[1] Mɔgɔ minw bɛ ko jugu miiri ka dabali jugu latigɛ ka u to u ka dalan kan su fɛ, ni dugu jɛra, u bɛ o kɛ cogo ɲini ka o kɛ, bɔnɛ bɛ olu ye.
[2] U ɲɛ bɛ bɔ mɔgɔ wɛrɛw ka forow fɛ ka olu minɛ. U ɲɛ bɛ bɔ mɔgɔ sigi sow fɛ ka olu minɛ ka kɛ u ta ye. U bɛ u yɛrɛ kɛ mɔgɔw ka sow tigiw ni olu bolo fɛnw tigiw ye ka olu tɔorɔ.
[3] O de kosɔn Matigi ko: «Ne na doni girinw da o mɔgɔw kun, u tɛ se minw kɔrɔ. Ni o kɛra, aw kun kɔrɔtalen tɛna se ka taama, sabu o na kɛ bɔnɛ waati ye.»
[4] O don na mɔgɔw na nin ntalen da aw ko la ka nin dɔnkili da aw ko la ko: «An bɛe halakira, o kɛra sa. Matigi ka mɔgɔw ciyɛnw donna mɔgɔ wɛrɛw bolo. Israɛl bɔnsɔn gɛnna ka bɔ u ka dugukolo kan. Mɔgɔ tilenbaliw y'o tilatila ɲɔgɔn cɛ.»
[5] O de kosɔn aw tɛna mɔgɔ si sɔrɔ Matigi ka jama la, min na juru da a niyɔrɔ ciyɛn dugukolo kan k'o suma.
[6] U b'a fɔ ko: «Aw kana kiraya kɛ tun. Mɔgɔ kana kiraya kɛ o kow la. Mafiɲɛyali tɛna ban.
[7] Yakuba ka so, yala Matigi Ni bɛ dimin joona wa? Yala o ye a cogo ye wa? Mɔgɔ min bɛ tilennenya sira taama, ne ka kuma tɛ hɛrɛ kɛ o ye wa?»
[8] Nka ne ka mɔgɔw kɛra ne juguw ye kabini tuma jan. Mɔgɔ minw bɛ kɔsegin hɛrɛ la ka bɔ kɛlɛ yɔrɔ la, aw bɛ olu tɛmɛntɔ ka finiw kunna dulɔkibaw bɔ u kan na.
[9] Aw bɛ ne ka mɔgɔw musow gɛn ka bɔ u diyaɲe sow kɔnɔ, ka ne nɔorɔ bɔ u ka denmisɛnw na badaa.
[10] A' ye wuli ka taa, sabu yan tɛ lafiya yɔrɔ ye. Ala ye tɔorɔba latigɛ aw ye aw ka nɔgɔlenyaw kosɔn.
[11] Ni nkalontigɛla dɔ bɛ na ka lafilili kuma fuu fɔ nin mɔgɔw ye, ko: «Aw na diwɛn ni minni fɛn farinma caman sɔrɔ,» o tigi na kɛ nin mɔgɔw ka kira ye.
[12] Yakuba ka so, ne na aw lajɛ yɔrɔ kelen na, ne na aw bɛe lajɛ yɔrɔ kelen na. Ne na Israɛl bɔnsɔn tɔ tolenw lajɛ yɔrɔ kelen na i ko sagakulu bɛ lajɛ saga sulu kɔnɔ cogo min na. I na jamaba mankan mɛn i ko bagankulu senkan u gɛn yɔrɔ la.
[13] Min bɛ kogo sɔgɔ, o na taama u ɲɛ fɛ. U na bɔ da fɛ ka hɔrɔnya. U ka masakɛ na u ɲɛ minɛ, Matigi na kɛ u kuntigi ye.