[1] E, i cɛ ka ɲi, ne muso mandi, i cɛ ka ɲi dɛ. I ɲɛw bɛ i ko ntubaniw, i kunna biri fini kɔrɔ. I kunsigi bɛ i ko bakulu minw dalen bɛ Galad kulu kɛrɛ fɛ.
[2] I dala ɲinw bɛ i ko sagamusokulu minw si kannen yɛlɛntɔ don ka bɔ koli yɔrɔ la. Filaninw bɛ u bɛɛ kelen-kelen fɛ, u si ma bɔnɛ u denw la.
[3] I dawolo bɛ i ko gaari bilenman, i dawolo cɛ ka ɲi. I taman bɛ i ko gerenatiden walo kuru kelen i kunna biri fini kɔrɔ.
[4] I kankala bɛ i ko Dawuda ka sankanso jan, a y'a jɔ ka kɛ kɛlɛkɛ minan bila yɔrɔ ye. Nɛgɛ bɛnnan misɛnman waa kelen dulonnen bɛ a kɔnɔ, u bɛɛ ye cɛ farinmaw ka nɛgɛ bɛnnanw ye.
[5] I sin fila bɛ i ko mankalandenw, mankalanmuso ka filanin minw bɛ dumuni kɛ baga feerewɛma.
[6] Sani tile ka suma, sani tile fɛ jaw ka ban, ne na taa mirɛ kulu kan, ani barakanten suma duman tintin kan.
[7] I cɛ ka ɲi kosɛbɛ, ne muso mandi, fiɲɛ tɛ i yɔrɔ si la.
[8] Na, ne ka kɔɲɔmuso, an ka bɔ Liban ka taa ɲɔgɔn fɛ, an ka bɔ Liban ɲɔgɔn fɛ. Ka i to Amana kulu kan ani Senir ni Hermɔn kan, ka i to waraba wow da la, ani waraninkalanw kuluw kan, i ka filɛli kɛ.
[9] I ye ne dusukun minɛ, ne balimamuso, ne kɔɲɔmuso, i ka filɛli ko kelen ye ne dusukun minɛ, ani i ka kan na masiri fɛn kelen fana.
[10] Ne balimamuso, ne ka kɔɲɔmuso, i ka kanuya ka di haali, i ka kanuya ka di ni diwɛn ye. I ka tulu suma ka di ni suma diyalanw bɛɛ ta ye.
[11] Ne ka kɔɲɔmuso, i dawolo bɛ i ko a bɛ di nɔɔnɔ toni, a bɛ i ko di ni nɔnɔ bɛ i nɛnkun jukɔrɔ. I ka finiw suma ka di i ko Liban kulu suma.
[12] Ne balimamuso, ne ka kɔɲɔmuso, i bɛ i ko nakɔ datugulen, i bɛ i ko ji boyi da gerenlen, i ko kɔlɔn datugulen ni taamashyɛn ye.
[13] I mɔɔnɔbɔra i ko jiri, ka kɛ gerenati nakɔtu ye. Den ɲuman ɲuman b'a la, ani jabi ni nar sunw
[14] ani nar ni safran ni kala suma duman ni sinamome ani jirisun minw bɛɛ bɛ kɛ suma diyalan ye, barakanten ni mirɛ ani aloɛs ani suma diyalanw bɛɛ la fisamaw.
[15] I bɛ i ko nakɔ la kɔlɔn, ji boyi ɲɛnama ani ji woyotɔ ka bɔ Liban kulu la.
[16] Saheli yanfan fɛ fiɲɛ, i ka wuli. Worodugu yanfan fɛ fiɲɛ, i ka na. Aw ka ne ka nakɔ fyɛ, walisa suma duman ka bɔ a la. Ne ka kanulen ka don a ka nakɔ kɔnɔ ka a ka nakɔ jiriden fisamaw dumu.