[1] Ka ne to ne ka dalan kan su fɛ, ne ye ne dusukun ka kanulen ɲini. Ne y'a ɲini, nka ne m'a ye.
[2] Ne na wuli sisan ka taa dugu yaala, ka dugu bɔlɔnw ni a fɛrɛkɛnɛw filɛ. Ne na ne dusukun ka kanulen ɲini. Ne y'a ɲini, nka ne m'a ye.
[3] Kɔlɔsilikɛla minw bɛ dugu yaala, olu ye ne ye. Ne ye olu ɲininka ko: «Aw ma ne dusukun ka kanulen ye wa?»
[4] Ne tɛmɛnna olu kan dɔɔnin, ne ye ne dusukun ka kanulen ye. Ne y'a minɛ, ne ma sɔn ka a bila, sani ne ka taa n'a ye ne ba ka so kɔnɔ, ne bangeba ka so ɲɛ kɔnɔ la.
[5] Jerusalɛm musow, ne bɛ aw deli kungo minanw ani mankalanw kosɔn, ko aw kana o kanulen lawuli, aw kana a lakunun fo a ka diya a ye.
[6] Nin min natɔ don ka bɔ kungokolon kɔnɔ, jɔni don? A bɛ i ko sisi juruw, mirɛ ni barakanten suma duman suma b'a la, ani jagokɛla ka fɛn suma dumanw bɛɛ.
[7] A filɛ, o ye Solomani ka mɔgɔ ta jɔ ye. Cɛ farin biwɔɔrɔ b'a lamini, Israɛl ka cɛ farin dɔw don.
[8] U bɛɛ ye npantigiw ye, u bɛ kɛlɛ kɛ cogo dɔn. U bɛɛ kelen-kelen ka npan bɛ u tɔgɔkun na, su fɛ siran kow kosɔn.
[9] Masakɛ Solomani ye mɔgɔ ta jɔ dila a yɛrɛ ye ni Liban jiri ye.
[10] A ye warijɛ berew don a selekew la ka a sɛmɛ yɔrɔ dila ni sanu ye ka a sigilan dila ni lomaasa fini ye. Kanuya de y'a to Jerusalɛm musow ye a kɔnɔnan masiri.
[11] Jerusalɛm musow, aw ka bɔ ka taa masakɛ Solomani filɛ. A ka masafugula bɛ a kun na, a ba y'a don a kun na, a ka furu don na, a nisɔndiya don na.