[1] Ne ye Saron narsise feere ye jɛ la baga feere.
[2] Baga feere bɛ nwɔni cɛma cogo min na, ne muso mandi bɛ npogotigiw cɛma ten.
[3] Pome sun bɛ tu la jiriw cɛma cogo min na, ne ka kanulen bɛ kamalenw cɛma ten. A diyara ne ye kosɛbɛ haali ka sigi a suma kɔrɔ i ko jiri. A mɔ ka di ne da la.
[4] A taara ni ne ye dumuni kɛ bonba kɔnɔ, kanuya kɛra a ka darapo ye ne san fɛ.
[5] Aw ka barika don ne la ni rezɛn mɔnen ye, ka ne lahinɛ ni pome mɔ ye, katuguni kanuya ye ne bana.
[6] Ne kunkolo ka da a numanbolo kan, a kininbolo ka meleke ne la.
[7] Jerusalɛm musow, ne bɛ aw deli, kungo minanw ni mankalanw kosɔn, ko aw kana o kanulen lawuli, aw kana a lakunun, fo a ka diya a ye.
[8] A filɛ, ne ka kanulen kan don, a natɔ filɛ, a bɛ panpan kuluw kan, a bɛ boli tintinw kan.
[9] Ne ka kanulen bɛ i ko minan wala sɔnden. A jɔlen filɛ an ka kogo kɔ fɛ. A bɛ so kɔnɔna filɛ finɛtiri fɛ, a bɛ filɛli kɛ finɛtiri la nɛgɛ bɔlɔanabililenw fɛ.
[10] Ne ka kanulen kumana ne fɛ k'a fɔ ne ye ko: «I ka wuli, ne muso mandi cɛɲi, i ka na,
[11] katuguni a filɛ, sanji tigɛra, fonɛnɛ tɛmɛnna.
[12] Fɛn feere bɔra dugukolo kan, dɔnkili da tuma sera, ntubani kasikan bɛ mɛn an ka jamana kɔnɔ.
[13] Toroden bɛ mɔ, rezɛn sun feerela, a suma ka di. I ka wuli, ne muso mandi cɛɲi, i ka na.»
[14] E, ne ka ntubani min bɛ fara cilenw furancɛ la kulu jiginjigin da la farawo la, a to ne ka i filɛ, a to ne ka i kan mɛn. I kan ka di, i cɛ ka ɲi.
[15] Aw ka kungo wuluw minɛ an ye, kungo wulu misɛn minw bɛ rezɛn sunw tiɲɛn, katuguni an ka rezɛn sunw feerela.
[16] Ne ka kanulen ye ne ta ye, ne ye ale ta ye. A bɛ a ka sagaw gɛn baga feerew cɛma.
[17] Sani tile ka suma, sani tile fɛ jaw ka ban, i ka kɔsegin ne ka kanulen, ka kɛ i ko minan wala sɔnden Betɛr kuluw kan.