<Matiyu 27

[1] Kɛnɛ bɔnin, salakalaseba kundiilu ni kɛmɔɔbalu bɛ ka taa i ɲɔɔn ye ka Isa faa ko ɲa ɲinin.

[2] Ai ka a sili ka taa a le jamanatii Pilati fɛlɔ.

[3] Judasi min ka Isa janva, wo k'a ye mingɛ ko ai ka kiti bila Isa la ko a yi faa, a ka nimisa. Ai tɛɛ ka wɔligbɛ bisawa min di a ma, a ka seikɔ ka wo lasei salakalaseba kundiilu ni kɛmɔɔbalu ma.

[4] A vɛɛ ai yɛ: «M̀'ɛ julumbu ta, k'a masɔlɔn ǹ na hakɛtabali le janvala.» Ai vɛɛ: «Maa ko tɛ wo le. I kunko le wo le feu!»

[5] Wo lɔ, Judasi ka wɔligbɛ gbanan wolu lafili lɔhɔlɔmabonba la je, ka taa a jɛlɛ dɛn julu la ka faa.

[6] Salakalaseba kundiilu ka wɔligbɛ wo tɔmɔntɔmɔn, ai vɛɛ: «A ladaannin tɛ mɔ ma ka wɔli min bila wɔlijaabilakesu lɔ, baa mɔɔ jeli wɔli le.»

[7] Ai ka bɛn kan kelen ma ka wɔli wolu ta ka daaladanba ya gbɛkɛnɛ san ka wo kɛ lonan sudoonya le.

[8] Wo le k'a kɛ, haan ka sii bi la, mɔɔlu y'a fɔla gbɛkɛnɛ wo ma ko Mɔɔ Jeli Gbɛkɛnɛ.

[9] Kela Jelemi ka kuma min fɔ, wo ma ka fa wo lɔ, ko: «Ai ka wɔligbɛ gbanan bisawa ta, Isilanmɔɔlu ka wo kɔndɛ ka wo kɛ mɔɔ sɔɔn ne.

[10] Ai do ka daaladanba ya gbɛkɛnɛ sɔɔn di, iwo Mɔtii k'a fɔ ǹ yɛ teme.»

[11] Wo waate, ai ka Isa lalɔ jamanatii Pilati kɛɛna. Wo k'a maɲininga, a vɛɛ: «Ile le Jahudiyalu ya masakɛ le?» Isa vɛɛ: «Ile gbu le na wo fɔla.»

[12] Salakalaseba kundii ni kɛmɔɔbalu ka a jalaki ko ko ma, Isa ma wo dɔ javi.

[13] Pilati vɛɛ a yɛ: «Ai v'i jalaki ko siyama lɔ. I ma wo mɛn?»

[14] Kɛɛ Isa ma diɲa ka javili suu suu di, hali kuma kelen. Wo ka Pilati kawakoya kosɛvɛ.

[15] San san, Timinkunna Selilon na, jamanatii deinnin tɛɛ kasoden kelen ne bilala. Jama tɛɛ vɛ a fɔla a yɛ a yi min bila, a tɛɛ wo le bilala.

[16] Wo ka kɛ́ dɔ talan kaso la, min tɔɔ yi ko Balabasi. Wo tɔɔ yon tɛɛ vɛ bɔ kosɛvɛ.

[17] Jama k'ai ladɛn Pilati fɛlɔ mingɛ, a vɛɛ ai yɛ: «Ài y'a fɛ ǹ'i mɔɔ mindɛ le bila ài yɛ? Balabasi baa Isa, mɔɔlu y'a fɔla min ma ko Masa Tɔɔmasenin?»

[18] Pilati tɛɛ k'a lɔn ɲangbeya le k'a kɛ ai ka Isa don a bolo.

[19] Ka Pilati siinin to kititɛɛya lɔ, a moso ka kela lataa a ma, a vɛɛ: «I k'i sen bila mɔɔ telennin wo ya ko lɔ, baa m̀'ɛ tɔlɔya bi kibalo lɔ kosɛvɛ aa ko lɔ.»

[20] Kɛɛ salakalaseba kundiilu ni kɛmɔɔbalu ka jama lɔsun ko ai yi Pilati madiya ko a yi Balabasi bila ka Isa faa.

[21] Jamanatii k'ai maɲininga kɔtunun, a vɛɛ: «Mɔɔ fila min nɔ, ài y'a fɛ ǹ'i jene bila ài yɛ?» Ai vɛɛ: «I yi Balabasi bila.»

[22] Pilati vɛɛ ai yɛ: «Ài y'a fɛ ǹ'i mindɛ kɛ Isa la wo lɔ, mɔɔlu y'a fɔla min ma ko Masa Tɔɔmasenin?» Ai bɛ vɛɛ: «A gbaan kɔlɔman ma ka faa!»

[23] Pilati vɛɛ: «Mindɛ lɔ? A na koyon mindɛ kɛla?» Kɛɛ ai vɛ dɔ lala aiya gbanɔkan kan kɔtunun, ai vɛɛ: «A gbaan kɔlɔman ma ka faa!»

[24] Kɛɛ Pilati ka a ye mingɛ ko aa kuma tɛ foi ɲiala, ko jama mulututɔle, a ka ji ta ka a bolo lako jama ɲana. A vɛɛ ai yɛ: «Ǹ sen tɛ min faa ko lɔ. Aa ko y'ài bolo.»

[25] Mɔɔ bɛ vɛɛ: «Ale le wo le. A faa kunko yi bila ǹu ni mɔ dennu kɔ.»

[26] Wo kɛnin, a ka Balabasi bila, ka sɔdasilu lɔ Isa gbasila gbusan na, ka ban ka a lataa a gbaanya lɔ.

[27] Wo kɛ, jamanatii ya sɔdasilu ka taa Isa le jamanatii ya bon ba la, ka sɔdasi tɔ bɛ ladɛn.

[28] Ai ka aa faanilu bɔ a kanna, ka masa faani wulɛn bila a kanna.

[29] Wo kɛ, ai ka wonin julu dɔ mamɔlɔmɔlɔ ka wo kɛ masafula sawula le, ka wo bilin a kunna, ka bele dɔ don a bolokinin kɔlɔ. Ai bannin wo bɛ la, ai v'i mabilinna duu ma a kɔlɔ k'a lafɛya, ai vɛɛ: «Jahudiyalu ya masakɛ, m'i fola.»

[30] Ai k'ai daji bɔn a kan, ka bele mina a la ka a gbasi a kun nɔ siyama le.

[31] Ai bannin a lafɛyala, ai ka faani wulɛn bɔ a kanna, ka a jɛlɛ ya faanilu bila a kanna. Wo kɛnin, ai ka bɔ a le ka taa a gbaan kɔlɔman ma.

[32] Ai taatɔla, ai ka bɛn Silɛnika kɛ́ dɔ le, min tɔɔ yi ko Simɔn. Sɔdasilu ka a lɔ Isa gbaankɔlɔman tala.

[33] Ai ka taa se dingila dɔ lɔ, min tɔɔ yi ko Gɔligota. Wo kɔlɔ le ko Kunkolo Dingila.

[34] Ai senin wo ja, ai ka gbɛ jiya Isa la, basi ɲaamin tɛɛ min nɔ. A ka wo mafɛlɛn mingɛ, a ma diɲa ka wo min.

[35] Ai ka Isa gbaan kɔlɔman ma ka ban ka tombola kɛ ka aa faanilu lɔtala i ɲɔɔn wotɛ.

[36] Ai wɔlinin wo bɛ la, ai k'ai sii k'ai jando a lɔ.

[37] Ai tɛɛ ka wala dɔ gbaan Isa kunma. A faa kun sɛvɛnin tɛɛ min ma ko: «Isa le ne, Jahudiyalu ya masakɛ.»

[38] Isa ni bengannikɛba fila gbaannin tɛɛ kɔlɔmannu ma waate kelen nɔ: dɔ tɛɛ a bolokinin fɛ, dɔ tɛɛ a bolonunma fɛ.

[39] Timinbatɔlu vɛ a jɛvɛla k'ai kun nadɔn aa ko lɔ.

[40] Ai vɛɛ a yɛ: «Ile m'a fɔ ko i yi sene lɔhɔlɔmabonba tela k'a lɔ kɔtunun tele sawa kɔlɔ? I i jɛlɛ lakisi. Ni ile le Ala Den ne, jii i yi bɔ kɔlɔman na.»

[41] Wo ɲa kelen ma, salakalaseba kundiilu ni seliya kalanmɔɔlu ni kɛmɔɔbalu gbazan tɛɛ a lafɛyala, ai vɛɛ:

[42] «A na a dɔlu lakisila, kɛɛ a tɛ se a jɛlɛ lakisila. Ni a yi Isilanmɔɔlu ya masakɛ le le, a yi jii ka bɔ kɔlɔman na! Wo do vɛ kɛla, mɔ limandeyatɔ a ma.

[43] A lanin ne Ala la ka a fɔ a jɛlɛ ma Ala Den. Ni aa ko diyanin Ala yɛ, to Ala gbu y'a lakisi yi ne.›»

[44] Bengannikɛba fila minnu gbaannin tɛɛ a dafɛ, wolu gbazan tɛɛ a jɛvɛla ten ne.

[45] Telelatelen waate senin, divi ka don jamana fan bɛ lɔ ka to ten haan fɔɔ lɛlɛ sawa.

[46] Wo waate, Isa ka gbanɔ, a vɛɛ: «Eli, Eli, lama sabakatani?» Wo kɔlɔ le ko: «Ǹ Tii, ǹ Tii, mindɛ kɛnin i vɛ ǹ nabila?»

[47] Mɔɔ minnu lɔnin tɛɛ wo ja, wo dɔlu k'a mɛn k'a fɔ, ai vɛɛ: «Kɛ́ min yi kela Iliya le kilila.»

[48] Ai lɔ mɔɔ kelen vɛ bɔlila telemanin ka taa fu dɔ ta, ka a sun gbɛ kumunnin nɔ. A ka wo dɛn kɔlɔman na ka wo lɔ Isa da la ko a yi wo min.

[49] Kɛɛ dɔlu vɛɛ: «A to ten. Mɔ kɛtɔ a yena, ni kela Iliya natɔ a lakisila.»

[50] Wo kɛnin, Isa ka gbanɔ kɔtunun ka sa.

[51] Ado lɔhɔlɔmabonba daladɛn faani ka fala fila le ka damina san ma ka se duu ma. Duukolo vɛ jaajaala gbiligbili ka falakololu te te.

[52] Kabululu da ka ka, ani Alaɲasiyanɲamɔɔ minnu tɛɛ vɛ sa, wo siyama v'i wulila

[53] ka bɔ ai kabululu lɔ. Isa wuli kɔ ka bɔ saya lɔ, wolu ka don Jelusalɛm lɔhɔlɔma so kɔnɔ. Ado mɔɔ siyama k'ai ye je.

[54] Sɔdasi kundii ni aa mɔɔ minnu tɛɛ ai jandola Isa lɔ, wolu ka duukolo jaajaatɔ ye ani min bɛ kɛnin ka kawakoya. Ai vɛɛ: «Kɛ́ min tɛɛ Ala Den ne le jɔ!»

[55] Moso siyama gbazan tɛɛ je, minnu majaannin tɛɛ poon ko lasaaya lɔ. Wolu ni Isa le nanin tɛɛ kelen ne ka bɔ Galile a madɛmɛn ko lɔ.

[56] Magidalaka Moyamu tɛɛ moso wolu lɔ, ani Janguba ni Jusufu ba Moyamu, ani Janguba ni Yaya ba, min tɛɛ Zebede moso le.

[57] Wo k'a talan banakɛ dɔ tɛɛ je min tɔɔ yi ko Jusufu. A ka bɔ Alimate so kɔnɔ. A do tɛɛ Isa ya kɔbiladen dɔ le. Wo lon wula dala, a ka taa Pilati fɛlɔ

[58] ka madiya ko a yi diɲa a yi Isa fuleni ta ka a sudoon. Pilati ka diɲa ka aa mɔɔlu lɔ wo dila Jusufu ma.

[59] Wo lɔ, Jusufu ka taa Isa fuleni ta k'a kasange faanigbɛ lɔ.

[60] A ka taa a sudoon kawawoo kula lɔ, a tɛɛ ka mɔɔlu lɔ min senna ka kɛ a jɛlɛ kabulu le. Wo kɔ, a ka kawa ba makulukulu ka kabulu datuun ka ban ka taa.

[61] Magidalaka Moyamu ni a tɔɔma Moyamu siinin tɛɛ kabulu ɲatelenma.

[62] Wo Jumalon kɛnɛbɔ, salakalaseba kundiilu ni Falisilu k'ai ladɛn Pilati ɲana.

[63] Ai vɛɛ a yɛ: «Fanma, mɔ hangili y'a lɔ mɔɔlafiliba wo tɛɛ a nin na waate min, a vɛɛ ko tele fila a sawana a wulitɔ ka bɔ saya lɔ.

[64] Wo lɔ, fɔ i mɔɔlu lɔ kabulu lakanala fɔɔ tele sawa vɛ dafala, sa aa kɔbiladennu kana taa a su suɲa, ka ban k'a fɔ mɔɔlu yɛ ko a v'i wuli ka bɔ saya lɔ. Wo vɛ kɛla, faɲa wo kɛwonyatɔle ka timin a kunfɔlɔ ta la.»

[65] Pilati vɛɛ ai yɛ: «Lakanalibalu y'ài bolo. Ài y'ai lataa ka kabulu lakana ai se bɛ la.»

[66] Wo lɔ, ai ka taa wo ja ka tɔɔmase kɛ kawa kan, ka lakanalibalu lalɔ ko ai yi kabulu lakana kobɛn.