[1] Kì-têu chiông Song-ti ke yok-khui kông hâ-lòi, piong chhai Thai-ví yi-phi hó ke chong-phùng tú, yèn-heu hiong Song-ti hien sêu-fa-chi lâu phìn-ôn-chi.
[2] Thai-ví hien-chi yî-heu, chhiu fung Song-chú ke miàng chuk-fuk ngìn-mìn,
[3] yu chiông sṳ̍t-vu̍t pûn-pûn kì-têu. Yî-set-lie̍t-ngìn, mò-lun nàm-ńg, tak-sà tet-tó yit-te piáng, yit-te ngiuk lâu yit-te phù-thò-piáng.
[4] Thai-ví chṳ́-phai kí-ke Li-vi-ngìn chhai Song-chú ke yok-khui thèu-chhièn sṳ-fung, siung-chan kin-pai Song-chú — Yî-set-lie̍t ke Song-ti.
[5] Â-sat he chhui-chóng, Sat-kâ-li-ngâ he fu chhui-chóng. Ngâ-siet, Sṳ-mí-lâ-ma̍t, Yâ-hiet, Mâ-thâ-thì-ngâ, Yî-li-ap, Pí-nâ-ngâ, Ngò-phe̍t-Yî-tûng, lâu Yâ-li thàn su-khìm. Â-sat tá chhê-é.
[6] Lióng-ke chi-sṳ̂ — Pí-nâ-ngâ lâu Ngâ-ha̍p-sit cheu-sṳ̀ chhai Song-ti ke yok-khui thèu-chhièn phùn la̍p-pá.
[7] Ke-ngit, Thai-ví thi-yit pái chṳ́-phai Â-sat lâu kì ke Li-vi thùng-pâu fu-chit chhong-kô lòi chan-mî Song-chú.
[8] Ngì-têu oi kám-chhia Song-chú, khiù-ham Kì ke miàng; oi hiong van-koet chhòn-yòng Kì ke chok-vì!
[9] Ngì-têu oi chhong-kô lòi siung-chan Kì! Oi kóng-sot Kì khì-meu ke chok-vì!
[10] Ngì-têu oi yîn-vi Kì ke sṳn-miàng khoai-lo̍k! Ngien yit-chhiet chhìm-khiù Song-chú ke ngìn fôn-hí!
[11] Oi khiù Song-chú pông-chhu; oi sṳ̀-sòng kin-pai Kì.
[12] Song-ti ke phu̍k-ngìn Yî-set-lie̍t ke heu-thoi â, Ngâ-kok ke chṳ́-sûn, Kì só kién-sién ke chṳ́-mìn â, ngì-têu oi ki-tet Kì só-cho khì-meu ke chok-vì, Kì só-hàng ke sṳ̀n-chiak lâu só kóng-hí ke sṳ́m-phan.
[14] Kì he Song-chú — ngài-têu ke Song-ti; Kì ke sṳ́m-phan chhòn-phien chhiòn sṳ-kie.
[15] Ngì-têu oi yún-yén ki-ngiam Kì ke yok, Kì só-kóng ke yin-hí chhṳ̍t-to chhiên-thoi.
[16] Kì ki-tet thùng Â-pak-lâ-hón só-li̍p ke yok, hàn-yû Kì fat-sṳ su-pûn Yî-sat ke yin-hí.
[17] Song-chú thùng Ngâ-kok kiên-thin liá-yok cho thiàu-li, chhiu-he Kì pûn Yî-set-lie̍t yún-kiú ke khie-yok.
[18] Kì kóng: “Ngài oi chiông Kâ-nàm-thi su-pûn ngì, chhiòn-phu oi cho ngì-têu ke sán-ngia̍p.”
[19] Ke-sṳ̀, ngì-têu ngìn-tên yû-han, su-muk chhin-séu, chhai Kâ-nàm-thi chhiam-sṳ̀ he̍t.
[20] Kì-têu tui liá-chhu̍k phêu-liù to ke-chhu̍k, tui liá-koet liù-long to ke-koet.
[21] Chúng-he Song-ti put-chún ngoi-ngìn khî-fu kì-têu; vi-tó kì-têu, Kì kín-ko ngoi-chhu̍k ke-têu vòng.
[22] Kì kóng: “Cho-m̀-tet vì-nàn Ngài só kién-sién ke; ngì-têu cho-m̀-tet sông-hoi Ngài ke siên-tî!”
[23] Chhiòn sṳ-kie tû oi lòi kô-siung Song-chú! Oi tak-ngit chhòn-yòng Kì chṳ́n-kiu ke fuk-yîm!
[24] Oi tui van-koet siên-chhòn Kì ke yùng-kông! Oi tui van-mìn kóng-hí Kì ví-thai ke chok-vì!
[25] Song-chú he chui ví-thai ke, yin-tông su chui-thai ke chan-mî; Kì yin-tông pí só-yû ke sṳ̀n-mìn tet-tó kha-tô ke kin-vi.
[26] Lie̍t-koet só-yû ke sṳ̀n-mìn put-ko he ngiéu-siong; chúng-he chhóng-chho chû-thiên ke chhiu-he Song-chú.
[27] Yùng-kông, vî-ngiàm chhai Kì ke mien-chhièn; thai-nèn, hí-lo̍k chhûng-mân Kì ke sṳn-só.
[28] Thi-song ke van-chhu̍k â, yin-tông siung-chan Song-chú! Ngì-têu oi siung-chan Kì ke yùng-kông lâu thai-nèn!
[29] Oi siung-chan Song-chú yùng-kông ke miàng; oi tai chi-vu̍t lòi-to Kì mien-chhièn. Oi yung sṳn-kiet ke tá-pan lòi khúi-pai Song-chú;
[30] chhiòn-thi oi chhai Kì ke mien-chhièn pi̍t-pi̍t-chhat! Thai-thi kiên-ku, m̀-voi yèu-thung.
[31] Chû-thiên oi fôn-hí, thai-thi oi khoai-lo̍k! Oi hiong van-koet siên-pu: “Song-chú chóng-khièn!”
[32] Hói lâu khì-chûng ke sâng-vu̍t â, oi thai-sâng fôn-fû! Thièn-yèn lâu khì-chûng ke chhut-sán â, oi fôn-hí hí-lòi!
[33] Ke-sṳ̀, su-nà chûng ke su-muk oi chhai Song-chú mien-chhièn fôn-hí chhong-kô, yîn-vi Kì oi lòi chhṳ-lî thiên-ha.
[34] Oi kám-chhia Song-chú, yîn-vi Kì he chṳ-san; Kì ke chhṳ̀-oi yún-yén chhòng-chhùn!
[35] Oi hiong Kì kóng: “Song-ti ngài-têu ke kiu-chú â, khiù Ngì chṳ́n-kiu ngài-têu! Khiù Ngì chiông ngài-têu tui lie̍t-koet chhi-si̍p hí-lòi, sṳ́ ngài-têu yû-hó siung-chan Ngì ke sṳn-miàng, yung kám-chhia Ngì lòi cho ngài-têu ke yùng-kông.”
[36] Ngien Song-chú — Yî-set-lie̍t ke Song-ti su chhṳ̂n-siung, tui yún-yén to yún-yén! Chiap-tén ngìn-mìn thùng-sâng en-kóng: “Â-mén!” Kì-têu chhiòn-phu siung-chan Song-chú.
[37] Thai-ví-vòng phai Â-sat lâu kì ke thùng-pâu Li-vi-ngìn chhai yok-khui thèu-chhièn sṳ-fung Song-chú. Kì-têu oi ngit-ngit chhai ke-vi fu̍k-sṳ.
[38] Yâ-thu-tun ke lai-é Ngò-phe̍t-Yî-tûng lâu kì pún-chhu̍k yû liuk-sṳ̍p pat-ngìn pûn-ngìn phai-hi hia̍p-chhu kì-têu. Hò-sat lâu Ngò-phe̍t-Yî-tûng he chóng-mùn ke chhui-chóng.
[39] Chúng-he, chi-sṳ̂ Sat-tuk lâu khì-thâ ke chi-sṳ̂ chhai Kî-phiên ke sân-thèu, Song-chú ke sṳn-chong-phùng thèu-chhièn sṳ-fung Kì.
[40] Tak-ngit chó-am, kì-têu oi cheu Song-chú pûn Yî-set-lie̍t-ngìn ke fap-li̍t sû-song só-siá ke, chhai chi-thàn táng hien sêu-fa-chi.
[41] Lâu kì-têu khiung-ha ke yû Hî-man, Yâ-thu-tun lâu yû-têu khì-thâ ke ngìn; kì-têu thi̍t-phe̍t su-sién chhut-lòi, hiong Song-chú kô-chhong, siung-chan Kì ke chhṳ̀-oi yún-yén chhòng-chhùn.
[42] Hî-man lâu Yâ-thu-tun ya fu-chit la̍p-pá, chhê-é lâu khì-thâ ngo̍k-hi; liá-têu chhiòn-phu he chan-mî Song-ti ke ngo̍k-hi. Yâ-thu-tun ke chṳ́-sûn fu-chit chóng-mùn.
[43] Heu-lòi só-yû ke ngìn-mìn chhiòn-phu chón vuk-hâ hi; Thai-ví ya chón-hi vi chhiòn-kâ chuk-fuk.