<1 Corintios - Corinto markacho taq yärakuq mayinkunaman apóstol Pablo punta kaq cartata cartakushqan 5

[1] Qamkunacho juk runa madrastanwan taykashqantami musyashkä. Paywan tarqa pasaypa penqakuypaq fornicación jusatami jusalikuykan. Sayno runataqa Jesucristuta mana chaskikuq runakunapis seqaypami jamuräyan.

[2] Sayno kaykaptinqa ¿imanirtaq penqakuyankisu? Penqakuyänaykipa trukan kushikuykäyankimi. Say niraq runataqa ¿imanirtaq shuntakäyashqaykipita qarquyankisu?

[3] Qamkuna kaqcho mana kaykarpis nawpaykicho kaykaq japuymi kaykä. Saymi say runataqa mayna juzgashkä.

[4] Señor Jesucristupa jutincho shuntakäyaptiki noqapis qamkunawan kaykaq japuymi kaykäshaq y munayyuq Jesucristupis qamkunawanmi kaykanqa.

[5] Sayno kaykaptinqa say runata Satanáspa munayninman kachapaykuyay. Saycho nakar jusanta kachariptinraqmi Señor Jesucristo kutimur salvanqa.

[6] Say runata mana qarqurqa alabakurpis mana alitami ruraykäyanki. ¿Manaku musyayanki say jusaqa walka levadürala mäsata jakasishqanno kashqanta?

[7] Sayno kaykaptinqa qamkunacho kaykaq levadürata jitariqno say runata qarquyay. Saynöpami mushuq mäsapita rurash levadüraynaq tantano kayankipaq. Pascua carnishno Jesucristo [noqansi rayku] wanusish kaptinmi rasunpaypa levadüraynaq tantano kayanki.

[8] Sayno kaykaptinqa Pascua fiestata rurar levadürata jitariqno jusalikuykunata y mana ali ruraykunata kacharishun. Sayno kacharir Tayta Diospa wilakuynin nishqanman tupu kawashun.

[9] Puntata cartakamushqächöpis maynami nishkä fornicación jusata jusalikuq runakunawan mana shuntakäyänaykipaq.

[10] Manami lapan sayno kawaq runakunapita witikuyänaykipaqsu sayno nikä. Saynöpis manami lapan wachakash runakunapita, suwakunapita y ïdulukunaman yärakuq runakunapita witikuyänaykipaqsu nikä. Paykunawan mana shuntakarqa ¿mayparaq aywayankiman?

[11] Sayno kaptinpis wakin runakunaqa “Jesucristumanmi yärakü” nikarmi fornicación jusacho kayan, imapaqpis wachakash kayan, ïdulukunaman yärakuyan, runapa washanta rimayan, borrächu kayan y suwakuyan. Paykunawan mana shuntakäyänaykipaqmi nikä. Paykunawanqa mikuyänalaykipaqpis ama shuntakäyaysu.

[12] Noqansi manami munayyuqsu kansi Jesucristuman mana yärakuqkunata juzganansipaq. Jesucristuta chaskikuq mayinsikuna jusalikuyaptinmi isanqa juzganansipaq y corriginansipaqpis munayyuq kaykansi.

[13] Jesucristuta mana chaskikuq runakunataqa kikin Diosmi juzganqa. Jesucristuta chaskikuq mayikikunata corrigiyänaykipaq munayyuq kaykarqa madrastanwan kakuq runataqa qarquyay. Saynöpami mana ali ruraykuna qamkunacho kanqasu.