[1] Liá he Song-chú khí-sṳ ke fa: Kì yí-kîn siên-pu oi chit-fa̍t Ha̍p-tet-lâ-thi lâu Thai-mâ-sṳ-kiet-sàng. M̀ tân-chhiang Yî-set-lie̍t kok kî-chhu̍k su̍k Song-chú, Si-li-â ke kîn-sàng ya su̍k Song-chú.
[2] Hàn-yû Ha̍p-tet-lâ piên-kie ke Ha̍p-mâ, pin Thai-ngì, Sî-tun lióng-sàng ke ngìn, put-kón kì-têu yû kí-thai ke chhòi-nèn, ya he su̍k Song-chú.
[3] Thai-ngì vi chhṳ-kâ hí sàng-pó, chit-chhùn kîm-ngiùn, tô-to chhiong kiê-lu ke nài-sâ.
[4] Chúng-he, Chú oi chiông kì só-yû ke chhiòn-phu nâ-chéu, fí-thet kì hói-song ke khièn-li; liá-sàng voi pûn fó sêu-thet.
[5] Ke-sṳ̀, Â-sṳ̍t-kî-lùn khon-tó chhiu chho̍k-kiâng; Kâ-sat khon-tó chhiu thung-khú chṳ-khi̍t; Yî-kiet-lùn ya khiung-yong sṳt-mong to kien-seu. Kâ-sat voi sṳt-thet kiûn-vòng; Â-sṳ̍t-kî-lùn voi mò-ngìn he̍t.
[6] Ngoi-chhu̍k-ngìn voi he̍t chhai Â-sṳ̍t-thut. Song-chú kóng: “Ngài oi sṳ́ kiêu-ngau ke Fî-li-sṳ-ngìn pien pî-mì.
[7] Kì-têu m̀-voi chai sṳ̍t tai-hiet ke ngiuk, ngà-chhṳ́ phung m̀-voi yû tet-ngìn-nâu ke sṳ̍t-vu̍t. Só-chhûn ke ngìn voi sàng-cho Ngài ke chṳ́-mìn, chhiong Yù-thai ke yit-chhu̍k. Yî-kiet-lùn-ngìn voi sàng-cho Ngài ke chṳ́-mìn, lâu Yâ-pu-sṳ̂-ngìn khiung-yong.
[8] Ngài oi chhai Ngài ke kâ-yèn si-vì ôn-yàng, m̀ pûn kiûn-chhui chhîm-ngi̍p lòi chien-tha̍p. Ngài m̀-chún yû-ngìn chai khî-fu Ngài ke chṳ́-mìn, yîn-vi liá-ha Ngài ngin-chṳ̂n khon-tén Ngài ke kâ.”
[9] He̍t chhai Siak-ôn ke ngìn â, oi fôn-hí khoai-lo̍k! Yâ-lu-sat-lâng ke ngìn-mìn â, oi fôn-hí na-thiên! Khon â, ngì ke kiûn-vòng lòi lé! Kì he kûng-ngi ke, kì he tet-sṳn ke, chúng-he chhin khiâm-pî khì-tén lì-è lòi, khì-tén yit-thiàu se lì-è.
[10] Song-chú kóng: Ngài oi nâ-chéu Yî-fap-lièn ke chan-chhâ, chhù-thet Yâ-lu-sat-lâng ke chan-mâ; chan-chhòng ke kiûng ya oi áu-thet. Ngì-têu ke vòng oi hiong kok-koet kóng fò-phìn; kì oi thúng-chhṳ liá-hói to ke-hói, tui Yu-fat-lâ-tí-hò to thi-khi̍t.
[11] Song-chú kóng: Yîn-vi Ngài sṳt yung hiet lâu ngì li̍p-yok, Ngài oi chiông ngì-têu pûn-ngìn chok-hi koân ke, tui châu súi-fut tî-poi piong chhut-lòi.
[12] Pûn-ngìn koân hàn-yû chṳ́-mong ke ngìn â, oi chón-lòi! Chón-to ôn-chhiòn ke sàng-pó! Ngài kîm-pû-ngit lâu ngì-têu kóng, Ngài oi kâ-phi su-fuk lòi pú-sóng ngì-têu.
[13] Ngài oi yung Yù-thai cho Ngài ke kiûng, yung Yî-fap-lièn cho Ngài ke chien; Siak-ôn â, Ngài oi sṳ́ ngì ke ngìn-mìn hong hí-lòi, chhiong yúng-sṳ ke tô, hi kûng-tá Hî-lia̍p-ngìn.
[14] Song-chú oi chhai Kì chṳ́-mìn ke táng-kô hién-hien; Kì sa ke chien chhiong ngiap-lang. Chṳ-kô ke Song-chú oi phùn yòng-kok; Kì oi chhô-tén nàm-phién ke phau-fûng-yí lòi.
[15] Song-chú — Van-kiûn ke Ngièn-soi oi pó-fu Kì ke chṳ́-mìn; kì-têu oi sêu-me̍t tui-thi̍t, tha̍p-tén thi̍t-ngìn fit ko-lòi ke sa̍k-thèu, thai-sâng vè-sê, chhiong sṳ̍t chiú-chui ke ngìn. Kì-têu oi chhiong hien-chi sṳ̀ chông-hiet ke vón-kûng khiung-yong, mân-sṳ̂n he thi̍t-ngìn ke hiet; hiet liù-tén hâ, chhiong thèu-sâng ke hiet chhai chi-thàn ke si-chak kok liù-tén hâ.
[16] Chhai ke-ngit, Song-chú — kì-têu ke Song-ti oi chṳ́n-kiu kì-têu, chhiong mu̍k-ngìn kiu yòng-khiùn thot-lì ngùi-hiám. Kì-têu voi chhai Kì ke thú-thi song fat-kông, chhiong miên-liù táng ke pó-sa̍k yit-yong.
[17] Kì-têu he ngióng-pân ke chiâng! Yû ńg-kuk sṳ́ seu-ngièn sṳ̂n-thí chap-chen, yû sîn-chiú sṳ́ seu-ńg yùng-mau pien-chiâng.