[1] Thèu-ha lâu ngài kóng-fa ke thiên-sṳ́ yu lòi ham-siáng ngài, chhiong soi tông lo̍k-kau pûn-ngìn hêm-siáng.
[2] Kì mun ngài: “Ngì khon-tó má-ke?” Ngài en-kóng: “Yit-chho sùn-kîm ke tên-thòi, táng-kô yû yit-chak chông-yù ke vón, tên-thòi táng yû chhit-chán tên, tak-chán tên yû chhit-kî tên-sîm-kón.
[3] Yù-vón lióng-phién yû kám-lám-su, yit-thèu chhai yu-phién, yit-thèu chhai chó-phién.”
[4] Ngài mun lâu ngài kóng-fa ke thiên-sṳ́: “Chú â, liá-têu tûng-sî thoi-péu má-ke?”
[5] Lâu ngài kóng-fa ke thiên-sṳ́ en ngài kóng: “Ngì m̀-tî liá-têu he má-ke mâ?” Ngài en-kóng: “Chú â, ngài m̀-tî.”
[6] Kì tui ngài kóng: “Liá he Song-chú oi chṳ́-sṳ Só-lò-pâ-pak ke fa. Song-chú — Van-kiûn ke Ngièn-soi kóng: ‘M̀-he kho khièn-sṳ, m̀-he kho chhòi-nèn, chṳ́-yû kho Ngài ke Lìn.’
[7] Thai-sân â, ngì son má-ke? Chhai Só-lò-pâ-pak mien-chhièn, ngì thin-chho̍k voi pien-cho phiàng-thi. Kì chiông sṳn-thien chui-heu yit-te sa̍k-thèu thia̍p sông-hi ke sṳ̀, chung-ngìn yit-thin voi thai-sâng fôn-hí hêm-kóng: ‘Hàn-chiâng ô! Ngien Song-chú su-fuk!’ ”
[8] Song-chú ke fa yu lìm-to ngài kóng:
[9] “Só-lò-pâ-pak ke sú tá-hó liá sṳn-thien ke thi-kî, kì ya thin-chho̍k voi chhîn-sú vàn-sṳ̀n liá-hong kûng-chhàng. Ke-sṳ̀, ngì-têu chhiu voi tî he Song-chú — Van-kiûn ke Ngièn-soi chhâi ngài to ngì-têu liá-vi lòi.
[10] Má-ngìn sṳt-mong yîn-vi liá-têu sṳ-chhìn chin-hàng thet-man? Kì-têu yit khon-tó Só-lò-pâ-pak sú nâ sien-thò hí-kûng, ke-sṳ̀, kì-têu chhiu voi thai fôn-hí.” Thiên-sṳ́ yu tui ngài kóng: “Liá chhit-chán tên thoi-péu Song-chú ke muk-chû, oi kam-chhat chhiòn sṳ-kie.”
[11] Ngài yu mun thiên-sṳ́: “Tên-thòi lióng-phién, ke lióng-thèu kám-lám-su yu he má-ke yi-sṳ nè?
[12] Chṳ̂m kám-lám-yù ke lióng-kî kîm-kón ke phòng-piên, ke lióng-kî kám-lám su-kî yu he má-ke yi-sṳ?”
[13] Kì mun ngài: “Ngì m̀-tî liá he má-ke?” Ngài kóng: “Chú â, ngài m̀-tî.”
[14] Kì kóng: “Liá he lióng-ke tho̍k chhut-lòi chiap-su kò-yù ke, oi lòi sṳ-fung phû-thiên-ha ke Chú.”