[1] Ne ko: «Yakuba ka so kuntigiw ani Israɛl ka so ka faamaw, aw ka lamɛnni kɛ. Aw m'a dɔn ko aw ka kan ka ko tilennenw dɔn wa?
[2] O bɛe n'a ta aw bɛ ko ɲuman koniya ka ko jugu kanu. Aw bɛ ne ka mɔgɔw wolow ni u sogow wɔrɔn ka bɔ u kolow la.
[3] Tiɲɛ la, u bɛ ne ka mɔgɔw sogow dumu. U bɛ u wolo wɔrɔn ka bɔ u la ka u kolow kari. U bɛ u tigɛtigɛ i ko mɔgɔ bɛ sogo min bila nɛgɛ daga kɔnɔ k'a tobi, i ko sogo min bɛ kɛ dagaba kɔnɔ.»
[4] O kɔ, u bɛ kasi Matigi nɔ fɛ nka a tɛna u jaabi. A bɛ a ɲɛda dogo u la o waati la k'a masɔrɔ u ye kɛwale juguw kɛ.
[5] Kira minw bɛ ne ka mɔgɔw lafili ka hɛrɛ welewele da ka dumuni fɛn to u da la, ni mɔgɔ ma dumuni fɛn di u ma, u bɛ kɛlɛ ko welewele da. Matigi b'a fɔ o kiraw kama ko:
[6] «Dibi na don aw la, aw tɛna yeli fɛnw ye tun. Aw na kɛ dibiba la, aw tɛna fɛn jiralenw ye tun. Tile na bi o kiraw kosɔn, kɛnɛ na kɛ dibiba ye u fan bɛe la.
[7] Yelikɛlaw na maloya, filɛlikɛlaw na maloya ka u kunkolow funun. U na u ɲɛdaw bɛe datugu, sabu u tɛna jaabili si sɔrɔ Ala fɛ.»
[8] Nka ne kɔni, Matigi Ni ye barikaba don ne la. Ne falen bɛ tilennenya ni ja gɛlɛya la walisa Yakuba ka jalaki ani Israɛl bɔnsɔn ka jurumu ka jira u la.
[9] Yakuba ka so kuntigiw ani Israɛl ka so ka faamaw, aw minw bɛ tilennenya koniya ka tiɲɛ yɛlɛma, aw ka nin lamɛn.
[10] Aw bɛ Sion dugu jɔ ni mɔgɔ fagali kow ye ka Jerusalɛm jɔ ni tilenbaliyaw ye.
[11] Israɛl bɔnsɔn kuntigiw bɛ tilennenya tiɲɛn surɔ fɛnw kosɔn. U ka sarakalasebaaw bɛ mɔgɔ kalan sara kosɔn. U ka kiraw bɛ kiraya kɛ wari kosɔn. U b'a fɔ Matigi ko la ko: «Matigi bɛ an cɛma, ko jugu tɛ se ka an sɔrɔ.»
[12] O de y'a to Sion dugu na sɛnɛ i ko foro, Jerusalɛm na ci ka kɛ tomon ye. Alabatosoba bɛ kulu min kan, o na kɛ jiritu ye tintin kun na aw kosɔn.