[1] Kiraya kuma min fɔra Ninivɛ dugu ko la, Nahum min bɔra Elkos, o ye yeli fɛn min ye, o kitabu don.
[2] Keleya bɛ Matigi Ala la. Ɔwɔ, Matigi Ala bɛ a mɔnɛbɔ ni dimiyaba ye. Matigi bɛ a mɔnɛbɔ a la ɲinibaaw la, a bɛ tɔorɔba mara a juguw ye.
[3] Matigi tɛ dimin joona, a ka sebaaya ka bon, nka a tɛna jalakitigi sarabali to. Matigi bɛ taama fununfunun ni fiɲɛba cɛma, sankabaw ye a sen kɔrɔ buguri ye.
[4] A bɛ kɔgɔji kɔrɔfɔ, o bɛ ja. A bɛ bajiw bɛe ja. Ala bɛ Basan jamana ni Karmɛl kulu kɛ yɔrɔ jalen jintan ye, Liban jiri feerew bɛ fɔsɔnfɔsɔn.
[5] Kuluw bɛ yɛrɛyɛrɛ a ɲɛ kɔrɔ, tintinw bɛ yeele i ko tulu. Dugukolo ni diɲɛ ni a kɔnɔ fɛnw bɛe bɛ yɛrɛyɛrɛ ale kelenpe ɲɛ.
[6] Jɔni bɛ se ka jɔ a dusu bɔlenba ɲɛ? Jɔn jɔlen bɛ se ka to ka a ka dimiyaba muɲu? A ka dimiya bɛ jɛnsɛn ka taa i ko tasuma, farakurunw bɛ ci a ɲɛ.
[7] Matigi ka ɲi, ale ye dogo yɔrɔ ye degun don na. Minw bɛ u yɛrɛw kalifa a ma, a bɛ olu dɔn.
[8] A na nin duguba halaki k'a ban, i ko baji woyo bɛ halakili kɛ cogo min na. A na a juguw nɔgɛn fo ka taa u bila dibiba la.
[9] Aw dun bɛ se ka dabali jumɛn labɛn Matigi kama? A na aw halaki ka aw ban, aw tɛna wuli a kama siɲɛ fila.
[10] Aw ferekelen bɛ i ko nwɔni, aw hakili ɲaaminen bɛ i ko dɔlɔtɔ, aw na jeni ka ban i ko bin ɲaga.
[11] E kɔni, Ninivɛ, mɔgɔ dɔ bɔra i kɔnɔ ka ko jugu miiri Matigi kama ka dabali jugu labɛn.
[12] Matigi y'a fɔ Juda ye ko: «Hali ni Asirikaw barika ka bon, u ka ca, u na halaki ka u tunun ka u ban. Ne ye aw majigin, nka ne tɛna aw majigin tun.
[13] Sisan ne na a ka zu kari ka bɔ i kan na ka i sirilanw tigɛ.»
[14] E kɔni, Ninivɛ duguba, Matigi bɛ min fɔ, o filɛ nin ye ko: «Bɔnsɔn si tɛna to i kɔ min na i tɔgɔ lawuli. Ne na i ka sow kɔnɔ ja dɛsɛlenw ni i ka nɛgɛ yeelelen jaw bɛe bɔsi i la. Ne na i kaburu labɛn sabu i barika banna.»