[1] Matigi ye min fɔ, aw ka o lamɛn. A ko: «Wuli ka kiri ko fɔ kuluw ye, tintinw ka i kan lamɛn.
[2] Kuluw ani aw dugukolo jusigilan lamagabaliw, aw fana ka Matigi ka kuma lamɛn, k'a masɔrɔ Matigi na wuli a ka siya Israɛl kama ka kiri tigɛ a ka mɔgɔw kan.
[3] Ne ka mɔgɔw, ne ye mun kɛ aw la? Ne kɛra aw ka tɔorɔ jumɛn sababu ye? A' ye ne jaabi.
[4] Ne ye aw labɔ Misira jamana kɔnɔ ka aw tila ka bɔ jɔnya so kɔnɔ. Ne ye Musa ni Aron ni Mariyama ci ka aw ɲɛ minɛ.
[5] Ne ka mɔgɔw, Moab bɔnsɔn ka masakɛ Balak ye min kɛ aw la, ani Beor denkɛ Balam y'a jaabi cogo min na, a' ye aw hakili jigin o la. Ne bɔra ni aw ye Sitim fo ka taa se Gilgal. Aw ye Matigi ka kɛwale tilennenw dɔn.»
[6] Ne na taa ne jɔ Matigi ɲɛ kɔrɔ, ka ne biri Ala Kɔrɔtalenba kɔrɔ ni mun ye? Yala ne na taa a ɲɛ kɔrɔ ni saraka jenitaw ani san kelen misidenw ye wa?
[7] Sagajigi waa caman ni tulu dama dɔnbali min bɛ i ko kɔji, o na diya Matigi ye wa? Ne na ne den fɔlɔ di ka ne farikolo den di ka ne ni ka jurumu kafari wa?
[8] A fɔra e Hadamaden ye ko min ka ɲi, ko Matigi bɛ min ɲini i fɛ, o filɛ nin ye, ko i ka tilennenya ni ɲumaya kow kɛ, ani ka yɛrɛ majiginleɲa sira taama i ka Ala fɛ.
[9] Matigi kumakan sera dugu ma. Hakilitigi ka siran i tɔgɔ ɲɛ. Aw ka Matigi ka kɔrɔfɔli ni a ka tɔorɔ kow lamɛn. Aw ka kololi bere ni bere cibaa ka kuma lamɛn.
[10] Juguya nafolo ani mure nanbarama dɔ tora mɔgɔ jugu ka so kɔnɔ wa?
[11] Mɔgɔ bɛ se ka kɛ jalakibali ye ka sumanikɛ ja ni kilo nanbarama to i ka bɔrɛ kɔnɔ wa?
[12] K'a masɔrɔ o dugu kɔnɔ nafolotigiw ka farin kosɛbɛ. A kɔnɔ mɔgɔw tugulen bɛ nkalon nɔ fɛ ka dama tɛmɛn. U nɛnkun bɛ mɔgɔw lafili.
[13] O de kosɔn, ne wuli waati sera aw kama ka aw faga. Ne na aw halaki aw ka jurumuw kosɔn.
[14] Aw na dumuni kɛ, nka aw tɛna fa, kɔngɔba na daga aw da la. Aw na aw ka fɛnw bila u mara yɔrɔ la, nka u maralen tɛna to. Aw ye fɛn minw mara, ne na olu di npantigi ma.
[15] Aw na danni kɛ, nka aw tɛna suman tigɛ fewu. Aw na olive tulu bɔ, nka aw tɛna tulu sɔrɔ ka aw mun. Aw na rezɛn mɔ foroki, nka aw tɛna o ji min.
[16] Sabu aw tugura Omri denkɛ Akab ka siraw la, aw bɛ o ka siraw taama. O de kosɔn ne na dusu kasi bila aw la ka aw ka dugu kɔnɔ mɔgɔw kɛ dala file fyɛ fɛn ye. Maloya ko minw na ne ka mɔgɔw sɔrɔ, aw na olu doni ta.