[1] Song-chú — Van-kiûn ke Ngièn-soi chhòn-pûn Sat-kâ-li-â yî-ha ke fa.
[2] Kì kóng: “Siak-ôn he Ngài chhṳ̂m-chhṳ̂m thung-siak ke; yîn-vi Ngài tông-siak kì ke ngìn-mìn, só-yî Ngài tui kì ke sù-thi̍t thai fat-khién.”
[3] Song-chú yu kóng: “Ngài liá-ha oi chón-to Siak-ôn-sân, he̍t chhai Yâ-lu-sat-lâng. Ngìn oi chhṳ̂n Yâ-lu-sat-lâng cho ‘Sṳ̀n-sṳ̍t ke Sàng’, chiông Song-chú — Van-kiûn Ngièn-soi ke sân chhṳ̂n-cho ‘Sṳn-sân’.”
[4] Song-chú — Van-kiûn ke Ngièn-soi án-ngiòng kóng: “Chiông-lòi voi chai yû ló-â-kûng, ló-â-phò chhô chhai Yâ-lu-sat-lâng kiê-hong, tak-sà lûng-chúng sú khú-tén chhóng-è.
[5] Sàng-tú, kiê-hong voi yû tông-tô ke se-â-kô-é, se-â-moi-é chhai ke-vi káu.”
[6] Song-chú — Van-kiûn ke Ngièn-soi án-ngiòng kóng: “To ke-ngit, só-chhûn ke ngìn-mìn voi ngin-vì liá-chúng chhìn-khóng he mò khó-nèn fat-sên ke sṳ; chúng-he tui Ngài lòi kóng, liá m̀-he mò khó-nèn ke.” Liá he Song-chú — Van-kiûn ke Ngièn-soi kóng ke.
[7] Song-chú — Van-kiûn ke Ngièn-soi án-ngiòng kóng: “Ngài oi tui tûng-phién, sî-phién ke koet-kâ chiông Ngài ke ngìn-mìn chṳ́n-kiu chhut-lòi.
[8] Ngài oi tai kì-têu chón-lòi, pûn kì-têu he̍t chhai Yâ-lu-sat-lâng sàng-tú. Kì-têu oi cho Ngài ke chṳ́-mìn; Ngài oi cho kì-têu ke Song-ti, cheu sin-sṳ̍t, kûng-phìn chhṳ-lî kì-têu.”
[9] Song-chú — Van-kiûn ke Ngièn-soi án-ngiòng kóng: “Oi kiên-khiòng! Ngì-têu liá-ha só thâng-tó ke fa, chhiu-he chhùng-kien Ngài ke sṳn-thien, khôi-kûng tá thi-kî ke sṳ̀ siên-tî só kóng-ko ke fa.
[10] Chhai ke-ngit yî-chhièn, mò-lun he ngìn ya-he thèu-sâng, cho-kûng nâ m̀-tó kûng-chhièn; yu yîn-vi thi̍t-ngìn ke yèn-ku, chhut-ngi̍p mò phìn-ôn, yîn-vi Ngài sṳ́ chung-ngìn fu-siông kûng-kit.
[11] Chúng-he liá-ha Ngài mò chhiong yî-chhièn án-ngiòng tui-thai só-chhûn ke ngìn-mìn. Liá he Ngài — Song-chú, Van-kiûn ke Ngièn-soi kóng ke.
[12] Kì-têu voi phìn-phìn ôn-ôn hi ve-chúng; phù-thò-su voi kiet phù-thò, thú-thi voi chhut-sán ńg-kuk, yí-súi chhûng-chiuk. Ngài oi chiông liá-têu fuk-hi su-pûn só-chhûn ke ngìn-mìn.
[13] Yù-thai-kâ lâu Yî-set-lie̍t-kâ â, ko-hi chhai ngoi-chhu̍k-ngìn chûng, ngì-têu ngióng-pân sàng-cho su chu-chú ke; chúng-he, Ngài oi chṳ́n-kiu ngì-têu, ngìn oi chhṳ̂n ngì-têu cho yû fuk-hi ke. Só-yî, ngì-têu oi kiên-khiòng, m̀-sṳ́ kiâng!”
[14] Song-chú — Van-kiûn ke Ngièn-soi án-ngiòng kóng: “Ngì-têu ke chú-siên ngiâ Ngài fat-khién ke sṳ̀, Ngài kiet-thin kong châi-nan chhai kì-têu ke sṳ̂n-song, mò kói-pien sîm-yi.
[15] Liá-ha Ngài cheu-yong kiet-thin oi su-fuk pûn Yâ-lu-sat-lâng lâu Yù-thai ke ngìn-mìn. Só-yî ngì-têu m̀-sṳ́ kiâng.
[16] Ngì-têu yin-tông án-ngiòng cho: Thai-kâ kóng-fa oi sṳ̀n-sṳ̍t; chhai sàng mùn-héu sṳ́m-phan ke sṳ̀ oi kûng-chṳn, sṳ́-ngìn fò-mu̍k;
[17] m̀-hó chhùn-sîm hoi phe̍t-ngìn; m̀-hó cho ká kien-chṳn. Liá-têu sṳ chhiòn he Ngài — Song-chú só-nâu ke.”
[18] Song-chú — Van-kiûn ke Ngièn-soi yu chiông fa chhòn-pûn ngài. Kì kóng:
[19] “Chhai si-ngie̍t, ńg-ngie̍t, chhit-ngie̍t, sṳ̍p-ngie̍t ke kim-sṳ̍t, oi sàng-cho Yù-thai-ngìn fôn-hí khoai-lo̍k ke chiet-khì. Ngì-têu oi fôn-hí sṳ̀n-sṳ̍t lâu fò-phìn.”
[20] Song-chú — Van-kiûn ke Ngièn-soi án-ngiòng kóng: “Chiông-lòi voi yû lie̍t-koet ke ngìn-mìn lâu tông-tô sàng-sṳ ke ngìn lòi-to Yâ-lu-sat-lâng.
[21] Liá-sàng ke ngìn voi lâu ke-sàng ke ngìn kóng: ‘Ngài-têu kiak-kiak lòi-hi kin-pai Song-chú — Van-kiûn ke Ngièn-soi, khiù Kì su-fuk. Ngài me oi lòi-hi!’
[22] Voi yû chhin-tô mìn-chhu̍k lâu khiòng-thai ke koet-kâ lòi-to Yâ-lu-sat-lâng kin-pai Song-chú — Van-kiûn ke Ngièn-soi, khiù Kì su-fuk.
[23] To ke-sṳ̀, voi yû sṳ̍p-ke ngoi-koet-ngìn lâi-tén yit-ke Yù-thai-ngìn ke sâm-mî, kóng: ‘Ngài-têu oi lâu ngì-têu khiung-ha hi, yîn-vi ngài-têu thâng-kóng Song-ti lâu ngì-têu thùng-chhai.’ ” Liá he Song-chú — Van-kiûn ke Ngièn-soi kóng ke.