[1] Heu-lòi, Thai-ví yu kûng-kit Fî-li-sṳ-ngìn, tá-yàng kì-têu, cham-liâng Kâ-thi̍t-sàng lâu fu-khiun ke chhûn-chông.
[2] Thai-ví ya tá-yàng Mô-ap-ngìn, sṳ́ Mô-ap-ngìn kûi-sun kì, hiong kì chin-kung.
[3] Chiap-tén, Thai-ví chhai Ha̍p-mâ fu-khiun kûng-tá Si-li-â ke Só-pâ-vòng Ha̍p-thai-tí-chhia, yîn-vi Ha̍p-thai-tí-chhia sióng-oi kiên-ku Yu-fat-lâ-tí-hò song-yù thi-khî ke thúng-chhṳ-khièn.
[4] Thai-ví chhióng-chéu kì ke chan-chhâ yit-chhiên liòng, chok-tó khì-pîn chhit-chhiên ngìn, phu-pîn lióng-van ngìn. Tui chok-lòi ke mâ tông-chûng, Thai-ví liù-hâ oi thô yit-pak liòng chan-chhâ la-ngiak ke chan-mâ, chiông khì-thâ chan-mâ ke kiok-kîn chhiòn-phu to̍k-thôn.
[5] Thai-mâ-sṳ-kiet ke Si-li-â-ngìn phai kiûn-chhui hi pông-chhu Só-pâ-vòng Ha̍p-thai-tí-chhia ke sṳ̀, Thai-ví kûng-tá kì-têu, chhṳ̀-thet lióng-van lióng-chhiên ngìn.
[6] Yèn-heu, Thai-ví phai kiûn-chhui chu chhai Thai-mâ-sṳ-kiet, Si-li-â-ngìn ke koet-nui; kì-têu chhiòn-phu kûi-sun Thai-ví, hiong kì chin-kung. Thai-ví mò-lun hi-to nai-vi, Song-chú sṳ́ kì tak-pái tá-yàng.
[7] Thai-ví chhióng-tó Ha̍p-thai-tí-chhia ke-têu kiûn-kôn só nâ ke kîm tún-phài, tai-chón Yâ-lu-sat-lâng hi,
[8] yu tui Ha̍p-thai-tí-chhia thúng-chhṳ ke lióng-chak sàng-sṳ Thì-pâ lâu Kiûn chhióng-tó chhin-tô ke thùng. (Heu-lòi Só-lò-mùn yung liá-têu thùng chu-chho sṳn-thien ke thùng-hói, thùng-chhû lâu thùng-hi.)
[9] Ha̍p-mâ-vòng Thò-yî thâng-kóng Thai-ví tá-yàng Só-pâ-vòng Ha̍p-thai-tí-chhia ke chhiòn-kiûn,
[10] chhiu phai kì ke lai-é Ha̍p-tô-làn hi hiong Thai-ví-vòng chhiáng-ôn, chuk-fo kì tet-tó sṳn-li (ngièn-lòi Thò-yî lâu Ha̍p-thai-tí-chhia sṳ̀-sòng siông-chhṳ̀.) Ha̍p-tô-làn tai-lòi kîm, ngiùn, thùng chṳ-chho ke lî-vu̍t sung-pûn Thai-ví.
[11] Thai-ví-vòng chiông liá-têu lî-vu̍t lièn thùng kì tui khì-thâ koet-kâ chhióng-lòi ke kîm-ngiùn, chhiu-he tui kì só chṳ̂n-fu̍k ke Yî-tûng, Mô-ap, Â-mùn, Fî-li-sṳ, lâu Â-mâ-li̍t chhióng-lòi ke, lûng-chúng fûn-phe̍t vì-sṳn hien-pûn Song-chú.
[12] Â-pí-chhî (kiâ-mê he Sé-lu-ngâ) chhai Yàm-kuk chhṳ̀-thet yit-van pat-chhiên Yî-tûng-ngìn.
[13] Kì phai kiûn-chhui chu chhai Yî-tûng ke tak thi-fông; ke thi-fông ke ngìn-mìn chhiòn-phu kûi-sun Thai-ví. Thai-ví mò-lun hi-to nai-vi, Song-chú sṳ́ kì tak-pái tá-yàng.
[14] Thai-ví thúng-chhṳ chhiòn Yî-set-lie̍t, hiong ngìn-mìn sṳ̍t-hàng kûng-ngi.
[15] Sé-lu-ngâ ke lai-é Yok-ap cho ngièn-soi; Â-hî-li̍t ke lai-é Yok-sâ-fap cho li̍t-sṳ́-kôn;
[16] Â-hî-thut ke lai-é Sat-tuk lâu Â-pí-â-thâ ke lai-é Â-hî-mí-le̍t cho chi-sṳ̂; Sî-lòi-ngâ cho vòng-sṳt sû-ki;
[17] Yâ-hò-yâ-thai ke lai-é Pí-nâ-ngâ cho Thai-ví ke sṳ-ví-chóng, thúng-kón Kî-li-thì-ngìn lâu Pí-li-thì-ngìn; Thai-ví ke-têu lai-é chhai vòng sṳ̂n-piên ke kôn-yèn tông-chûng cho liâng-chhiu.