<1 Corintios - Corinto markacho taq yärakuq mayinkunaman apóstol Pablo punta kaq cartata cartakushqan 6

[1] Qamkuna imalapitapis rimanakur ¿imanirtaq Tayta Diosta mana mansapakuq autoridäkunaman quejakuq aywaykäyanki? ¿Imanirtaq kikikipura arreglayankisu?

[2] ¿Manaku musyayanki Jesucristuta mana yärakuq runakunata juzganansipaq Tayta Dios churamänansipaq kashqanta? Sayno kaykaptinqa imapis kaptin ¿imanirtaq kikikipura arreglayankisu?

[3] ¿Manaku musyayanki angilkunatapis juzganansipaq kashqanta? Sayno kanansipaq kaykaptinqa ¿imanirtaq wawqi panikuna rimanakuyaptin arreglashwansu?

[4] Mayqan yärakuq mayikiwanpis rimanakuyashpayki ¿imanirtaq Jesucristuman mana yärakuq autoridäkunamanraq aywaykäyanki?

[5] ¿Manaku penqakuyta yachayanki? ¿Manaku qamkunacho pilapis kan Jesúsman yärakuqpura rimanakuyaptiki arreglayäshunaykipaq?

[6] Kikikipura arreglayänaykipa trukan Jesucristuman mana yärakuq autoridäkunamanraq quejakuq aywayashqayki manami alisu.

[7] Yärakuqpura quejanakurqa mana alitami ruraykäyanki. Quejanakuyänaykipa trukanqa rabyanäsiyäshuptikipis ¿imanirtaq upälakuyankisu? Suwapäyäshuptikipis ¿imanirtaq “jina apakusunpis” niyankisu?

[8] Qamkunaqa kikikipurami penqaypaq quejanakuykäyanki y suwapänakuykäyanki.

[9] ¿Manaku musyayanki jusalikur kawaq runakunaqa Tayta Dios mandaykashqanman mana yaykuyänanpaq kayashqanta? Shumaq tantiyakuyay: Tayta Dios mandaykashqanman manami yaykuyanqasu fornicación jusata jusalikuqkuna, ïdulukunaman yärakuqkuna, majanta jarukuqkuna, prostitüta warmino puriq maqtakuna, olqupura kakuqkuna, suwakuqkuna, wachakashkuna, borrächukuna, washarimakuna y sakyapakuqkunapis.

[11] Qamkunapis wakinnikiqa nawpata saynömi jusalikur kawayarqayki. Kananmi isanqa Señor Jesucristupa jutincho Diosninsipa Espïritunwan jusaykikunapita maylashna kaykäyanki, santuna kaykäyanki y jusaynaqna kaykäyanki.

[12] Qamkuna nikäyanki munayashqaykita rurayänaykipaq librina kaykäyashqaykitami. Sayno kaptinpis manami lapantasu rurayankiman. Manami jusalikur kawanansipaqsu libri kaykansi, sinöqa Tayta Dios munashqanno kawanansipaqmi.

[13] Wakinnikiqa niyanki: “Mikuyqa pachansipaqmi y pachansipis mikuypaqmi”. Sayno niyaptikipis Tayta Diosmi pachansitapis mikuytapis ushakäsinqa. Saynölami cuerpunsipis fornicación jusata jusalikunansipaqsu kaykan, sinöqa Señor Jesucristo munashqanno kawanansipaqmi.

[14] Tayta Dios payta kawarisimushqannömi noqansitapis munayninwan kawarisimäshun.

[15] ¿Manaku musyayanki Jesucristuwan juklaylano kayashqaykita? ¿Paywan juklaylano kaykarsuraq prostitüta warmiwan kakuyankiman? Saynöqa ama kayaysu.

[16] ¿Manaku musyayanki juk runa prostitüta warmiwan kakurqa paywan juk cuerpunölana kashqanta? Tayta Diospa palabranchöpis kaynömi nikan: “Ishkaq karpis juklaylanömi kayanqa”.

[17] Say nishqannölami Jesucristuman yärakurqa Jesucristuwan juklaylanöna kaykansi.

[18] ¡Fornicación jusalikuypita witikuyay! Wakin jusakunata jusalikurqa manami cuerpuykitasu qanrataykäyanki. Fornicación jusata jusalikuymi isanqa cuerpuykita qanrataykäyanki.

[19] ¿Manaku musyayanki Tayta Dios qoyäshushqayki Espíritu Santu tashqan templu kayashqaykita? Sayno kaykaptinqa cuerpuykikuna manami qamkunapasu, sinöqa Tayta Diospami.

[20] Qamkunataqa Tayta Diosmi rantiyäshushkanki. Saymi mana jusalikuypa pay munashqanno kawayänayki.