[1] Matigi ka kuma min sera Moresɛt Mise ma Juda bɔnsɔn ka masakɛw Jotam ni Akaz ni Ezekiasi tilew la, o filɛ nin ye. O kiraya kuma fɔra Samari ni Jerusalɛm duguw ko la.
[2] Siyaw bɛe, aw ka aw tulo majɔ. Dugukolo ni a kan fɛnw bɛe ka lamɛnni kɛ. Matigi Ala min sigilen bɛ san fɛ, a sigi yɔrɔ senuma kɔnɔ, Matigi yɛrɛ ka kɛ seere ye aw kama.
[3] K'a masɔrɔ Matigi yɛrɛ na bɔ a ka masaya so kɔnɔ, ka jigin ka taama dugukolo yɔrɔ kɔrɔtalenw kan.
[4] Kuluw na yeele a sen kɔrɔ i ko tulu, jɛkɛnɛw na yeele, a na kɛ i ko tasuma bɛ di kɛɲɛ yeele cogo min na, ka kɛ i ko ji bɛ woyo ka bɔ san fɛ cogo min na.
[5] Ɔwɔ, Matigi bɛ na Yakuba ka kan bilali ni Israɛl ka so ka jurumu kɛlenw kosɔn. Jɔn kɛra Yakuba ka murutili sababu ye? O tɛ Samari ye wa? Mun kosɔn batoli kɛ yɔrɔw bɛ Juda cɛma? O tɛ Jerusalɛm nɔ ye wa?
[6] Ne na Samari kɛ i ko foro kɔnɔ kabakurun ton tonnenw. A na kɛ rezɛn sun turu yɔrɔ ye. Ne na a ka batoso kabakurunw kolonkolon ka u bila kulu furancɛw la, ka u jusigilanw labɔ kɛnɛkan.
[7] A ka boliw bɛe na karikari. A ka tɔnɔ juguw bɛe na jeni ni tasuma ye. Ne na a ka ja dɛsɛlenw bɛe tiɲɛn. A ye nafolo min sɔrɔ jatɔya la, o nafolo na kɛ jatɔmuso sara ye tun.
[8] O de kosɔn ne, Mise, ne na ɲɛji bɔ ka kasikan bɔ. Ne sen lankolon ni ne farilankolon na taama. Ne na kasi i ko kungo wulu, ka kasikan bɔ i ko kɔnɔsogonti,
[9] k'a masɔrɔ Samari joginda tɛ se ka kɛnɛya. A sera fo Juda ma, a donna ka se fo ne ka mɔgɔw ka duguba Jerusalɛm ma.
[10] I kana o bɔnɛ ko fɔ Gat dugu kɔnɔ. I kana kasi Ako dugu kɔnɔ fewu. Ne kolonkolonna buguri la Bɛt-Leafira.
[11] Safirkaw farilankolon maloyalen bɛ tɛmɛn. Zanankaw t'a fɛ ka bɔ. Bɛt-Hazaɛlkaw nwunankan b'a to aw k'a dɔn ko dogo yɔrɔ tɛ u fɛ.
[12] Marotkaw hakili ɲaaminen bɛ u ka hɛrɛ ko la, sabu Matigi ye bɔnɛ min ci, o sera Jerusalɛm dondaw ma ka ban.
[13] Lakiskaw, aw ka sow siri wotorow la boli kama, sabu Sion dugu ka jurumu sababu fɔlɔ bɔra aw la, aw ye Israɛl bɔnsɔn sama ka don jurumu la.
[14] O de kosɔn aw ka aw mabɔ Moresɛt-Gat la. Akzib dugu na kɛ Israɛl bɔnsɔn ka masakɛw lafilili sababu ye.
[15] Maresa, ne na kuntigi kura ci i ma. Israɛl la mɔgɔbaw na boli ka taa u dogo fo Adulam kuluwo kɔnɔ.
[16] Jerusalɛmkaw, aw ka aw kunsigi tigɛ ka aw kun di aw den kanulenw kosɔn. Ɔwɔ, aw ka aw kun di k'a kɛ i ko duga kunkolo, sabu aw denw minɛna ka taa jɔnya la ka yɔrɔ janya aw la.