[1] Npogotigi min bɔra Sulam, i ka kɔsegin ka na, i ka kɔsegin ka na. I ka kɔsegin ka na, i ka kɔsegin ka na walisa an ka i mafilɛ. Npogotigi min bɔra Sulam, aw bɛ mun ye o la? I ko mɔgɔkulu fila dɔn kɛtɔ.
[2] E faama denmuso, i sen sabarama cɛ ka ɲi haali, i tɔgɔkun koolilen bɛ i ko masiri fɛn minw dilara sanu faga numu maɲɛrɛ dɔnbaa fɛ.
[3] I disi bɛ i ko filen koolilen, diwɛn kolonsolen ma dɛsɛ min kɔnɔ. I farikolo bɛ i ko alikama ton min koolilen bɛ ni baga feere ye.
[4] I sin fila bɛ i ko mankalanden fila, mankalanmuso ka filaninw.
[5] I kankala bɛ i ko sankanso jan min jɔlen bɛ ni sama ɲin ye. I ɲɛw bɛ i ko Hesibɔn dingɛ jimaw Bat-Rabi donda kɛrɛ fɛ. I nunkala bɛ i ko Liban kulu kunna so jan min sinnen bɛ Damasi ma.
[6] I kunkolo bɛ i ko Karmɛl kulu sigi cogo. I kunsigi bɛ i ko lomaasa gese, masakɛ ferekelen bɛ min ɲuguɲugulen na.
[7] I cɛ ka ɲi haali, i ko ka di ne ye. Ne muso mandi, i ye diyaɲe fɛnba de ye.
[8] I jɔ janya bɛ i ko ntamaro sun, i sinw bɛ i ko ntamaro tusuuw.
[9] Ne ko ne na yɛlɛn ntamaro sun na ka a bolow minɛ. I sinw ka kɛ i ko rezɛn tusuuw, i dafiɲɛ suma ka kɛ i ko pome mɔ suma.
[10] I da ka kɛ i ko diwɛn ɲuman. Diwɛn kunun ka di ne ka kanulen ngɔnɔ la, a bɛ shɔɔlɔ sunɔgɔbaatɔw kɔnɔ.
[11] Ne ka kanulen ta ye ne ye, ne ko b'a la.
[12] Na, ne ka kanulen, na an ka taa kungo la ka si buguw kɔnɔ.
[13] An ka soli ka taa rezɛn nakɔtuw la, k'a filɛ yala ni rezɛn sun ye nugukunw bɔ, ni a feerela, ni gerenati sunw feerela. Ne na ne ka kanuya di i ma yen.
[14] Mandragore mɔ suma duman bɛ bɔ. Jiriden fisama sifaw bɛɛ bɛ an ka so daw la. Jiriden kuraw ni kɔrɔlenw, ne ye u mara i ye, ne ka kanulen.