Matiyu 12
[1] Nɔningɛlon dɔ, ka Isa ni aa kɔbiladennu timintɔ to sɛnɛ tɛma, aa kɔbiladennu tɛɛ sɛnɛfen tizan dɔlu bɔla k'a dɔn, baa kɔɔn tɛɛ ai la.
[2] Falisi dɔlu ka wo ye mingɛ, ai vɛɛ Isa yɛ: «I m'a ye? Iya kɔbiladennu yi min kɛla Nɔningɛlon, wo ladaannin tɛ ka bɛn seliya ma!»
[3] Isa k'ai javi, a vɛɛ: «A yi di? Nabi Dawuda na min kɛla ale ni a taamaɲɔɔlu ya kɔɔn waate lɔ, ài ma wo kalan?
[4] A ka don mingɛ Alabatobon na, a ka salaka bululu ye k'a dɔ ta k'a dɔn. Wo do ladaanin tɛɛ tɛ ale ni a taamaɲɔɔlu ma ka bɛn seliya ma, mafɔ salakalasebalu jɛlɛ.
[5] Jalasa ài ma a sɛvɛnin ye kela Musa ya Taulati kɔnɔ ko salakalaseba minnu yi baalela lɔhɔlɔmabonba la, wolu yi Nɔningɛlon seliyalu tiɲala, k'a talan wo tɛ jatela julumbu la?
[6] Ǹ a fɔ ài yɛ, ǹ ko mɔɔ dɔ yi jan nɔ, min buɲanin lɔhɔlɔmabonba le.
[7] A sɛvɛnin kitabu lɔ ko: ‹Hinandeya diyanin ne ǹ yɛ ka timin kolofen salaka la.› Ni ài tɛɛ vɛ wo kɔlɔ lɔnna, ài tɛɛ tɛnala mɔɔlu jalakila, minnu ma julumbu ta.
[8] K'a masɔlɔn ǹe Mɔɔnivin Tanin le kundii le Nɔningɛlon kunna.»
[9] A ka bɔ je ka taa don je mɔɔlu ya Aladalibon na.
[10] Wo k'a talan kɛ́ dɔ tɛɛ je min bolo janin tɛɛ a ma. Mɔɔ dɔlu ka Isa maɲininga, ai vɛɛ: «Ka mɔɔ lakɛnɛya Nɔningɛlon, wo ladaannin ne?» Ai tɛɛ dailu le ɲininna ko ai y'a jalaki.
[11] Wo lɔ, Isa vɛɛ ai yɛ: «Jene y'ài lɔ, ni aa saa vɛ benna diɲa lɔ Nɔningɛlon, a tɛnala a labɔla?
[12] Ài do k'a lɔn ne k'a fɔ mɔɔnivin kulu gbeleyanin vɛ saa le, kɛlɛ? Wo lɔ, ka kokein kɛ mɔɔ yɛ Nɔningɛlon, wo ladaannin ne.»
[13] Wo kɔ, Isa vɛɛ kɛ́ wo yɛ: «I bolo lɔsama.» Kɛ́ ka a bolo lɔsama mingɛ, wo ka kɛnɛya ka kɛ iwo a bolo tɔ kelen.
[14] Wo kɛ, Falisilu ka bɔ je ka taa ai kun bilin Isa faa ko lɔ.
[15] Isa ka wo mɛn mingɛ, a ka bɔ je ka taa. Jama ba ka bila a kɔ. A k'ai bɛ lakɛnɛya.
[16] A k'a fɔ wolu yɛ ka a magbeleya, ko ai kà a mangan jɛnzɛn.
[17] Wo bɛ ka kɛ sa kuma min fɔnin kela Aizaya bolo, wo ma yi fa, ko:
[18] «Ǹa bɔliden ne ne, ǹ na min tala mɔɔlu tɛma. A do yi ǹ diyanan mɔɔ le, min yi ǹ kɔnɔ diyala bubale. Ǹ kɛtɔ ǹa Lɔhɔlɔma Fɔɲɛ lajiila a kan, a do kɛtɔ Ala aa telentiiya ko lasena siboloma gbɛlɛlu ma.
[19] A tɛnala sɔsɔli kɛla, a do tɛnala a kan nabɔla. Mɔɔlu tɛnala a gbanɔkan mɛnna siya kan.
[20] A tɛnala fen kalinin lɔkalikalila. Ani a tɛnala fitina lasala, hali taa min yi sa boloma. A totɔ siya wo le kan fɔɔ a vɛ telentiiya ladonna fan bɛ lɔ.
[21] Ado siboloma bɛ kɛtɔ ai jei siila a tɔɔ le la.»
[22] Wo kɔ, mɔɔlu ka na kɛ́ dɔ le, jina tɛɛ vɛ min ɲa gbɛ ka a kɛ bobo le. Isa ka a lakɛnɛya mingɛ, a tɛɛ kuma ni yeni kɛla.
[23] Mɔɔ bɛ ka kawakoya, ai vɛɛ: «Ai y'a fɔla min ma ko Dawuda Bɔzɔn, ale le min ne?»
[24] Falisilu ka wo mɛn mingɛ, ai vɛɛ: «Jinalu ya kundii Biyɛzɛbɔ, wo le na se dila kɛ́ min ma kosa a yi jinalu gbɛn ka bɔ mɔɔlu kɔ.»
[25] Kɛɛ Isa tɛɛ k'ai miliya lɔn, a vɛɛ ai yɛ wo lɔ: «Ni jamana suu suu mɔɔlu ka falan a ma k'ai ɲɔɔn kɛlɛ, wo jamana yi tiɲa le fefe. Ni sokɔnɔmɔɔlu, ni wo tɛ bonnamɔɔlu ka falan a ma k'ai ɲɔɔn kɛlɛ, wo so ni wo tɛ wo bon yi halakile.
[26] Wo ɲa kelen ma, ni Soɛtana yi Soɛtana le gbɛnna, a a jɛlɛ le kɛlɛla. Aa masaya yi to a ma di wo lɔ?
[27] A yi di? Ni ǹe yi jinalu gbɛnna Biyɛzɛbɔ ya setiiya le lɔ, àiya kɔbiladennu yi wolu gbɛnna jene ya setiiya lɔ? Ailu gbu y'a jiyala ko ài jo tɛ wo lɔ.
[28] Kɛɛ ini ǹ'i jinalu gbɛnna Lɔhɔlɔma Fɔɲɛ ya setiiya le lɔ, wo lɔ Ala ya masaya vɛ se ài ma.
[29] Mɔɔ tɛ se donna kɛ́ fangama ya bon na k'a bolofennu suɲa, ni a ma wo mina kunfɔlɔ le k'a sili, kɛlɛ? Wo vɛ kɛla, a yi sene suɲali kɛla wo tii ya bonna.
[30] Mɔɔ min tɛ ǹ fɛ, wo yi ǹ juu le le. Mɔɔ min tɛ m̀ madɛmɛnna ka mɔɔlu ladɛn, wo yi mɔɔlɔjɛnzɛnba le le.»
[31] «Ǹ'i tuɲa fɔ ài yɛ, mɔɔlu yi julumbu min bɛ tala, ani ai yi Alalɔnbaliyakan suu suu fɔla, wo bɛ lɔ yi sene kotola. Kɛɛ ni mɔɔ mɔɔ ka Alalɔnbaliyakan fɔ Lɔhɔlɔma Fɔɲɛ ma, wo tii ma tɛ koto tuun.
[32] Ni mɔɔ mɔɔ ka Alalɔnbaliyakan fɔ ǹe Mɔɔnivin Tanin ma, a ma yi sene kotola. Kɛɛ ni mɔɔ mɔɔ ka Alalɔnbaliyakan fɔ Lɔhɔlɔma Fɔɲɛ ma, wo tii ma tɛ koto dunuɲa min nɔ. A do ma tɛ koto tuun.»
[33] «Kɔlɔmanden kein yi bɔla kɔlɔman ya ɲuma le lɔ. Kɔlɔmanden kɛwon do yi bɔla kɔlɔman ya kɛwonya le lɔ, baa kɔlɔman yi lɔnna a den ne fɛ.
[34] Àilu fɔnfɔnnidennu! Ài dajoo man ɲin. Ài yi se kuma kein fɔla di wo lɔ? Mɔɔ josokun fanin ko min na, a da yi wo le fɔla.
[35] Mɔɔ kein yi kokein ne kɛla, k'a masɔlɔn wo yi bɔla a josokun kein ne lɔ. Kɛɛ do mɔɔ yon yi koyon ne kɛla, k'a masɔlɔn wo yi bɔla a josokun yon ne lɔ.
[36] Ǹ a fɔ ài yɛ, ǹ ko mɔɔlu yi kuma kolon suu suu fɔla, ai kɛtɔ wo bɛ dandɛɛli kɛla Ala yɛ kititɛɛlon.
[37] K'a masɔlɔn i dalakannu fɛ, Ala kɛtɔ jo dila i ma, ni wo tɛɛ ka i jalaki»
[38] Wo kɔ, Falisi ni seliya kalanmɔɔ dɔlu vɛɛ a yɛ: «Kalanmɔɔ, m'a fɛ i yi kawanako tɔɔmase dɔ kɛ mɔ ɲana.»
[39] Isa k'ai javi, a vɛɛ: «Bi mɔɔlu yi limandeyabali le le ani kɔnɔgbeyamɔɔ. Ai y'a fɛ ka kawanako tɔɔmase dɔ ye, kɛɛ tɔɔmase foi tɛnala jiyala ai la fɔ nabi Yunusa ta.
[40] Baa nabi Yunusa ka tele sawa ni su sawa kɛ jɛɛ ba kɔnɔ teme, ǹe Mɔɔnivin Tanin gbazan kɛtɔ tele sawa ni su sawa kɛla kabulu lɔ ten ne.
[41] Kititɛɛlon, Ninivakalu wulitɔ ka bi mɔɔlu jalaki, k'a masɔlɔn nabi Yunusa ka wolu kawani waate min nɔ, ai ka tube. Tandainɔ, mɔɔ dɔ yi jan, min buɲanin nabi Yunusa le.
[42] Kititɛɛlon, Seba jamana masamoso wulitɔ ka bi mɔɔlu jalaki, k'a masɔlɔn ale ka bɔ haan fɔɔ dunuɲa laban nɔ ka na a tolo malɔ nabi Sulimana ya hangilimaya kuma la. Tandainɔ, mɔɔ dɔ yi jan, min buɲanin nabi Sulimana le.
[43] Jina vɛ gbɛnna ka bɔ mɔɔ dɔ kɔ, a timintimintɔ dingila lɔkolonnu lɔ ka nɔningɛya ɲinin ka koli.
[44] Wo vɛ kɛla, a kɛtɔ a fɔla, a vɛɛ: ‹To ǹ'i seikɔ m̀ bɔya lɔ.› A do vɛ nala, a kɛtɔ bon nakolon wo latɛɛnin yena, ani je lɔbɛnnin ve.
[45] Wo vɛ kɛla, jina taatɔ jina wolowulan ladɛnna, minnu yonyanin ale gbu le. A ni wo bɛ natɔ ka don wo ja k'ai sii je. A laban, jinatɔ wo ya ko kɛwonyatɔ ka timin a kunfɔlɔ ta la. Bi mɔɔ yonnu ta kɛtɔ ten ne.»
[46] Ka Isa to kumala jama fɛ, a ba ani a dɔɔkɛlu ka na ai lɔ lu ma, ko ai y'a fɛ ka kuma a fɛ.
[47] Mɔɔ dɔ vɛɛ Isa yɛ: «I ba ni i dɔɔkɛlu lɔnin lu ma. Ai y'a fɛ ka kuma i fɛ.»
[48] A ka mɔɔ wo javi, a vɛɛ: «Jene yi m̀ ba le? Ǹ dɔɔkɛlu yi jene ni jenelu le?»
[49] A ka a bolo lɔsama aa kɔbiladennu yɛ, a vɛɛ: «Mɔɔ minnu yi m̀ ba ni ǹ dɔɔkɛlu le le.
[50] K'a masɔlɔn, mɔɔ mɔɔ vɛ ǹ Fa sawo kɛla, min yi haijɛnɛ, wo tii yi ǹ dɔɔkɛ ni ǹ dɔɔmoso ni m̀ ba le le.»