[1] O ko ma diya Jonasi ye fewu. A diminna kosɛbɛ.
[2] A ye Matigi deli ko: «Matigi, ne ma nin fɔ ka ne to ne ka jamana la wa? Nin de kosɔn ne tun b'a fɛ ka boli ka taa Tarsisi, k'a masɔrɔ ne y'a dɔn ko i ye Ala hinɛma makaritigi ye. I tɛ dimin joona, i ka makari ka bon. Ko i tun b'a fɛ ka min kɛ, i na nimisa o la.
[3] Matigi, i ka ne ni minɛ sa, sabu saya ka di ne ye ka tɛmɛnɲɛnamaya kan.»
[4] Matigi y'a jaabi ko: «I diminna, o ka ɲi wa?»
[5] Jonasi bɔra Ninivɛ dugu kɔnɔ ka taa i sigi dugu ni kɔrɔn cɛ. A ye gwa dɔ jɔ yen ka i sigi o suma la, ko min na kɛ dugu la ka o ɲɛnafilɛ.
[6] O tuma la Matigi Ala ye bara sun dɔ falen. O yɛlɛnna Jonasi kun na ka suma don a la walisa ka a dusu suma a ka tɔorɔ kosɔn. Jonasi nisɔndiyara o bara sun kosɔn kosɛbɛ.
[7] O dugusajɛ kɛnɛbɔ da fɛ, Matigi ye ntumu don o bara sun na. O ye bara sunɲimi, bara sun jara.
[8] Tile bɔra tuma min na, Ala ye fiɲɛba kalaman ci ka bɔ kɔrɔn fɛ. Tile digira Jonasi kunkolo la. A y'a daminɛ ka dimin tun. A ye saya deli Ala fɛ ko: «Saya ka di ne ye ka tɛmɛnɲɛnamaya kan.»
[9] Ala y'a fɔ Jonasi ye ko: «I diminna o bara sun tiɲɛnni kosɔn, o ka ɲi wa?» A ye Matigi jaabi ko: «Ne ka dimin fo ka se saya ma.»
[10] Matigi ko: «I ma baara si kɛ o bara sun la walisa a ka bonya. A falenna su kelen na ka sa su kelen na.
[11] Ninivɛ dugu mɔgɔ minw tɛ u kinin ni u numan dɔn, olu ka ca mɔgɔ waa kɛmɛ ni mugan ye. Bagan caman fana bɛ a kɔnɔ. Ne tɛna hinɛ o la ka tɛmɛn e hinɛ cogo kan bara sun la wa?»