<Matiyu 15

[1] Wo kɔ, Falisi ni seliya kalanmɔɔ dɔlu ka bɔ Jelusalɛm ka na Isa maɲininga,

[2] ai vɛɛ: «Mindɛ kɛnin iya kɔbiladennu yi mɔ bemanu ya laana tiɲana? Baa ai yi dɔnni kɛla k'a talan ai ma ai bolo lako kobɛn.»

[3] Isa k'ai javi, a vɛɛ: «Àilu do? Mindɛ kɛnin ài y'àiya laanalu buɲala ka Ala ya seliya tiɲa?

[4] K'a masɔlɔn Ala vɛɛ ko: ‹I i fa ni i ba buɲa.› A vɛɛ gbazan ko: ‹Ni mɔɔ min vɛ a fa ni wo tɛ a ba jɛvɛla, wo tii ka kan ka faa.›

[5] Kɛɛ do ài vɛɛ ko mɔɔ yi sene a fɔla a fa ni wo tɛ a ba yɛ, ko: ‹I tɛɛ ka kan ka dɛmɛnni min sɔlɔn ǹ na, m̀'ɛ wo bɛ di Ala ma salaka le.›

[6] Ài vɛɛ ko, a v'a fɔla ten, ko diyanigbeya tɛ butu ka a fa buɲa. Ài vɛ Ala ya kumakan to je wo lɔ, ka àiya laanalu bila a nɔ lɔ.

[7] Àilu filangafolu, kela Aizaya na min fɔla àiya ko lɔ, wo bɛnnin ne kosɛvɛ, a vɛɛ:

[8] ‹Mɔɔ minnu yi m̀ buɲala ai da le la, kɛɛ wo tɛ ai josokun nɔ feu!

[9] Ai yi m̀ batola fuun. Ai yi mɔɔlu kalanna minnu la, wo tɛ foi le fɔ adamadennu ya jamali.›»

[10] Wo kɔ, Isa ka jama kili k'a fɔ ai yɛ, a vɛɛ: «Ài bɛ y'ài tolo malɔ ǹa kuma la k'a ɲaye.

[11] Mɔɔ yi fen fen donna a da ka a dɔn, wo suu suu tɛ se mɔɔ nɔɔla Ala ɲakɔlɔ. Kɛɛ ko minnu yi bɔla mɔɔ da, wo le yi mɔɔ nɔɔla Ala ɲakɔlɔ.»

[12] Aa kɔbiladennu k'ai madon a la k'a fɔ a yɛ, ai vɛɛ: «I m'a lɔn k'a fɔ iya kumakan yi gbala Falisilu la?»

[13] Isa vɛɛ: «Ǹ Fa min yi haijɛnɛ, ni wo gbu ma kɔlɔman min sɛnɛ, wo bɔntɔle feu.

[14] Ài yi Falisilu to je. Ai yi ɲagbɛ ɲabilalu le le. Ni ɲagbɛ vɛ kɛla a ɲagbɛɲɔɔn ya ɲabila le, ai mɔɔ fila yi benne diɲa lɔ.»

[15] Piɛl k'a fɔ Isa yɛ, a vɛɛ: «Sana wo kɔlɔ fɔ mɔ yɛ.»

[16] Isa vɛɛ: «A yi di? Àilu gbazan ma se ko ɲayena?

[17] Ài m'a ɲaye ba k'a fɔ fen fen vɛ donna mɔɔ da, wo taatɔ a kɔnɔ le lɔ ka ban ka bɔ?

[18] Kɛɛ do kuma minnu yi bɔla mɔɔ da, wolu yi bɔla a josokun ne lɔ. Wolu le yi mɔɔ nɔɔla Ala ɲakɔlɔ.

[19] Miliya yon bɛ yi bɔla mɔɔ josokun ne lɔ, wo le yi mɔɔ bilala mɔɔfaa la, ani ɲɔmɔɔya, ani jalɔnya suu bɛ, ani suɲali, ani faɲafɔseleyalu, ani Alalɔnbaliyakannu.

[20] Ko wolu le yi mɔɔ nɔɔla. Kɛɛ ka dɔmuni kɛ bolo lakobali la, wo tɛ mɔɔ nɔɔla.»

[21] Wo kɔ, Isa ka bɔ je ka taa Tili ni Sidɔn solu laminin nɔ.

[22] A senin je, Kanaanka moso dɔ ka na a ma. A do vɛ gbanɔla, a vɛɛ: «Fanma, Dawuda Bɔzɔn. I yi hina ǹ na. Jina dɔ yi ǹ denmoso tɔlɔyala bubale!»

[23] Kɛɛ Isa ma foi fɔ. Aa kɔbiladennu k'ai madon a la k'a fɔ a yɛ, ai vɛɛ: «I tɛ moso min naseikɔ? A bilanin mɔ kɔ gbanɔla.»

[24] Isa vɛɛ: «Ala na ǹ kelayala Isilanmɔɔlu le ma dein, minnu kɛnin iwo saa tununnilu.»

[25] Kɛɛ moso wo ka na a ten bilin Isa kɔlɔ. A vɛɛ a yɛ: «Fanma, i yi m̀ madɛmɛn.»

[26] Isa vɛɛ: «A bɛnnin tɛ ka dennilu ya bulu ta k'a lafili wulunilu kɔlɔ.»

[27] Moso k'a javi, a vɛɛ: «Fanma, tuɲa le wo le. Kɛɛ hali wulunilu yi bulu kulunkulunni dɔnna, min yi benna duu ma ai tiilu ya tabali kɔlɔ.»

[28] Isa k'a javi, a vɛɛ: «Ɛɛ moso, iya limandeya buɲanin kosɛvɛ! I yi min ɲininna, wo kɛtɔ i yɛ.» A denmoso ka kɛnɛya telemanin.

[29] Isa ka bɔ wo ja, ka taama Galile kɔɔ dafɛ ka jɛlɛ tini dɔ kɔkan k'i sii je.

[30] Mɔɔ siyama vɛ nala a ma aiya namalanilu le, ani ɲagbɛlu, ani bobolu ani jangalotɔ suu siyama. Ai ka wo bɛ lala Isa kɔlɔ mingɛ, a k'ai bɛ lakɛnɛya.

[31] Bobolu vɛ kumala. Namalanilu vɛ taamana kobɛn. Ɲagbɛlu vɛ yeni kɛla. Jama ka wo bɛ ye ka kawakoya ani ka Isilan Tii Ala tanu.

[32] Isa k'aa kɔbiladennu kili k'a fɔ ai yɛ, a vɛɛ: «Jama min hina yi ǹ na. Baa ai vɛ tele sawa le kɛ ǹ fɛ jan, ado balo suu suu tɛ ai bolo. Ǹ t'a fɛ ǹ ai kɔɔntɔ labila ten, sa ai kana taa kilon siya la.»

[33] Kɔbiladennu ka Isa javi, ai vɛɛ: «M'i se bulu sɔlɔnna di dingila lɔkolon min nɔ, sa jama ba min bɛ yi dɔnni kɛ k'ai fa?»

[34] Isa vɛɛ ai yɛ: «Bulukala jein y'ài bolo?» Ai vɛɛ: «Bulukala wolowulan, ani jɛɛni dɔlu.»

[35] Isa ka jama lɔ ai siila duu ma.

[36] Wo kɛ, a ka bulukala wolowulan ni jɛɛni wolu ta, ka balika bɔ Ala yɛ, ka a lɔkalikali, ka a di aa kɔbiladennu ma. Kɔbiladennu ka wolu ta ka a lɔtalatala jama wotɛ.

[37] Mɔɔ bɛ ka dɔnni kɛ k'ai fa. Bulu kulunkulunni ni jɛɛ tɔ min ka to, Isa ya kɔbiladennu ka gbɔlɔ wolowulan lafa wo lɔ.

[38] Kɛ́ mɔɔ waa naani le ka dɔnni kɛ. Moso ni dennilu tɛɛ ma kɔndɛ.

[39] Wo kɔ, Isa ka jama labila ka don kulun kɔnɔ ka taa Magadan duu kɔnɔ.