Matiyu 24
[1] Ka Isa bɔtɔ to lɔhɔlɔmabonba la, aa kɔbiladennu k'ai madon a la ka lɔhɔlɔmabonba lɔɲa jiya a la.
[2] Isa k'ai javi, a vɛɛ: «Ài yi fen min bɛ yena, kɛlɛ? Ǹ'i tuɲa fɔ ài yɛ, lon dɔ wo bɛ tetetɔle tɛtɛ, hali kawakulun fila tɛnala tola i ɲɔɔn ma.»
[3] Wo kɔ, ka Isa siinin to Zeituna tini kɔkan, aa kɔbiladennu ka na a maɲininga doon nɔ, ai vɛɛ: «I kain tɛɛ ko minnu ma, wolu kɛtɔ waate mindɛ? Tɔɔmase suu mindɛ kɛtɔ a jiyala ko waate wo vɛ se?»
[4] Isa k'ai javi, a vɛɛ: «Ài yi jando ài jɛlɛ lɔ sa mɔɔ suu suu kana ài lafili.
[5] K'a masɔlɔn mɔɔ siyama natɔ ǹ tɔɔ lɔ k'a fɔ ko: ‹Ǹe le Masa Tɔɔmasenin ne.› Ai kɛtɔ mɔɔ siyama lafilila wo lɔ.
[6] Ài vɛ kɛlɛ kolu mɛnna, ani kɛlɛlu mangan, ài joso kà bɔ k'a masɔlɔn wolu ka kan ka kɛ, kɛɛ dunuɲa laban tɛnala kɛla wo le bene.»
[7] Sibolomalu wulitɔ i ɲɔɔn kanma. Jamanalu gbazan wulitɔ i ɲɔɔn kanma. Kɔɔn fitina ni duukolo jaajaa kɛtɔ dingila suu bɛ lɔ.
[8] Ko wo bɛ yi tɔlɔya damina le le, iwo tinkɔnɔdimin yi kɔnɔma minala teme kunfɔlɔ le.
[9] Mɔɔlu kɛtɔ ài donna mɔɔlu bolo, sa ai y'ài tɔlɔya k'ài faa. Ài gbeyatɔ dunuɲa siboloma bɛ yɛ ka bɛn ǹa ko ma.
[10] Mɔɔ siyama kɛtɔ ǹa siya bilala, k'i ɲɔɔn don mɔɔlu bolo k'ai gbeya i ɲɔɔn yɛ.
[11] Faɲafɔkelaseba siyama wulitɔ, ka mɔɔ siyama lafili.
[12] Miliya yon jilitɔ bubale. Wo le kɛtɔ a kɛla, mɔɔ siyama ya kanundeya dɔɔyatɔ.
[13] Kɛɛ mɔɔ min vɛ gbeleya minala a ma k'a sii tɔlɔya waate ban na, wo tii kisitɔ.
[14] Samakan Kein ka bɛn Ala ya masaya ma, wo lasentɔ dunuɲa fan bɛ lɔ, sa siboloma bɛ y'aa seleya mɛn. Wo vɛ kɛla, dunuɲa laban yi sene.
[15] Ài y'ài tolo malɔ k'i lɔja ka ko min ɲaye. Fen daannin min yi lɔhɔlɔmabonba nɔɔla, kela Danyɛ na min ko fɔla, ài vɛ wo lɔnin yena je lon min,
[16] mɔɔ minnu yi Jude koovi lɔ, wolu yi bɔli ka taa tinilu kɔkan.
[17] Ni waate wo ka mɔɔ min talan bon kɔkan, wo tii kà jii bon kɔnɔ k'a fɔ a a bolofennu tala.
[18] Wo vɛ mɔɔ min talanna sɛnɛ lɔ, wo tii kà seikɔ aa bon na k'a fɔ a aa faaniba tala.
[19] Wo lonnu vɛ sena, gbalo kɛtɔ kɔnɔma ni denbatiikulalu yɛ.
[20] Àilu yi Ala dali àiya bɔli ko kana kɛ nɛnɛ waate lɔ, ni wo tɛ Nɔningɛlon.
[21] K'a masɔlɔn wo waate tɔlɔya gbeleyatɔ bubale. Wo ɲɔɔn ma kɛ ba bene k'a ta dunuɲa dan waate ma fɔɔ ka na a sii bi la. Ado tɔlɔya wo ɲɔɔn tɛnala kɛla butu tuun.
[22] Ni Ala tɛɛ ma wo tɔlɔya waate lɔsulunya, mɔɔ foi tɛɛ tɛnala kisila. Kɛɛ a v'a latɛɛ k'a dɔ bɔ a la ka bɛn aa mɔɔ tanilu ma.
[23] Wo waate, ni mɔɔ dɔ k'a fɔ ài yɛ, a vɛɛ: ‹Masa Tɔɔmasenin yi jan ne› ni wo tɛ ‹A yi jan ve›, ài kà la a la tuun.
[24] K'a masɔlɔn faɲafɔkelalasebalu wulitɔ, ani minnu y'a fɔla ko ailu le Masa Tɔɔmasenin ne. Ai kɛtɔ tɔɔmase ba ni kawanakolu kɛla ka Ala ya mɔɔ taninnu lafili, ni wo yi sene kɛla.
[25] M̀'ɛ wo bɛ fɔ ài yɛ jani ai yi kɛ.
[26] Wo le y'a kɛla, ni mɔɔlu k'a fɔ ài yɛ ko Masa Tɔɔmasenin yi tuu kɔlɔ, ài kà taa je. Ni ai k'a fɔ ài yɛ ko a doonnin sutala dingila dɔ lɔ, ài kà la wo la.
[27] Baa ǹe Mɔɔnivin Tanin nalon kɛtɔ iwo sanfɛlɛ yi bɔla telebɔ lɔ teme ka mɛnɛnmɛnɛn teleben nɔ.
[28] Su vɛ kɛla tɛɛ tɛɛ lɔ, duwalu y'ai ladɛnna wo ja le.»
[29] «Wo waate tɔlɔya vɛ timinna, tele fintɔ telemanin. Kalo tɛnala mɛnɛnna butu. Lolonilu benbentɔ ka bɔ sangbolo lɔ. Ado sangbolokɔnɔfangatiilu lamaamaatɔ.
[30] Wo waate, ǹe Mɔɔnivin Tanin kɛtɔ ǹa tɔɔmase lankɛnɛmayala sangbolo lɔ. Dunuɲa siboloma bɛ kɛtɔ wo yena k'ai josomakasi. Ai kɛtɔ ǹ natɔ yena biliya lɔ setiiya la ani nɔɔlɔ ba.
[31] Wo kɔ, ǹ kɛtɔ ǹa mɛlɛkalu kelayala bulufɛ ba le ka taa dunuɲa tongun naani bɛ lɔ. K'a bɔ dunuɲa kun dɔ la fɔɔ ka taa se a kun dɔ la, ǹa mɛlɛkalu kɛtɔ ǹa mɔɔ tanilu ladɛnna.»
[32] «Ài yi hangili sɔlɔn ka bɔ toloju ya sana ma. Ài v'a bolo kula ni a bulu nɛlɛnnu yena, ài y'a lɔn ko telema bɔtɔle.
[33] Wo ɲa kelen ma, ni ài ka ko wo bɛ ye kɛla, ài y'a lɔn k'a fɔ ko waate vɛ sulunya, a do vɛ to dɔɔnin a yi se.
[34] Ǹ'i tuɲa fɔ ài yɛ, bi mɔɔlu bɛ tɛnala banna faala fɔɔ min ko bɛ yi kɛ ka dafa.
[35] Lon dɔ, sangbolo ni duukolo bantɔle, kɛɛ ǹa kumakannu tɛnala banna tuun!»
[36] «Ko wolu kɛtɔ lon min na ani waate min nɔ, mɔɔ suu suu ma wo lɔn. Mɛlɛka minnu yi haijɛnɛ, wolu gbazan m'a lɔn. Hali ǹe Ala Den m'a lɔn, fɔ ǹ Fa Ala kelenpesa.
[37] Ǹe Mɔɔnivin Tanin nalon kɛtɔle iwo ko minnu kɛnin sedina Nuho tele lɔ.
[38] Jani kɔɔ ba yi na, mɔɔlu tɛɛ dɔmuni kɛla k'i min. Ai ka to fulu kɛla, ani k'ai denmosolu gbazan di fulu la. Ai ka to wo bɛ la fɔɔ Nuho ka don kulunba lɔ lon min na.
[39] Ai do ma sovi foi la, fɔɔ kɔɔ min ka na k'ai bɛ halaki. Ǹe Mɔɔnivin Tanin nalon gbazan kɛtɔ ten ne.
[40] Wo lon, kɛ́ fila kɛtɔ sɛnɛ lɔ, kelen minatɔ ka kelen to je.
[41] Moso fila kɛtɔ malo tuula, kelen minatɔ ka kelen to je.
[42] Wo le y'a kɛla, fɔ ài yi to ài ɲana, baa ài Tii natɔ lon min na, ài m'a lɔn .
[43] Ài yi ko min ɲaye. Ni bontii tɛɛ a lɔn k'a fɔ son natɔ waate min nɔ, a tɛɛ tole a ɲana. A tɛɛ tɛ diɲa son yi don aa bon na.
[44] Wo lɔ, àilu gbazan lɔbɛnnin yi to, baa ǹe Mɔɔnivin Tanin natɔ waate dɔ lɔ, ài hangili tɛ waate min ma.
[45] Jene yi bɔliden sɔvɛ le ani hangilima, kundii kɛtɔ min nasiila bɔliden tɔlu kunna, sa a ai balo di ai ma aa waate bɛlɛ lɔ?
[46] Ni kundii ka na ka bɔliden wo talan baale la, wo tii kɛtɔ duwawuden ne le.
[47] Ǹ'i tuɲa fɔ ài yɛ, kundii kɛtɔ bɔliden wo kɛla a bolofen bɛ kunnasiiba le le.
[48] Kɛɛ do ni wo vɛ kɛla mɔɔ yon ne, tumado a kɛtɔ a milila, a vɛɛ: ‹Ǹa kundii vɛ mɛn, a tɛ nala bene.›
[49] Wo lɔ, a v'a bɔlidenɲɔɔlu gbasila, ka taa a jɛlɛ dadiyabɔ gbɛtɔlu fɛ.
[50] Kɛɛ bɔliden ya kundii natɔ lon dɔ, a t'i milila lon min ma, a do jii tɛ waate min ma.
[51] A vɛ nala, a kɛtɔ a lɔtɛɛtɛɛla ka a kɛ iwo filangafolu. A kasitɔ ka a ɲin sii i ɲɔɔn na dimin bolo je.»