[1] Chhai chhûn-thiên ngì-têu oi hiong chho ngiap-lang ke Song-chú khiù yí. Kì chhiu voi lo̍k chhûng-chiuk ke yí-súi, sṳ́ chung-ngìn ke thièn-yèn sên-sán nùng-chok-vu̍t.
[2] Yîn-vi hiong ngiéu-siong lâu puk-koa ke khiù-mun, só-tet ke fì-tap he hî-ká ke. Yû-têu ngìn kóng mò-yáng mò-chiak ke mung, kì-têu ke ôn-ví lûng-chúng mò yung. Só-yî ngìn-mìn liù-lì sṳt-só, chhiong yòng-è mò mu̍k-ngìn su-khú su-nan.
[3] Song-chú kóng: “Ngài hiong ke-têu thúng-chhṳ Ngài chṳ́-mìn ke ngoi-chhu̍k-ngìn fat-khién; Ngài oi chit-fa̍t kì-têu. Ngài — Song-chú, Van-kiûn ke Ngièn-soi oi cheu-ku chhṳ-kâ ke yòng-khiùn, chhiu-he Yù-thai ke ngìn-mìn, sṳ́ kì-têu sàng-cho Ngài khiòng-chong ke chan-mâ.
[4] Chhai kì-têu tông-chûng oi sán-sên chóng-khièn ke liâng-chhiu, chhiong vuk-è ke fòng-kok-sa̍k, tâng-é, lâu chan-chên ke kiûng.
[5] Kì-têu voi chhiong yúng-sṳ, chhai chan-chhòng chṳ-fu̍k sù-thi̍t, chhiong chhai kiê-lu chien-tha̍p nài-mòi. Kì-têu oi hi siông-chhṳ̀, yîn-vi Ngài — Song-chú lâu kì-têu thùng-chhai; kì-têu voi tá-yàng thi̍t-ngìn ke khì-pîn.
[6] Ngài oi sṳ́ Yù-thai-kâ khiòng-sṳn, chṳ́n-kiu Yok-sit ke kâ. Ngài oi lìn-mén kì-têu, tai-liâng kì-têu chón-lòi; kì-têu voi chhiong m̀-sṳt pûn Ngài fit-thet yit-yong. Yîn-vi Ngài he Song-chú — kì-têu ke Song-ti, Ngài yit-thin voi thâng kì-têu ke khì-tó.
[7] Yî-fap-lièn-ngìn voi chhiong yúng-sṳ; kì-têu voi chhiong lîm-chiú ke ngìn án-ngiòng, sîm-chûng sóng-khoai. Kì-têu ke chṳ́-ńg ya voi yîn-vi liá-pái ke sṳn-li lòi khoai-lo̍k; kì-têu ke sîm voi yîn-vi Song-chú só-cho ke thai-thai fôn-hí.
[8] Ngài oi fat-chhut sin-ho, chhi-si̍p kì-têu. Ngài oi kiu-su̍k kì-têu, sṳ́ kì-têu ke ngìn-su chen-kâ, chhiong yî-chhièn án-ngiòng kín chen-kâ.
[9] Sûi-yèn Ngài chiông kì-têu fûn-san to lie̍t-koet chûng, kì-têu chhai yén-fông hàn-he voi ki-ngiam Ngài. Kì-têu lâu kì-têu ke chṳ́-ńg voi ki-siu̍k sên-chhùn, yû-hó khiung-ha chón-lòi ku-hiông.
[10] Ngài oi tui Âi-khi̍p chiông kì-têu tai chón-lòi, tui Â-sut tai-liâng kì-têu chhut-lòi. Ngài oi thu kì-têu to Kî-lie̍t lâu Lì-pâ-nun; liá-têu thi-fông to-mî voi m̀-la kì-têu he̍t.
[11] Kì-têu kîn-ko khú-hói ke sṳ̀, Ngài oi tá hói-long, Nì-lò-hò voi châu-thet. Kiêu-ngau ke Â-sut voi pien-cho khiâm-pî; khiòng-thai ke Âi-khi̍p voi pien mò li̍t-liong.
[12] Ngài oi sṳ́ Ngài ke chṳ́-mìn yí-kho Ngài lòi khiòng-sṳn; kì-têu só-hàng só-cho lûng-chúng oi fung Ngài ke miàng.” Song-chú án-ngiòng siên-pu lé.