<Matiyu 20

[1] Isa vɛ sana dɔ lala ai yɛ, a vɛɛ: «Ala vɛ aa masaya lankɛnɛmayala lon min, a kɛtɔ iwo gbeletii dɔ min ka bɔ sɔɔma dala ka taa baaleden ɲininya lɔ.

[2] Ale ni baaledennu ka bɛn mingɛ ko tele kelen sala yi wɔligbɛ kelen ne le, a k'ai lataa gbele lɔ.

[3] Siinintele waate, gbeletii ka bɔ kɔtunun ka taa mɔɔ dɔlu lɔnin ye so kɔnɔ. Ai tɛɛ tɛ foi la.

[4] A vɛɛ wolu yɛ: ‹Àilu gbazan yi taa ǹa gbele lɔ. Ǹ kɛtɔ sala bɛlɛ dila ài ma.›

[5] Mɔɔ wolu ka taa gbele lɔ. Tele latelen waate, gbeletii ka bɔ ka taa wo ɲɔɔn kɛ. Wula dafɛ, a ka bɔ ka taa wo ɲɔɔn kɛ kɔtunun.

[6] Wula la, gbeletii ka taa ka mɔɔ dɔlu lɔnin ye. A vɛɛ ai yɛ: ‹Mindɛ kɛnin ài telennin lɔnin jan, ài tɛ foi la?›

[7] Ai do vɛɛ a yɛ: ‹Mɔɔ ma mɔ ta baale ko lɔ.› Wo lɔ, gbeletii vɛɛ ai yɛ: ‹Àilu gbazan yi taa baalekɛya lɔ ǹa gbele lɔ.›

[8] Tele ma ka jii mingɛ, gbeletii vɛɛ baaleden kundii yɛ: ‹I yi baaledennu kili k'ai sala. Minnu nanin a bɛ kɔ, i yi salali damina wolu ma, ka na a sii a kunfɔlɔlu la.›

[9] Mɔɔ minnu ka se je telejii waate, a ka wɔligbɛ kelen di ai kelen kelenna bɛ ma.

[10] Minnu ka se baalekɛya lɔ kunfɔlɔ le, salali dakun senin ai ma, ai tɛɛ ai milila ko ai ta sala walatɔ ka timin a tɔlu ta la. Kɛɛ ai bɛ ka wɔligbɛ kelen kelen ne sɔlɔn.

[11] Ai salanin kɔ, ai vɛ kumala ai da kɔlɔ gbeletii ma,

[12] ai vɛɛ: ‹Kɛ́ minnu nanin mɔ kɔ, ai na lɛlɛ kelen ne kɛla baale la dein. Ǹu do telennin ne jan mɔlɔtɔtɔ tele gba kɔlɔ. Mindɛ lɔ i na mɔ bɛ sala lɔkaɲala?›

[13] Gbeletii k'ai lɔ kelen javi, a vɛɛ: ‹M̀ bɔ, m̀ m'i tɔɲɔ dɛ! Mɔ na bɛnna wɔligbɛ kelen ne ma, kɛlɛ?

[14] I yi sala mina i yi taa. Mɔɔ minnu nanin àilu kɔ, ǹ a fɛ ka wɔligbɛ kelen di wolu ma, iwo ǹ n'a dila ài ma teme.

[15] A yi di? Jo tɛ m̀ bolo ka ǹ sawonan ko kɛ m̀ bolofen nɔ? Ni wo tɛ, ǹ na kokein min kɛla yi ne, wo ɲangbeya le i la?

[16] Wo le kɛtɔ a kɛla, kɔmɔɔlu kɛtɔ ɲamɔɔlu le. Ɲamɔɔlu kɛtɔ kɔmɔɔlu le gbazan.»

[17] Ka Isa taamantɔ to Jelusalɛm, a ka aa keladen mɔɔ tan ni fila kili ai jɛlɛ ma. A vɛɛ ai yɛ:

[18] «Mɔ taatɔle Jelusalɛm. Ai kɛtɔ ǹe Mɔɔnivin Tanin donna salakalaseba kundiilu ni seliya kalanmɔɔlu bolo. Wolu kɛtɔ kiti bilala ǹ na ko ǹ ka kan ka faa.

[19] Ai do kɛtɔ ǹ donna siboloma gbɛlɛlu bolo. Ai kɛtɔ ǹ nafɛyala, ka m̀ gbasi gbusan na, ka ban ka ǹ faa. Kɛɛ tele fila a sawana, m̀ wulitɔ.»

[20] Wo kɔ, Zebede moso k'i madon Isa la a denkɛ fila le. A v'i bilinna a kumɛlɛni la a kɔlɔ k'a madiya ko dɔ la.

[21] Wo lɔ, Isa vɛɛ a yɛ: «Ài y'a fɛ ǹ'i mindɛ kɛ ài yɛ?» A vɛɛ Isa yɛ: «I vɛ iya masaya lankɛnɛmayala lon min, i yi diɲa ǹ denkɛ fila minnu y'i sii i dafɛ: dɔ y'i sii i bolokinin fɛ, dɔ y'i sii i bolonunma fɛ.»

[22] Isa ka javili kɛ, a vɛɛ: «Ài yi m̀ maɲiningala ko min na, ài ma wo lɔn. Tɔlɔya min kɛtɔ ǹ sɔlɔnna, ài yi sene wo kɔlɔ?» Ai k'a javi, ai vɛɛ: «Aan, m'i sene.»

[23] Isa vɛɛ: «Ǹ kɛtɔ tɔlɔya min sɔlɔnna, àilu gbazan kɛtɔ wo suu le sɔlɔnna. Kɛɛ siiya minnu yi m̀ bolokinin ni m̀ bolonunma fɛ, wolu diba tɛ ǹe le. Ǹ Fa na siiya wolu ladanna mɔɔ minnu yɛ, a kɛtɔ ai dila wolu le ma.»

[24] Keladen tɔ tan ka kuma wo mɛn mingɛ, ai ka mɔnɛ badenma fila wolu ma.

[25] Kɛɛ Isa k'ai bɛ kili k'a fɔ ai yɛ, a vɛɛ: «Ài k'a lɔn siboloma gbɛlɛ masakɛlu yi kundiiya kɛla aiya jamanadennu kunna diyanigbeya le la. Aiya mɔɔbalu yi fanga lala ai kan.

[26] Kɛɛ do a man kan ka kɛ ten ài tɛma. Min a fɛ ka kɛ mɔɔba le ài lɔ, fɔ wo tii yi kɛ àiya bɔliden ne le.

[27] Min do a fɛ ka kɛ ɲamɔɔ le ài lɔ, fɔ wo tii yi kɛ àiya jɔn ne le.

[28] Wo ɲa kelen ma, ǹe Mɔɔnivin Tanin ma na sa mɔɔlu yi kɛ ǹa bɔliden ne, fɔ ǹe yi kɛ aiya bɔliden ne le, ani ka ǹ nin di ka kɛ mɔɔ siyama kunmaka sala le.»

[29] K'ai bɔtɔ to Jɛliko so kɔnɔ, jama ba ka bila Isa kɔ.

[30] Wo k'a talan, ɲagbɛ kɛ́ fila siinin tɛɛ siya dala. Ai k'a mɛn mingɛ ko Isa le yi timinna, ai vɛ gbanɔla, ai vɛɛ: «Fanma, Dawuda Bɔzɔn, hina mɔ la.»

[31] Jama k'ai makuma ko ai yi jeden. Kɛɛ ai ka to gbanɔla ka timin kunfɔlɔ ta la, ai vɛɛ: «Fanma, Dawuda Bɔzɔn, hina mɔ la.»

[32] Isa k'i lɔ k'ai kili. A vɛɛ ai yɛ: «Ài y'a fɛ ǹ'i mindɛ kɛ ài yɛ?»

[33] Ai vɛɛ: «Fanma, m'a fɛ mɔ ɲa la yi ka.»

[34] Ai hina ka don Isa la. A ka a bolo tuu ai ɲa la, ado ai ɲa la ka ka telemanin. Wo kɛ, ai vɛ bilala Isa kɔ.