[1] Chhai nang-ngoi yit-ke yi-siong chûng, Song-chú pûn ngài khon-tó thai-chi-sṳ̂ Yok-sû-â khî chhai Song-chú ke thiên-sṳ́ mien-chhièn, Sat-tan khî chhai Yok-sû-â ke yu-phién, chún-phi oi ko Yok-sû-â.
[2] Song-chú ke thiên-sṳ́ lâu Sat-tan kóng: “Sat-tan, Song-chú oi chit-phi ngì! Chhiu-he kién-sién Yâ-lu-sat-lâng ke Song-chú oi chit-phi ngì! Liá-ke ngìn kám m̀-he chhiong tui fó-chûng chhû chhut-lòi ke yit-kî chhèu mâ?”
[3] Yok-sû-â chok-tén ô-chô ke sâm-fu khî chhai thiên-sṳ́ mien-chhièn.
[4] Thiên-sṳ́ fûn-fu khî chhai kì mien-chhièn ke phu-ha kóng: “Chiông liá-ke ngìn ke ô-chô sâm-fu thot-thet.” Yu tui Yok-sû-â kóng: “Ngài yí-kîn chhù-thet ngì ke chhui, oi pûn ngì chok kô-kui ke sâm-fu.”
[5] Ngài chhut-sâng kóng: “Oi chiông chhiang-li ke mo-é tai chhai kì ke thèu-nà-táng.” Phu-ha chhiu chiông chhiang-li ke mo-é tai chhai Yok-sû-â ke thèu-nà-táng, lâu kì chok kô-kui ke sâm-fu; ke-sṳ̀, Song-chú ke thiên-sṳ́ khî chhai sùn-thèu.
[6] Song-chú ke thiên-sṳ́ kín-ko Yok-sû-â kóng:
[7] “Song-chú — Van-kiûn ke Ngièn-soi án-ngiòng kóng: Na-he ngì chûn-sú Ngài ke fap-li̍t, sṳ̍t-hàng Ngài phai ngì ke ngim-vu, ngì chhiu khó-yî ki-siu̍k kón-lî Ngài ke sṳn-thien lâu thìn-yen. Ngài ya voi pûn ngì khièn-li chhut-ngi̍p Ngài ke mien-chhièn, chhiong liá-têu khî chhai Ngài mien-chhièn ke thiên-sṳ́ khiung-yong.
[8] Thai-chi-sṳ̂ Yok-sû-â â, ngì oi thâng! Ngì ke thùng-phân, chhiu-he ke-têu sàng-cho hó seu-thèu ke chi-sṳ̂, ya oi thâng! Ngài oi khí-sṳ Ngài ke phu̍k-ngìn, chhiu-he pûn-ngìn ham-cho ‘Su-kî’ ke.
[9] Ngài oi chhai Yok-sû-â mien-chhièn piong yit-te pó-sa̍k, liá pó-sa̍k yû chhit-mien. Ngài — Song-chú, Van-kiûn ke Ngièn-soi oi chhîn-chhṳ chhai liá pó-sa̍k mien-táng khat-sṳ. Ngài ya oi chhai yit-ngit nui chhù-thet liá thi-fông ke chhui-ok.
[10] To ke-ngit, ngì-têu tak-sà oi chhiáng lìn-sa lòi, to phù-thò-su lâu vù-fâ-kó-su hâ-poi chhô-liau. Liá he Song-chú — Van-kiûn ke Ngièn-soi kóng ke.”