[1] Bɔnɛ bɛ ne ye, sabu ne kɛra i ko rezɛn mɔ karila min bɛ taa rezɛn sun na, a tɛ mɔ si sɔrɔ a la. Hali rezɛn mɔ kelen ma to rezɛn sun na, toro mɔ fɔlɔ min nege bɛ ne la, o fana tɛ yen.
[2] Mɔgɔ tilennen banna dugukolo kan. Ala ɲɛsiranbaa si tɛ Hadamadenw cɛma. Mɔgɔw bɛe bɛ u merun ɲɔgɔn ɲɛ ka ɲɔgɔn faga. U bɛe bɛ jan da u balimaw ɲɛ.
[3] U bɛe bɛ ko jugu kɛ ni u bolo fila ye. Kuntigi bɛ surɔ fɛn minɛ, kiritigɛla bɛ daguli fɛn minɛ. Mɔgɔ tɔgɔba bɛ a sagona kow fɔ, u bɛ jɛ ka ko jugu kɛ.
[4] U la mɔgɔ ɲuman ɲuman bɛ i ko nwɔni, u la mɔgɔ sɛbɛ bɛ i ko sinsan nwɔnima. Aw ka kɔlɔsilikɛlaw ye tɔorɔ don min ko fɔ, aw sara don kɔni, o sera. O de kosɔn aw hakili na ɲaami.
[5] Aw kana aw jigi da aw sigiɲɔgɔnw kan. Aw kana aw bolo kuru aw teri sɛbɛ la. I kana foyi fɔ i yɛrɛ muso ye.
[6] K'a masɔrɔ denkɛ na a fa dɔgɔya, denmuso na muruti a ba ma. Denkɛ muso na muruti a biranmuso kama. Mɔgɔw bɛe kelen-kelen so mɔgɔw na kɛ u juguw ye.
[7] Nka ne kɔni, ne na ne ɲɛ sin Matigi ma. Ne na ne Kisibaa Ala makɔnɔ. Ne ka Ala na ne jaabi.
[8] Ne jugu, i kana ɲagali ne kosɔn. Ni ne bira, ne na wuli tun. Ni ne sigilen bɛ dibi la, Matigi na kɛ ne ka kɛnɛ ye.
[9] Ne na Matigi ka dimiya muɲu fo a ka ne lafasa ka jo di ne ma tuma min na, sabu ne ye ko jugu kɛ ka ale hakɛ ta. O tuma la a na ne ladon kɛnɛyeelen na ka a ka tilennenya jira ne la.
[10] Ne jugu minw ye ne ɲininka ko: «Matigi, i ka Ala bɛ min?» olu na ne kisilen ye ka maloya ka u kun suuli, k'a masɔrɔ olu na foroki sen kɔrɔ i ko dugu bɔlɔn na bɔgɔ.
[11] Don bɛ na, aw ka masadugu lamini kogow na jɔ ko kura. O don na, aw dancɛw na bonya.
[12] O don na, ka bɔ Asiri fo ka taa se Misira jamana duguw ma, ka bɔ Misira fo ka taa se Ufrate ba da la, ka bɔ kɔgɔji la fo ka taa se kuluw ma, o mɔgɔw bɛe na taa i sɛgɛrɛ.
[13] Nka dugukolo na lankolonya a kan sigibaaw kosɔn. O na kɛ u ka kɛwalew sara ye.
[14] Matigi, i ka mɔgɔ minw ye i ciyɛn ye, olu minw sigilen bɛ u dan na Karmɛl kulu kan, i ka olu ɲɛ minɛ ni saga gɛn bere ye. U ka dumuni kɛ Basan jamana kɔnɔ ani Galad i ko a kɛra cogo min na ka kɔrɔ.
[15] Ɔwɔ, ne na kabakow jira ne ka mɔgɔw la i ko min kɛra u bɔ tuma la Misira jamana la.
[16] Siyaw na olu ye ka maloya, hali ni u fanga ka bon. U na u bolow da u da la, u tulow na geren.
[17] U na buguri lanɔn i ko sa. U ja tigɛlen na bɔ u sigi yɔrɔ la i ko fɛn fofotaw. U ja tigɛlen na boli ka taa Matigi, an ka Ala yɔrɔ la. An ka Ala, u na siran i ɲɛ.
[18] Ala wɛrɛ jumɛn bɛ tilenbaliya kow yafa ka ɲinɛ a ka mɔgɔw tɔ tolenw ka jurumu kɔ, i ko e? Matigi diminnen tɛna to badaa k'a masɔrɔ makari ka di a ye haali.
[19] A na makari an na ko kura ka an ka tilenbaliyaw bila a sen kɔrɔ. Ɔwɔ, i na u ka jurumuw bɛe fili kɔgɔji dun na.
[20] I ka i ka kantigiya jira Yakuba la ka i ka makari jira Ibrahima la, i tun ye o min layidu ta an bɛnbaw ye waati tɛmɛnnenw na.