[1] Thai-ngì-vòng Hî-làn phai sṳ́-chá to Thai-ví ke-vi hi, tai-tén hiông-pak-su, tá-sa̍k sṳ̂-fu lâu muk-siong, oi thoi kì hí vòng-kiûng.
[2] Thai-ví chhiu tî Song-chú sat-li̍p kì cho Yî-set-lie̍t-vòng ke sṳ yí-kîn vàn-sṳ̀n lé, ya tî Song-chú he yîn-vi chhṳ-kâ ke chṳ́-mìn sṳ́ kì ke vòng-koet hîn-vong.
[3] Thai-ví chhai Yâ-lu-sat-lâng yu thó chhin-tô se-chiá, kiung chhin-tô chṳ́-ńg;
[4] Chhai Yâ-lu-sat-lâng kiung ke yû: Sâ-mû-â, Sok-pa, Nâ-tân, Só-lò-mùn,
[5] Yit-hot, Yî-li-sû-â, Yî-fap-lie̍t,
[6] Nò-kâ, Nì-fî, Ngâ-fî-â,
[7] Yî-li-sâ-mâ, Pí-li-ngâ-thai, Yî-li-fap-lie̍t.
[8] Fî-li-sṳ-ngìn thâng-tó Thai-ví yí-kîn pûn-ngìn kò-yù li̍p-cho chhiòn Yî-set-lie̍t ke vòng, chhiu phai thai kiûn-chhui lòi chhìm Thai-ví. Thai-ví yit thâng-kóng, chhiu tai-pîn hi chhut-chan.
[9] Fî-li-sṳ-ngìn lòi-to Li-fa̍t-yîm sân-lak, kûng-ngi̍p ke thi-fông.
[10] Thai-ví khiù-mun Song-ti: “Ngài yin-kôi hi kûng-tá Fî-li-sṳ-ngìn mò? Ngì voi sṳ́ ngài tá-yàng mò?” Song-chú en-kóng: “Hi! Ngài voi chiông kì-têu kâu chhai ngì sú-chûng.”
[11] Só-yî, Thai-ví sông Pâ-li̍t-Pí-lâ-sîm hi, chhai ke-vi tá-yàng Fî-li-sṳ-ngìn. Thai-ví kóng: “Song-ti yung ngài chhûng-san ngài ke sù-thi̍t, chhiong thai-súi chhûng-fái sa̍k-pok.” Só-yî ke thi-fông ham-cho Pâ-li̍t-Pí-lâ-sîm.
[12] Fî-li-sṳ-ngìn thò-miang ke sṳ̀ chiông kì-têu ke sṳ̀n-siong fit chhai ke-vi, Thai-ví min-lin ngìn chiông ke-têu sṳ̀n-siong sêu-thet.
[13] Mò kí-kiú, Fî-li-sṳ-ngìn yu to-chón-lòi kûng-ngi̍p Li-fa̍t-yîm sân-lak.
[14] Thai-ví yu khiù-mun Song-ti; Song-ti kóng: “M̀-hó tui liá-vi kûng-tá kì-têu, oi tîn-to kì-têu heu-poi, tui sông-é-su su-nà ke-phién lòi kûng-tá.
[15] Ngì yit thâng-tó sông-é su-mî táng yû kiok-phu sâng, chhiu kiak-kiak chin-kûng, yîn-vi Ngài — Song-ti yí-kîn hàng-to ngì thèu-chhièn hi kûng-tá Fî-li-sṳ-ngìn ke kiûn-chhui.”
[16] Thai-ví chhiu cheu Song-ti ke min-lin hi cho. Kiet-kó, kì chiông Fî-li-sṳ-ngìn tá-thui, tui Kî-phiên kiuk-to Kî-set.
[17] Só-yî Thai-ví ke miàng-sâng chhòn-to yén-yén; Song-chú sṳ́ tak-koet chhiòn-phu kiâng kì.