Matiyu 11
[1] Isa wɔlinin lailikan wo fɔla aa keladen mɔɔ tan ni fila yɛ, a ka bɔ je ka taa Jahudiyalu ya solu la ka mɔɔlu kalan ani k'ai kawani.
[2] Ka Makoliba Yaya to kaso la, a ka Masa Tɔɔmasenin Isa kɛkolu mɛn. Wo lɔ, a ka aa kɔbiladen dɔlu kelaya Isa fɛlɔ.
[3] Ai ka taa Isa maɲininga, ai vɛɛ: «Ala ya Mɔɔ Tanin min ka kan ka na, ile wo le, baa m'i mɔɔ gbɛlɛ makɔnɔ?»
[4] Isa k'ai javi, a vɛɛ: «Min bɛ kɛnin ài ɲana jan, ani min bɛ fɔnin ài ɲana, ài yi taa wo bɛ fɔ Yaya yɛ.
[5] Ko ɲagbɛlu ɲa la vɛ ka, namalanilu vɛ taama kobɛn, kunantɔlu la vɛ sɛnɛya, tologbɛlɛnnu tolo la vɛ ka, fulenilu vɛ ai wuli ka bɔ saya lɔ, ani Samakan Kein na vɛ se bolokolonnu ma.
[6] Ni mɔɔ mɔɔ ma tɛɛ ǹ nɔ, wo tii yi duwawuden ne le.»
[7] Yaya ya keladennu seikɔnin, Isa vɛ kumala jama yɛ ka bɛn Yaya ya ko ma, a vɛɛ: «Ài na taala ka mindɛ ye fuwa lɔ? Ài na kaa yena, fɔɲɛ yi min namaamaala? Wo tɛ dɛ!
[8] Ài na taala ka mindɛ ye wo lɔ? Faani kein tii? Minnu yi faani keinnu donna, wolu yi yena masakɛlu ya bonnu lu la.
[9] Ài na taala ka mindɛ ye? Jalasa ài ma taa ka kela dɔ ye? Ǹ a fɔ ài yɛ, ǹ ko kela le a le. A do buɲanin kela le feu!
[10] Aa ko sɛvɛnin kitabu kɔnɔ ko: ‹Ǹ kɛtɔ ǹa keladen nataala i ɲa ka siya ladan i yɛ.›
[11] Ǹ'i tuɲa fɔ ài yɛ, mɔɔ tɛ moso ya densɔlɔnnin nɔ min buɲanin ka timin Makoliba Yaya la, wo bɛ n'a kɛ, hali dennimanda min yi Ala ya masaya kɔlɔ, wo tii buɲanin Yaya le.
[12] K'a ta Yaya ya kawanili ma ka na a sii bi la, Ala ya masaya kɛnin fanga ko le le, ado fangamalu le y'a ɲininna ka a mina.
[13] Baa jani Yaya y'aa kawanili damina, kela Musa ya Tualati ani kela dɔgbɛlɛlu ya kitabulu tɛɛ kumala Ala ya masaya waate le ma.
[14] Ni ài ka diɲa ka la a la, Yaya yi kela Ileya le le, a fɔnin min ma ko a yi nala.
[15] Tolo yi min kun, wo tii y'a tolo malɔ kuma wo la.»
[16] Isa vɛɛ kɔtunun: «Ǹ'i bi mɔɔlu la fen suu mindɛ ma? Ai bɔnin dennilu la, minnu siinin ɲanatɛɛla bala lɔ. Ai y'a fɔla ai tɔvalu yɛ, ai vɛɛ:
[17] ‹Mɔ na tolon kɛla ài yɛ, kɛɛ do ài ma dɔn kɛ. Ani mɔ na saya dɔɔni lala ài yɛ, ài ma kasi.›
[18] Yaya ka na mingɛ, a deinnin tɛɛ sun donna, a tɛɛ tɛ gbɛ minna. Mɔɔlu tɛɛ a fɔla a ma wo le lɔ ko jina le y'a kɔ.
[19] Ǹe Mɔɔnivin Tanin gbazan vɛ na. Ǹ'i dɔnni ni minni kɛla k'a diyabɔ. Ai y'a fɔla ma wo le lɔ ko nooma le yi ǹ ne, ani gbɛtɔ. Ko ǹe yi nisɔɔnminaba ni konyonkɛbalu le kɛla ǹ tɔva le. Wo bɛ n'a kɛ, mɔɔ min yi taamana Ala ya hangilimaya lɔ, wo tii kɛkolu kɛtɔ a jiyala ko a yi siya bɛlɛ le kan.»
[20] Wo kɔ, Isa tɛɛ ka kawanako siyama kɛ so minnu la, a vɛ sokɔnɔmɔɔ wolu makumala, k'a masɔlɔn ai ma tube. Wo lɔ, a vɛɛ:
[21] «Kolazinkalu, gbalo yi ài yɛ. Betisaidakalu, gbalo yi àilu gbazan yɛ. Baa kawanako ba minnu kɛnin ài fɛlɔ, ni wolu tɛɛ ka kɛ Tili so kɔnɔ, ni wo tɛ Sidɔn so kɔnɔ, je mɔɔlu tɛɛ soile tubela. Ai tɛɛ ai siile buuli lɔ ka kasabɔlɔlu bila ai kanna, ka wo kɛ ai tube tɔɔmase le.
[22] Wo le y'a kɛla, ǹ a fɔla ài yɛ, kititɛɛlon vɛ sena, àiya kolaton gbeleyatɔle ka timin Tilika ni Sidɔnkalu ta la.
[23] Kapɛlɛnamkalu, àilu do? Ài y'ài milila ko àiya so jɛlɛtɔle haan ka sii sangbolo la? Wo tɛ kɛla! Ài jiitɔle haan ka taa se fɔɔ sulu ya so la! K'a masɔlɔn kawanako minnu kɛnin ài fɛlɔ, ni wo suu tɛɛ ka kɛ Sɔdɔm so kɔnɔ, so wo tɛɛ tole a nɔ lɔ ka sii bi la.
[24] Ǹ a fɔ ài yɛ, kititɛɛlon vɛ sena, àiya kiti gbeleyatɔle ka timin Sɔdɔmkalu ta la.»
[25] Wo waate, Isa vɛɛ: «Ǹ Fa Ala, sangbolo ni duukolo Tii, ǹ'i balika bɔla i yɛ, k'a masɔlɔn i na ko minnu doonna hangilima ni lɔnnilalu ma, i vɛ wolu jiya kalankɛbalilu la.
[26] Ǹ Fa, a diyanin i yɛ ka kokein min kɛ.»
[27] Isa vɛɛ mɔɔlu yɛ: «Ǹ Fa vɛ fen bɛ di m̀ ma. Mɔɔ ma ǹe Ala Den lɔn bɛlɛbɛlɛ kɛ fɔ ǹ Fa Ala. Ado mɔɔ ma ǹ Fa Ala lɔn bɛlɛbɛlɛ kɛ fɔ ǹe a Den, ani ǹ a fɛ ǹ a lankɛnɛmaya minnu yɛ.»
[28] «Àilu minnu sɛɛnin àiya doni gbili kɔlɔ, ài yi na ǹ ma, ǹ'i nɔningɛ di ài ma.
[29] Ài yi diɲa ǹa kundiiya ma iwo nisi yi diɲala sɛnɛkɛdawa ma teme. Ài yi kɛ ǹa kɔbiladen ne. M̀ mafanin, ǹa ko gbeleyanin tɛ. Ài vɛ nala ǹ ma, àilu gbu yi nɔningɛ sɔlɔnne.
[30] K'a masɔlɔn ǹa baalelu nɔɔyanin ne, ani ǹa donilu fɛyale ài ma.»