[1] Ngài yu ngo-thèu khon-tó nang-ngoi yit-ke yi-siong, khon-tó yû si-liòng chan-chhâ tui lióng-chho thùng ke sân chûng-kiên chhut-lòi.
[2] Thô thi-yit liòng chan-chhâ ke he fùng-mâ, thô thi-ngi liòng chan-chhâ ke he vû-mâ.
[3] Thô thi-sâm liòng ke he pha̍k-mâ, thô thi-si liòng ke he yû pân-tiám ke mâ; tak-chhui ke mâ chhiòn-phu chhin khiòng-chong.
[4] Ngài chhiu mun lâu ngài kóng-fa ke thiên-sṳ́ kóng: “Chú â, liá-têu chan-chhâ he má-ke yi-sṳ?”
[5] Thiên-sṳ́ en ngài kóng: “Liá-têu he thiên-táng lòi ke si-chhṳn fûng, he tui phû-thiên-ha ke Chú mien-chhièn chhut-lòi ke.”
[6] Vû-mâ oi thô-hiong pet-fông to Pâ-pí-lùn hi, pha̍k-mâ hiong sî-fông hi, yû pân-tiám ke mâ hiong nàm-fông hi.
[7] Liá-têu khiòng-chong ke mâ yit chhut-lòi, chhiu tông sióng-oi hi chhiòn sṳ-kie. Thiên-sṳ́ fûn-fu kì-têu kóng: “Ngì-têu hi sùn-chhà chhiòn sṳ-kie!” Kì-têu chhiu cheu fûn-fu hi.
[8] Thiên-sṳ́ yu thai-sâng tui ngài kóng: “Khon â! Hiong pet-fông to Pâ-pí-lùn hi ke mâ, yí-kîn chhai ke-vi pûn Song-chú ke thai su-hi phìn-chhin hâ-lòi!”
[9] Song-chú ke fa yu lìm-to ngài kóng:
[10] “Ke-têu to-chón-lòi ke ngìn tông-chûng, ngì oi chiông Het-thoi, Tô-pí-ngâ lâu Yâ-thai-ngâ só-hien ke lî-vu̍t, ngiàm-sṳ̀ tai-to Sî-fân-ngâ ke lai-é Yok-sî-â ke vuk-hâ hi; liá sâm-sà he tui Pâ-pí-lùn chón-lòi ke.
[11] Ngì oi yung kì-têu só-hien ke kîm-ngiùn cho yit-táng miên-liù, tai chhai Yok-sat-tap ke lai-é thai-chi-sṳ̂ Yok-sû-â ke thèu-nà-táng.
[12] Ngì oi lâu kì kóng: Song-chú — Van-kiûn ke Ngièn-soi án-ngiòng kóng: ‘Khon â, ke ham-cho “Su-kî” ke ngìn, kì oi chhai chhṳ-kâ ke thi-fông sâng chhut-hi, pin chhùng-kien Song-chú ke sṳn-thien.
[13] Kì chhiu-he ke oi hí Song-chú ke sṳn-thien, chiap-su vòng ke yùng-yeu, chhô chhai pó-chho táng, thúng-chhṳ kì chṳ́-mìn ke ke-sà ngìn. Yû yit-ke chi-sṳ̂ oi khî chhai kì ke pó-chho phòng-piên; kì lióng-sà voi chhai fò-phìn chûng khiung-ha tá-piang.’
[14] Liá-táng miên-liù oi liù chhai Song-chú ke sṳn-thien cho ki-ngiam-phín, ki-ngiam Het-thoi, Tô-pí-ngâ, Yâ-thai-ngâ lâu Sî-fân-ngâ ke lai-é Yok-sî-â.”
[15] He̍t chhai yén-fông ke ngìn oi chón-lòi hia̍p-chhu chhùng-kien Song-chú ke sṳn-thien. Sṳn-thien chhùng-kien yî-heu, ngì-têu chhiu voi tî he Song-chú — Van-kiûn ke Ngièn-soi chhâi-phai ngài to ngì-têu liá-vi lòi. Na-he ngì-têu vàn-chhiòn chûn-sú Song-chú — ngì-têu Song-ti ke min-lin, liá-sṳ yit-thin voi sṳ̍t-hien.