[1] Yî-set-lie̍t só-yû ke ngìn chhiòn-phu to Hî-pak-lùn lòi kien Thai-ví, tui kì kóng: “Ngài-têu he ngì ke kut-ngiuk chṳ̂-chhîn.
[2] Yî-chhièn, chhai Só-lò hàn-cho vòng ke sṳ̀, ngì chhiu yí-kîn tai-liâng Yî-set-lie̍t ngìn-mìn chhut-ngi̍p chan-chhòng. Song-chú — ngì ke Song-ti sṳt yin-hí ngì kóng: ‘Ngì oi cho mu̍k-ngìn liâng-thô Ngài ke chṳ́-mìn Yî-set-lie̍t, cho kì-têu ke thúng-chhṳ-chá.’ ”
[3] Só-yû Yî-set-lie̍t ke chóng-ló chhiòn-phu to Hî-pak-lùn kien Thai-ví-vòng. Thai-ví chhai Song-chú mien-chhièn lâu kì-têu li̍p-yok, kì-têu chhiu kò-yù sat-li̍p kì cho Yî-set-lie̍t ke vòng, chhiu-chhiong Song-chú thûng-ko Sat-mû-ngí só yin-hí ke.
[4] Thai-ví-vòng lâu só-yû ke Yî-set-lie̍t-ngìn hi kûng-tá Yâ-lu-sat-lâng (ke-sṳ̀ ôn-to Yâ-pu-sṳ̂), ke-thi ke ngìn-mìn Yâ-pu-sṳ̂-ngìn hàn he̍t chhai ke-vi.
[5] Yâ-pu-sṳ̂-ngìn kóng Thai-ví yún-yén mò fap-thu ngi̍p-sàng, chúng-he Thai-ví hàn-he cham-liâng kì-têu ke Siak-ôn sàng-pó, tui án-ngiòng liá só-chhai chhiu ôn-to Thai-ví-sàng.
[6] Thai-ví kóng: “Má-ngìn siên chhṳ̀-sí Yâ-pu-sṳ̂-ngìn, chhiu oi cho kiûn-chhui ke ngièn-soi!” Sé-lu-ngâ ke lai-é Yok-ap chui-siên kûng sông-hi, só-yî kì chhiu cho ngièn-soi.
[7] Thai-ví he̍t chhai sàng-pó, só-yî liá sàng-pó chhiu ôn-to Thai-ví-sàng.
[8] Thai-ví chhùng-kien liá-sàng ke chhiòng, tui sân tûng-phién thùn-phiàng ke thòi-thi khôi-sṳ́ cháng, Yok-ap cháng sàng ke khì-thâ phu-fun.
[9] Thai-ví ke vòng-koet yit-ngit pí yit-ngit hîn-vong, yîn-vi Song-chú — Van-kiûn ke Ngièn-soi lâu kì khiung-ha.
[10] Hâ-poi he Thai-ví sú-hâ yû-miàng yúng-sṳ ke miàng-tân. Kì-têu lâu khì-thâ ke Yî-set-lie̍t-ngìn kò-yù li̍p Thai-ví cho vòng, chhiu-chhiong Song-chú só yin-hí ke; pông-chhu Thai-ví kiên-ku vòng-koet ke ya he kì-têu.
[11] Thi-yit ke he Ha̍p-kiet-mô-nì chûng-chhu̍k ke Ngâ-sok-pân. Kì he “Sâm Yúng-sṳ” ke liâng-chhiu. Kì sṳt chhai yit-pái chan-chên chûng yung chhiông chhiuk-sí sâm-pak ngìn.
[12] “Sâm Yúng-sṳ” ke thi-ngi ke he Â-ha̍p chhu̍k-ngìn Tó-tô ke lai-é Yî-li-â-sat.
[13] Chhai Pâ-sṳ̂-Tha̍t-mén chan-chên chûng, kì lâu Thai-ví khiung-ha tí-khong Fî-li-sṳ-ngìn. Yî-set-lie̍t-ngìn thò-chéu ke sṳ̀, kì tú-hó chhai yit-te thai ma̍k-thièn tú,
[14] tai-liâng phu-ha pó-fu ke-te thièn, chhṳ̀-thet tông-tô Fî-li-sṳ-ngìn. Song-chú sṳ́ kì thai-thai sṳn-li.
[15] Yit-chhui Fî-li-sṳ-ngìn ôn-yàng chhai Li-fa̍t-yîm sân-lak tú ke sṳ̀, yû yit-ngit, “Sâm-sṳ̍p Yúng-sṳ” tông-chûng yû sâm-sà hâ-to Â-thu-làn sân-lùng fu-khiun ke phàn-sa̍k ke-vi hi kien Thai-ví.
[16] Ke-sṳ̀, Thai-ví chhai yit-ke yû fòng-ví ke sân-thèu; yit-khiùn Fî-li-sṳ-ngìn cham-liâng Pak-li-hèn.
[17] Thai-ví sióng-ngiam kâ-hiông, chhiu kóng: “Ngài tông sióng-oi lîm Pak-li-hèn sàng-mùn sùn ke chiáng-súi â!”
[18] Ke sâm-ke yúng-sṳ chhiu chhong-tén ko Fî-li-sṳ-ngìn ke yàng-thi, to Pak-li-hèn sàng-mùn sùn ke chiáng tá-súi, tai chón-lòi pûn Thai-ví. Chúng-he Thai-ví m̀-hén lîm, fán-chón chiông súi tó chhut-lòi hien-pûn Song-chú.
[19] Kì kóng: “Song-ti â, ngài ngióng-pân cho-tet lîm liá-súi! Liá chhiu-he lîm mo sâng-miang ngùi-hiám hi tá-súi ke yúng-sṳ ke hiet!” Só-yî Thai-ví m̀-lîm. Liá chhiu-he ke sâm-ke yúng-sṳ yúng-kám ke hàng-vì.
[20] Yok-ap ke ló-thâi Â-pí-chhî he “Sâm-sṳ̍p Yúng-sṳ” ke liâng-chhiu. Kì sṳt yung chhiông chhiuk-sí sâm-pak ngìn, só-yî lâu “Sâm Yúng-sṳ” khiung-yong chhut-miàng.
[21] Kì he “Sâm-sṳ̍p Yúng-sṳ” tông-chûng chui khiet-chhut ke yit-ke, sàng-cho kì-têu ke liâng-chhiu, chúng-he pí m̀-tet “Sâm Yúng-sṳ” ke miàng-sâng.
[22] Kap-siet-ngìn Yâ-hò-yâ-thai ke lai-é Pí-nâ-ngâ he nang-ngoi yit-ke chhut-miàng ke yúng-sṳ. Kì yû tông-tô yúng-kám ke hàng-vì, pâu-hàm chhṳ̀-sí lióng-ke khiòng-chong ke Mô-ap chan-sṳ. Yû yit-pái lo̍k-siet thiên, kì hâ-to thai-fut tú, tá-sí yit-chak sṳ̂-é.
[23] Kì yu chhṳ̀-sí yit-ke khiòng-chong ke Âi-khi̍p-ngìn; ke-ngìn lióng-pak làng kûng-fûn kô, sú-hong nâ-tén chhòng chhiông, chhiông-piang chhiong chṳt-pu-kî ke chhâ-sîm án-chhû. Pí-nâ-ngâ chṳ́-yû nâ-tén yit-kî kun-é lâu kì piang, chiông kì sú-hong ke chhiông chhióng ko-lòi, yung ke chhiông chiông kì chhṳ̀-sí.
[24] Liá he Yâ-hò-yâ-thai ke lai-é Pí-nâ-ngâ yúng-kám ke hàng-vì; kì lâu “Sâm Yúng-sṳ” ya chhin chhut-miàng.
[25] Kì chhai “Sâm-sṳ̍p Yúng-sṳ” tông-chûng chui su-ngìn chûn-chhung, chúng-he lâu “Sâm Yúng-sṳ” ke miàng-sâng hàn-he pí m̀-tet. Thai-ví phai kì cho sṳ-ví-chóng.
[26] Yî-ha he khì-thâ ke yúng-sṳ: Yok-ap ke ló-thâi Â-sat-het, Pak-li-hèn-ngìn Tó-tô ke lai-é Yî-le̍t-ha̍p-nàn, Ha̍p-li̍t-ngìn Sâ-mâ, Pí-lùn-ngìn Hî-li-sṳ̂, Thì-kô-â-ngìn Yit-kit ke lai-é Yî-lâ, Â-nâ-thut-ngìn Â-pí-yî-chhia, Fu-sâ-ngìn Sî-pí-kâi, Â-ha̍p-ngìn Yî-lòi, Nì-thò-fap-ngìn Mâ-ha̍p-lòi, Nì-thò-fap-ngìn Pâ-nâ ke lai-é Hî-li̍p, Phien-ngâ-mén-chhu̍k, Kî-pí-â-ngìn Li-pai ke lai-é Yî-thai, Pí-lâ-tun-ngìn Pí-nâ-ngâ, Kâ-sṳ̍t-kuk-ngìn Fu-lòi, Â-lâ-pâ-ngìn Â-pí, Pâ-lû-mí-ngìn Ap-sṳ̂-mâ-fut, Sâ-pún-ngìn Yî-li-ngâ-ha̍p-pâ, Kî-sûn-ngìn Ha̍p-chhṳ̂m, Ha̍p-lâ-ngìn Sâ-kî ke lai-é Yok-nâ-tân, Ha̍p-lâ-ngìn Sâ-kap ke lai-é Â-hî-am, Ǹg-ngí ke lai-é Yî-li-fap-le̍t, Mí-kî-lâ-ngìn Hî-fut, Pí-lùn-ngìn Â-hî-ngâ, Kâ-me̍t-ngìn Hî-sṳ̂-lò, Yî-sṳ̂-pai ke lai-é Nâ-lòi, Nâ-tân ke hiûng-thi Yok-ngí, Ha̍p-kî-li ke lai-é Mì-pak-ha̍p, Â-mùn-ngìn Sé-le̍t, Pí-liu̍k-ngìn Nâ-ha̍p-lòi (kì he thoi Sé-lu-ngâ ke lai-é Yok-ap nâ vú-hi ke ngìn), Yî-thiap-ngìn Yî-lâ, Yî-thiap-ngìn Kâ-li̍p, Het-ngìn Vû-li-â, Â-lòi ke lai-é Sat-pha̍t, Sṳ-sat ke lai-é Â-thi-nâ (kì he Lî-phien kî-chhu̍k chûng yit-ke chhu̍k-chóng, kì tai-liâng sâm-sṳ̍p ke chan-sṳ), Mâ-kâ ke lai-é Ha̍p-nàn, Mì-thi̍t-nì-ngìn Yok-sâ-fap, Â-sṳ̂-thâ-lâ-ngìn Vû-sî-â, Â-lò-ngí-ngìn Hò-thán ke lai-é Sâ-mâ lâu Yâ-li, Thì-sé-ngìn Sṳ̂n-li ke lai-é Yâ-thia̍p lâu Yok-ha̍p, Mâ-ha̍p-vi-ngìn Yî-li-ngia̍p, Yî-li-nâ-ôn ke lai-é Yâ-li-pai lâu Yok-sâ-vi-ngâ, Mô-ap-ngìn Yî-thi̍t-mâ, Yî-li-ngia̍p, Ngò-phi-tet, lâu Só-pâ-ngìn Ngâ-sî-ngia̍p.