

[17] Y Jesucristo mana kawarimush kaptinqa payman yärakuyashqaykipis manakaqlapaqmi kanman. Jusalikuyashqaykipitapis manami perdonashsu kaykäyankiman.

[18] Sayno kaptinqa Jesucristuman yärakuykar wanuqkunapis wanuyashlanchömi usharäyanman.

[19] Jesucristo kay vïdalacho yanapämänansipaq kashqanta criyirqa lapan runapitapis mas kuyapaypaqmi kaykansi.

[20] Jesucristuqa rasunpaypami wanushqanpita kawarimush. Pay puntata kawarimush kaptinmi musyansi noqansipis kawarimunansipaq kashqanta.

[21] Juk runala jusalikushqanpita lapansipis wanunansipaq kashqansinölami juk runala kawarimushqanpita lapansipis kawarimunansipaq kaykansi.

[22] Adán jusalikushqanpitami lapansipis wanukuqla kaykansi. Jesucristo kawarimushqanpitami isanqa lapansi kawarimushun.

[23] Kawarimurqa Tayta Dios kamakäsishqannömi kawarimushun. Puntataqa Jesucristutami Tayta Dios kawarisimush. Jesucristo kutimuptinraqmi payta chaskikuqkunata kawarisimunqa.

[24] Saypitanami juiciu final kanqa. Saychönami Satanásta y lapan supaykunata Jesucristo ushakäsinqa. Nirkurnami Tayta Diospa munayninman lapanta churanqa.

[25] Contrankunata vincishqanyaqmi lapantapis Jesucristo makincho sararanqa.

[26] Vinciykurnami wanuytapis vincinqa.

[27] Tayta Diospa palabranchöpis Jesucristupaq kaynömi nikan: “Paypa makinmanmi lapantapis Tayta Dios churash”. Paypa makinman lapanta churashqanta nirpis manami kikin Tayta Dios paypa makincho kashqantasu nikan. Saypa trukanqa Tayta Diosmi Jesucristupa makinman lapanta churash.

[28] Paypa makinman lapantapis churashna kaptinmi Tayta Diospa makinman lapanta kutisinqa. Saynöpami Tayta Dios lapan imaykatapis makincho sararanqa.

[29] Wawqi panikuna, ¿imanirtaq yarpaykäyanki wanushkuna mana kawariyämunanpaq kashqanta? Wanushkunata Tayta Dios mana kawarisimunanpaq kaptinqa ¿imalapaqtaq wanushkunapa jutincho wakinniki bautizakuyankipis?

[30] Saynöpis wanushkuna mana kawariyämunanpaq kaptinqa ¿imalapaqtaq wanuy kawaypis wilakur puriykäyäman?

[31] Wawqi panikuna, waran waranmi wanusimayta munaykäyan. Sayno kaptinpis Señor Jesucristuta chaskikuyashqaykipitami kushikü.

[32] Éfeso markachöpis chikiyämashpan fiyu uywanömi wanusiyämayta munayarqan. Wanushkuna mana kawariyämunanpaq kaptinqa ¿imalapaqtaq sayjinanpa chikishqapis purïman? Saypa trukanqa kaynömi nïman: “Kawashqansiyaq mikushun upushun. Wanukurqa pachansitami apakushun”.

[33] Lutanta ama yarpäyaysu: mana ali amïgukunaqa ali runakunatapis mana ali ruraykunamanmi inkitayan.

[34] Shumaq tantiyakur jusalikuykunata kachariyayna. Wakinnikiqa Tayta Diospa wilakuyninta manami shumaqsu tantiyaykäyanki. Sayno kayashqayki penqaypaqmi kaykan.

[35] Wanushkuna kawariyämunanpaq kashqanta mana criyirmi wakinniki nikäyanki: “¿Imanöpanashi wanushkuna kawariyämunman? Kawariyämuptin ¿imanöraq cuerpunkuna kanqa?”

[36] Sayno yarparqa ¡upa yarpayyuqmi kaykäyanki! Imatapis murur mana pampaptinsiqa manami winamunsu.

[37] Saynöpis manami yürantasu murunsi, saypa trukanqa trïgu kaptinpis o mayqan saki mikuy kaptinpis murutami murunsi.

[38] Muruskiyaptinqa Tayta Diosmi winasimun. Cada casta murupitami Tayta Dios munashqannöla yüranta winasimun.

[39] Runapis, uywapis, pajaqpis y pescädupis jukniraq jukniraqmi kaykäyan.

[40] Jana pasacho kaqkunapis manami kay pasacho kaqkunanösu kaykäyan.

[41] Saynölami intipis, killapis y qoyllarkunapis jukno jukno asikyäyan.

[42] Saynölami runa wanushqanpita kawarimuptin cuerpun mushuqna kanqa. Pampayashqan kaqqa ushakanqami. Kawarimuq kaqmi isanqa ushakanqanasu.

[43] Pampayashqan kaqqa ismunqami. Kawarimuq kaqmi isanqa kuyaylapaq kanqa. Pampayashqan kaqqa elaqanqami. Kawarimuq kaqmi isanqa elaqanqasu.

[44] Yurishqansi cuerpuqa kay pasacho kawanalansipaqmi kaykan. Kawarimuq cuerpumi isanqa mushuq pasacho kawanansipaq kanqa. Kay pasacho kawanansipaq kaq cuerpupis kanmi y mushuq pasacho kawanansipaq kaq cuerpupis kanqami.

[45] Tayta Diospa palabranchöpis kaynömi qelqaraykan: “Punta kaq Adántami kawaq runa kananpaq kamarqan”. Qepa kaq Adántami isanqa kawasikuq espíritu kananpaq kawarisimush.

[46] Manami mushuq pasacho kawanansipaq kaq cuerputasu puntata chaskinsi, sinöqa kay pasacho kawanansipaq kaq cuerputami. Saypitaraqmi mushuq pasacho kawanansipaq kaq cuerputa chaskinsi.

[47] Punta kaq runaqa alpapitami karqan. Qepa kaq runa [Señor Jesucristumi] isanqa jana pasapita kaykan.

[48] Kay pasacho kawanansipaq kaq cuerpunsiqa alpapita rurash Adánpa cuerpunnölami kaykan. Mushuq pasacho kawanansipaq kaq cuerpunsimi isanqa jana pasacho taykaq Jesucristupa cuerpunno kanqa.

[49] Kananqa alpapita rurash Adán niraqlami kaykansi. Saypitanami jana pasacho taykaq Jesucristunöna kashun.

[50] Wawqi panikuna, shumaq tantiyakuyay. Aysantin tuluntinqa manami pipis Tayta Dios mandaykashqanman chanqasu. Ushakaq cuerpunsiqa manami mushuq pasacho kawanansipaqsu kaykan, sinöqa kay pasacho kawanalansipaqmi.

[51] Tayta Dios pitapis mana musyasishqanta musyayänaykitami munä: Manami lapansiraqsu wanushun. Isanqa lapansitami mushuq cuerputa Tayta Dios qomäshun.

[52] Mushuq cuerpuyuqqa elaqpita tikrashun ultimu kaq cornëtata tukaskamuptinmi. Say junaqmi mana ushakaq mushuq cuerpuyuqna wanushkuna kawariyämunqa. Saynölami noqansi kawaykaqkunapis mushuq cuerpuyuq rikakushun.

[53] Ushakaqla kashqansipitami mana ushakaqna tikrashun. Wanukuqla kashqansipitami mana wanuqna tikrashun.

[54] Ushakaqla cuerpunsi mana ushakaqmanna tikraptinmi y wanukuqla kashqansipita manana wanunansipaqna tikraptinsimi Tayta Diospa palabran kayno nishqan cumplikanqa: “¡Wanuyqa vincishnami kaykan!

[55] Wanuy, ¡maychötaq munayniki kaykan! Sepultüra, ¡maychötaq mikukuq kayniki kaykan!”

[56] Wanuy ushakäsimansi jusalikuptinsimi. Jusapis Tayta Diospa leyninkunapitaraqmi ishkisimänansipaq munayninta chaskin.

[57] Sayno kaptinpis Señor Jesucristuta kawarisimurmi wanuypita Tayta Dios salvamansi. Saypita payta imaypis agradëcikushun.

[58] Sayno kaykaptinqa, kuyay wawqi panikuna, mana qelanaypa y mana ajayaypa Señor Jesucristuta imaypis sirviyay. Musyayashqaykinöpis payta sirviyashqayki manami manakaqlapaqsu kaykan.