Matiyu 17
[1] Tele wɔɔlɔ timinnin kɔ, Isa ka Piɛl ni Janguba ni a dɔɔni Yaya kili ka taa ai le tini jaan dɔ kɔkan ai jɛlɛ ma.
[2] K'ai to je, Isa kɛɲa ka jɛlɛma aa kɔbiladen sawa wolu ɲana. A ɲakɔlɔla ka mɛnɛnmɛnɛn gbesekele iwo tele. Aa faanilu ka gbɛ pepe iwo kɛnɛya.
[3] Wo kɛ, kela Musa ni kela Iliya ka bɔ gbɛ lɔ kɔbiladen sawa wolu ɲakɔlɔ. Wolu ni Isa tɛɛ kumala i ɲɔɔn fɛ.
[4] Wo le lɔ, Piɛl k'a fɔ Isa yɛ, a vɛɛ: «Fanma, mɔ kɛ jan, wo bɛnnin ne. Ni i ka diɲa, ǹ kɛtɔ gbaa sawa lɔla: i ta kelen, kela Musa ta kelen, ani kela Iliya ta kelen.»
[5] Ka Piɛl to kuma wo la, biliya mɛnɛnmɛnɛnnin ka na bilin ai kunna. Kumakan dɔ ka bɔ biliya lɔ, a vɛɛ: «Ǹ diyanan den ne ne, min yi kɔnɔ diyala. Ài y'ài tolo malɔ a la.»
[6] Kɔbiladen sawa wolu ka wo mɛn mingɛ, ai k'ai ben duu ma k'ai kun mabilin siyan boloma.
[7] Kɛɛ Isa k'i madon ai la ka a bolo tuu ai la. A vɛɛ ai yɛ: «Ài kà siyan, ài yi wuli.»
[8] Ai k'ai ɲa lajɛlɛ mingɛ, ai ma mɔɔ ye fɔ Isa kelen.
[9] Ka Isa ni aa kɔbiladennu jiitɔ to tini la, a k'ai jamali, a vɛɛ: «Ài na min yena, ai kà wo fɔ mɔɔ suu suu yɛ bene, fɔɔ ǹe Mɔɔnivin Tanin vɛ m̀ wulila ka bɔ saya lɔ.»
[10] Kɔbiladennu ka Isa maɲininga, ai vɛɛ: «Mindɛ lɔ seliya kalanmɔɔlu y'a fɔla ko kela Iliya le ka kan ka na kunfɔlɔ le?»
[11] Isa k'ai javi, a vɛɛ: «Tuɲa le, kela Iliya ka kan ka na ka ko bɛ lɔbɛn.
[12] Ǹ a fɔ ài yɛ, ǹ ko kela Iliya tɛɛ vɛ ban nala. Kɛɛ mɔɔlu tɛɛ m'a lɔn. Ai k'ai sawonan ko bɛ kɛ a la. Wo ɲa kelen ma, ǹe Mɔɔnivin Tanin tɔlɔyatɔ ai bolo.»
[13] Kɔbiladennu k'a ɲaye wo le lɔ k'a fɔ ko a tɛɛ kumala ai yɛ ka bɛn Makoliba Yaya ya ko le ma.
[14] Isa ni kɔbiladennu senin jama lɔ, kɛ́ dɔ ka na i mabilin Isa kɔlɔ, a vɛɛ:
[15] «Fanma, i hina ǹ denkɛ la. Jina le yi fa bilala a lɔ ka a tɔlɔya bubale. A v'a minala kotan, waate siyama a yi ben taa la, ni wo tɛ a yi ben kɔɔ lɔ.
[16] Ǹ nanin a le iya kɔbiladennu fɛ, ai do ma se a lakɛnɛyala.»
[17] Isa vɛɛ ai yɛ: «Bi mɔɔlu filinin ani limandeyabali le ai le. Ǹ'i to ài tɛma ka àiya ko mina m̀ ma haan fɔɔ waate mindɛ? Na denni le ǹ fɛ jan.»
[18] Isa ka a jamali mingɛ, jina ka bɔ den kɔ. Den ka kɛnɛya telemanin.
[19] Wo kɔ, kɔbiladennu ka na Isa maɲininga doon nɔ, ai vɛɛ: «Mindɛ kɛnin ǹu ma se jina wo gbɛnna?»
[20] Isa vɛɛ ai yɛ: «Ài ma se k'a masɔlɔn àiya limandeya le dɔɔyanin. Ǹ'i tuɲa fɔ ài yɛ, hali ni àiya limandeya dɔɔyanin iwo biyaki kolo, ni ài k'a fɔ tini min yɛ ko a yi bɔ a nɔ lɔ ka taa, a yi taale. Ko ko tɛnala sena ài lakolila.
[21] [Kɛɛ jina min suu tɛ se bɔla mɔɔ kɔ, ni ài ma sun don ka Ala dali.]»
[22] Lon dɔ, kɔbiladen bɛ k'i ɲɔɔ ladɛn Galile koovi lɔ. Isa vɛɛ ai yɛ: «Ai kɛtɔ ǹe Mɔɔnivin Tanin donna mɔɔlu bolo.
[23] Ai kɛtɔ ǹ faala. Kɛɛ tele fila a sawana, m̀ wulitɔ ka bɔ saya lɔ.» Kuma wo ka kɔbiladennu joso magba kosɛvɛ.
[24] Isa ni aa kɔbiladennu ka se Kapɛlɛnam so kɔnɔ mingɛ, lɔhɔlɔmabonba wɔliminabalu k'ai madon Piɛl la ka a maɲininga, ai vɛɛ: «Àiya kalanmɔɔ yi lɔhɔlɔmabonba wɔli salala, kɛlɛ?»
[25] Piɛl vɛɛ ai yɛ: «Aan, a a salala.» Piɛl ka don bon na mingɛ, Isa vɛɛ a yɛ kunfɔlɔ le: «Simɔn, dunuɲa masakɛlu yi nisɔɔn minala jene la? Ai jɛlɛ ya jamanadennu baa aiya jamana minanin mɔɔlu? Mindɛ le y'i kɔnɔ?»
[26] Piɛl k'a javi, a vɛɛ: «Aiya jamana minanin mɔɔlu.» Isa vɛɛ: «Wo lɔ, ai jɛlɛ ya jamanadennu fɛ tɛ wo la.
[27] Wo bɛ n'a kɛ, mɔ t'a fɛ ka baa mɔɔ minnu ma. I yi taa loifiliya lɔ kɔɔ lɔ. I vɛ jɛɛ kunfɔlɔ min minala, i yi wo da laka k'a lɔfɛlɛn. I kɛtɔ wɔligbanan dɔ yena je. Wo vɛ kɛla, i yi taa wo di ai ma ka i ta ni ǹ ta nisɔɔn sala.»