[1] Laban donw na, Matigi batosoba bɛ kulu min kan, o na bonya ka tɛmɛn kuluw bɛe kan, a na kɔrɔta ka tɛmɛn tintinw bɛe kan. Siyaw jamaba na u kunda yen fan kan,
[2] siyaw jamaba na taa yen. U n'a fɔ ko: «A' ye na an ka yɛlɛn Matigi ka kulu kan, Yakuba ka Ala ka so la. Ale na an kalan a ka siraw ko la, an na taama a ka siraw fɛ, k'a masɔrɔ sariya bɛ na ka bɔ Sion, Matigi ka kuma na bɔ Jerusalɛm dugu kɔnɔ.»
[3] Ale na kɛ siya caman ni ɲɔgɔn cɛ kiritigɛla ye, ka kɛ jamaba barikama ka kiritigɛla ye, hali minw yɔrɔw ka jan. U na u ka npanw faga ka kɛ dabaw ye, ka u ka tamaw kɛ wɔlɔsɔw ye. Siya si tɛna siya wɛrɛ kɛlɛ tun, mɔgɔ tɛna kalan kɛlɛkɛ cogo la tun.
[4] Mɔgɔw bɛe kelen-kelen na u sigi u ka rezɛn nakɔw ani u ka toro sunw kɔrɔ. Mɔgɔ si tɛna u lasiran tun, k'a masɔrɔ Kɛlɛbolow Matigi ye o fɔ.
[5] Siyaw bɛe kelen-kelen bɛ tugu u ka bato fɛnw nɔ fɛ. An kɔni, an na taama Matigi, an ka Ala tɔgɔ la don o don fo badaa.
[6] Matigi ko: «O don na, ne na saga sen kelenw lajɛ yɔrɔ kelen na. Minw jɛnsɛnnen bɛ ani ne ye minw tɔorɔ, ne na olu bɛe lajɛ yɔrɔ kelen na.
[7] Ne na sen kelenw kɛ mɔgɔ tɔ tolenw ye, minw tun gɛnna ka taa yɔrɔ jan, olu na kɛ siya barikama ye. Matigi na sigi u bɛe kun na Sion kulu kan kabini sisan fo badaa.»
[8] E kɔni, Sion tintin, e min bɛ mɔgɔw kɔlɔsi i ko lamini kogo, sɔoni i na barika sɔrɔ i ko fɔlɔ cogo. Jerusalɛm na kɛ masakɛ sigi duguba ye tun.
[9] Mun na i bɛ kulokan bɔ sisan? Yala masakɛ tɛ i cɛma wa? I ka laadibaaw fagara wa, fo dimi ye i minɛ i ko muso tintɔ?
[10] Sionkaw, aw ka tɔorɔ ka nwunankan bɔ i ko muso tintɔ, k'a masɔrɔ aw na bɔ dugu kɔnɔ ka taa sigi kungokolon kɔnɔ. Aw na taa fo Babilonɛ, nka aw na hɔrɔnya. Matigi na aw tila ka bɔ aw juguw bolo.
[11] Sisan kɔni, siya caman lajɛlen bɛ i kama. U b'a fɔ ko: «Sion ka tiɲɛn. An ɲɛw ka wasa a halakitɔ filɛli la.»
[12] Nka o siyaw ma Matigi ka miiriliw dɔn. U ma Matigi ka ko latigɛlenw faamu, o min ye u lajɛ yɔrɔ kelen na i ko gendekɛnɛ la kansiriw.
[13] Sionkaw, aw ka wuli ka u bɛe cɔngɔ aw sen kɔrɔ, k'a masɔrɔ ne ye biɲɛkolo nɛgɛlama di aw ma ani nsiranɛgɛ sabara, walisa aw ka siya caman foroki. Ne na u ka fɛnw bila Matigi ye. U ka nafolo minw bɛ dugukolo kan, olu bɛe ye Matigi ta ye.
[14] Ayiwa kɛlɛbolow dugu, sisan i ka kɛlɛbolow bɛe lajɛ. U nana daga sigi an kama. U sɔnna ka Israɛl ka kiritigɛla gosi a tama la ni bere ye.