Matiyu 14
[1] Masakɛ Helodi ka Isa mangan mɛn mingɛ,
[2] a vɛɛ aa bɔlidennu yɛ: «Makoliba Yaya le. A v'a wuli ka bɔ saya lɔ. Wo le n'a kɛla, kawanako se y'a yɛ.»
[3] Masakɛ Helodi tɛɛ ka Yaya mina k'a sili k'a bila kaso la k'a masɔlɔn a kɔlɔkɛ Fele moso fɛ, min tɔɔ tɛɛ ko Helodiyasi.
[4] Baa Yaya ka to a fɔla a yɛ, a vɛɛ: «Moso wo man kan k'i sii i kun. Wo ladaannin tɛ i ma!»
[5] A lɔɔ tɛɛ masa Helodi la ka Yaya faa, kɛɛ a tɛɛ siyanna jama ɲa, k'a masɔlɔn ai tɛɛ Yaya jatela kela le le.
[6] Masakɛ Helodi sɔlɔnlon sanɲɔɔmɛn ka se mingɛ, ai ka tolon kɛ. Helodiyasi denmoso ka dɔn kɛ mɔɔlu tɛma tolonya lɔ je. Wo ka diya masakɛ yɛ kosɛvɛ
[7] fɔɔ a k'a sɛ singbili yɛ ko a vɛ fen suu suu fɔla, a kɛtɔ wo dila a ma.
[8] Singbili ba ka a lɔ min fɔla masakɛ yɛ, a vɛɛ: «Ǹ a fɛ i yi Makoliba Yaya kun di m̀ ma seti lɔ.»
[9] Kuma wo ka masakɛ ninnafin kosɛvɛ, kɛɛ a tɛɛ vɛ ban a sɛla mɔɔ kilininnu ɲana. Wo lɔ, a ka jamali di aa mɔɔlu ma ko ai yi Yaya kun di a ma.
[10] A ka aa bɔliden dɔ lɔ Yaya kun tɛɛla a la kaso la
[11] ka na a di singbili ma seti lɔ. Singbili ka taa a di a ba ma.
[12] Wo kɔ, Yaya ya kɔbiladennu ka na a fuleni ta ka taa a sudoon ka ban ka taa wo lase Isa ma.
[13] Isa ka Yaya faa ko mɛn mingɛ, ale kelen ka bɔ je kulun nɔ ka taa dingila lɔkolon dɔ lɔ. Kɛɛ mɔɔlu ka wo lɔn mingɛ, ai vɛ bɔla aiya solu la ka taa a kɔ ai sen ma.
[14] Isa bɔnin kulun nɔ, a ka jama ba ye. Ai hina ka don a la. Jangalotɔ minnu tɛɛ ai lɔ, a ka wolu lakɛnɛya.
[15] Wula la, aa kɔbiladennu k'ai madon a la k'a fɔ a yɛ, ai vɛɛ: «I m'a ye? Dingila lɔkolon ne min ne. Su kotɔle. I yi jama labila sa ai yi taa balo sanya lɔ solu la.»
[16] Isa k'ai javi, a vɛɛ: «Ai man kan ka bɔ jan, fɔ àilu gbu yi balo di ai ma.»
[17] Kɔbiladennu vɛɛ: «Foi tɛ mɔ bolo jan fɔ bulukala loolu ni jɛɛni fila.»
[18] Isa vɛɛ: «Ài yi na wolu le ǹ fɛ jan.»
[19] Wo kɛ, a ka jama lɔ ai siila bin kɛnɛ kan. Ai siinin, a ka bulukala loolu ni jɛɛni fila ta k'a ɲa lajɛlɛ san ma ka balika bɔ Ala yɛ. A ka bulu lɔkalikali, ka a di aa kɔbiladennu ma. Ai ka a lɔtala jama wotɛ.
[20] Mɔɔ bɛ ka dɔnni kɛ k'ai fa kpe. Ai wɔlinin, Isa ya kɔbiladennu ka bulu kulunkulun tɔlu ladɛn, ka gbɔlɔ tan ni fila lafa wo lɔ.
[21] Jama min ka dɔnni wo kɛ, kɛ́ mɔɔ waa loolu ɲɔɔn tɛɛ ai lɔ. Moso ni dennilu tɛɛ ma kɔndɛ.
[22] Wo kɛnin, Isa ka aa kɔbiladennu lɔ donna kulun nɔ ko ai yi kɔɔ tɛɛ a ɲa, kosa a yi jama labila.
[23] A wɔlinin mɔɔlu lasalanala, a ka jɛlɛ tini kɔkan ka Ala dali ale kelen. Ka ale kelen to je, su ka ko.
[24] Wo waate, kɔbiladennu ya kulun ma tɛɛ vɛ jaanya gbele la. Kɔɔ jamannin tɛɛ bubale fɔɔ ka kulun najaajaa, baa ai ɲa tilinminnin tɛɛ fɔɲɛ le la.
[25] Donon kumun waate, Isa vɛ taamana kɔɔ kɔkan ka taa ai kɔ.
[26] Kɔbiladennu ka a taamantɔ ye kɔɔ kɔkan mingɛ, ai ka siyan bubale, ai vɛɛ: «Sugbolonin ne ve!» Ai do vɛ gbanɔla siyan boloma.
[27] Kɛɛ Isa ka kuma ai fɛ telemanin, a vɛɛ: «Ài y'ài joso lagbeleya! Ǹe le. Ài kà siyan!»
[28] Piɛl vɛɛ: «Fanma, ni ile le, i yi ǹ lɔ ǹ'i taama kɔɔ kɔkan ka na i fɛlɔ.»
[29] Isa vɛɛ: «Na.» Wo lɔ, Piɛl vɛ jiila ka bɔ kulun nɔ ka taama kɔɔ kɔkan ka taa se Isa ma.
[30] Kɛɛ Piɛl ka fɔɲɛ bɔtɔ ye fanga la mingɛ, a ka siyan. A vɛ jiila kɔɔ kɔlɔ ka gbanɔ, a vɛɛ: «Fanma, ǹ nakisi!»
[31] Isa ka a bolo lɔsama telemanin ka Piɛl mina, a vɛɛ a yɛ: «Ile, min ya limandeya dɔɔyanin. Mindɛ kɛnin i yi sikasikala?»
[32] Isa ni Piɛl ka don mingɛ kulun nɔ, fɔɲɛ k'i lɔ tue.
[33] Kɔbiladen minnu tɛɛ kulun nɔ, ai k'ai ten bilin Isa kɔlɔ a bato ko lɔ, ai vɛɛ: «Ala Den ne ile le jɔ.»
[34] Ai wɔlinin kɔɔ tɛɛla, ai ka se Genesalɛti duu kɔnɔ.
[35] Je mɔɔlu k'a ɲaye mingɛ ko Isa le, ai vɛ mɔɔlu lɔla aa nako fɔla duu fan bɛ lɔ. Mɔɔlu vɛ nala aiya jangalotɔ bɛ le Isa fɛ
[36] k'a madiya ko a yi diɲa ai y'ai bolo tuu hali aa faaniba dagbolo la. Mɔɔ mɔɔ k'ai bolo tuu a la, wo bɛ ka kɛnɛya.